Lajme

Zvicër: Numër rekord i aksidenteve gjatë kohës së lirë

Një arsye për këtë ishte moti jashtëzakonisht i mirë në pranverë dhe verë që ka mbretëruar gjatë vitit 2022

Vitin e kaluar, Suva (sigurimi zviceran i aksidenteve) ka regjistruar më shumë aksidente në kohën e lirë se kurrë më parë. Një arsye për këtë ishte moti jashtëzakonisht i mirë në pranverë dhe verë, transmeton albinfo.ch. Shumë të prekur janë lënduar gjatë aktiviteteve në natyrë.

Në përgjithësi, Suva ka regjistruar pothuajse 290,000 aksidente të kohës së lirë, është bërë e ditur të marten nga sigurimi në fjalë. Dhe, ky është niveli më i lartë i shënuar ndonjëherë. Krahasuar me një vit më parë, numri i rasteve është rritur me 14 për qind ndërsa krahasuar me vitin 2019 – viti i fundit para pandemisë së koronës – me 4 për qind, shkruan srf.ch.

Viti 2022 ka ofruar kushte jashtëzakonisht të mira për ski, biçikletë apo ecje, shkruan Suva në komunikatën e saj, përcjell albinfo.ch. Duke filluar nga marsi, moti ishte i jashtëzakonshëm, citohet të ketë thënë statisticieni i Suvas Alois Fässler.

Moti me diell dhe me reshje të pakta bëri që njerëzit të kalonin shumë kohë jashtë. Në asnjë muaj tjetër të vitit Suva nuk ka regjistruar më shumë aksidente sportive dhe ecjeje se sa në mars.