Vazhdojnë protestat kundër amnistisë

Pas një dite pauzimi, protestat do të fillojnë përsëri sot prej orës 18:00 në Shkup, me iniciativën e lëvizjes “Protestoj”. Protestuesit po kërkojnë dorëheqjen e presidentit Ivanov

Ideja e presidentit maqedonas, Gjorgje Ivanov se me amnistimin e 56 politikanëve dhe zyrtarëve shtetëror, që janë nën hetim, të akuzuar për korrupsion dhe mashtrime, do të sjell paqe politike në shtet, nuk doli të jetë e saktë. Në vend të paqes, ai solli trazira dhe protesta, madje edhe sot janë paralajmëruar demonstrata në Shkup.

Pesë ditë radhazi me iniciativë të lëvizjes “Protestoj” janë organizuar protesta masive përmes së cilave kërkohet dorëheqja e presidentit dhe shfuqizimi i vendit për amnisti. Pas një dite pauzimi protestat do të fillojnë përsëri sot prej orës 18:00, njoftojnë mediet lokale në Shkup.

“Bashkëluftëtarë dhe bashkëluftëtare, ditët e kaluar ishin intensive dhe të mundimshme, por edhe inkurajuese. Me protesta do të vazhdojmë sot me fillim prej orës 18:00, do të jemi më të koordinuar dhe do të kemi energji dhe forcë më të madhe”, thuhet në faqen e lëvizjes “Protestoj” në rrjetin social “Facebook”, citon AlsatM.

Krahas dorëheqjes së Ivanov, aktivistët e “Protestoj” kërkojnë tërheqjen e vendimit për falje të politikanëve, formimin e qeverisë për zbatimin e rekomandimeve nga raporti i Pribes si dhe organizimi i zgjedhjeve korrekte dhe demokratike. Vendimi i Ivanovit ka rrezikuar edhe protestat e 10 qershorit.

Ndryshe në listën e të amnistuarve nga presidenti Ivanov janë dy ish-kryeministra, kryetari i Kuvendit, tre ministra, liderë partish, prokurorë, drejtorë, kryetarë komunash si dhe dy shtetas të huaj. Ndërsa rekordin për amnisti e mban ish-ministri i Transportit dhe Lidhjeve, Mile Janakievski i cili është falur për 16 raste ku ai paraqitet si i dyshuar për vepra të ndryshme penale.

Pas tij është ish-ministrja e Punëve të Brendshme dhe persona me kontroverse e ish qeverisë së kaluar, Gordana Jankullovska e cila është falur për 11 vepra penale. Ndërsa, ish-drejtori i Sigurimit (DSK), Sasho Mijalkov për 6 vepra, ndërsa ish kryeministri dhe kreu aktual i VMRO-DPMNE-së Nikolla Gruevski për 5 vepra penale, raporton Albinfo.Ch.