LOGOS-i zviceran mban primatin e partnerit strategjik të Hanit të Elezit

Hani i Elezit është njëra nga pesë komunat e përfshira në fazën e dytë të projektit për këshillime, trajnime dhe bashkëfinancime

Qysh nga prilli i vitit 2010, kur komuna e Hanit të Elezit nënshkroi një memorandum me Agjencionin Zviceran për Bashkëunim (SDC), për përkrahje të qeverisjes lokale dhe decentralizim e cila realizohet nga  Fondacioni Zviceran INTERCOOPERATION, LOGOS-i mori primatin e partnerit strategjik në zhvillimin e Komunës së Hanit të Elezit.

“Hani i Elezit është njëra nga pesë komunat e përfshira në fazën e dytë të këtij projekti që për buxhet ka tre milionë euro për këshillime, trajnime dhe bashkëfinancime”. Kontaktet e vazhdueshme me ekspertët e LOGOS-it, pastaj trajnimet e vazhdueshme të zyrtarëve komunalë si dhe vizitat studimore në Suedi, në fushën e menaxhimit të Shërbimeve Publike ose ato të menaxhimit të të hyrave vetjake në Hungari, të menaxhimit të mbeturinave në Slloveni etj, janë koncepti më i qëlluar i këtij projekti që i nevojitej Komunës së sapo decentralizuar të Hanit të Elezit”, thotë zyrtari komunal për informim, z. Bashkim Sopa.

©albinfo.ch: Bashkim Sopa, zyrtar komunal për informim

Në segmentin e bashkëfinancimeve LOGOS-i tashmë ka implementuar projektin: – “Ndërtimi i rrugës së tregut“ në vlerë prej nëntë mijë eurosh dhe është në fazën e financimit të dy projekteve shumë të rëndësishme në infrastrukturën e arsimit, atë të “Regullimit të kulmit dhe dyshemesë“ në SHMU “Ilaz Thaçi“ në Han të Elezit dhe instalimit të ngrohjes qendrore në SHMU “Kështjella e Diturisë” në fshatin Paldenicë në vlerë prej dyzet mijë eurosh.

Gatishmëria e treguar e LOGOS-it që të ndihmojë Komunën e Hanit të Elezit edhe në një segment shumë të rëndësishëm, atë të ndihmës në Shërbimet Publike, bën që LOGOS-in ta vlerësojmë si partner shumë të rëndësishëm në një kohë shumë të rëndësishme.

Së fundi, LOGOS-i po ndihmon edhe në fuqizimin e Zyrave për informim në komunat partnere të këtij projekti, që janë shembull për komunikim të mirë ndërmjet komunës si institucion dhe qytetarëve e që paraqet një hallkë shumë të rëndësishme në zhvillimin ekonomik dhe social. 

©albinfo.ch: Nga marrëveshja e kryetarit Rufki Suma me Agjencionin Zviceran për Bashkëpunim