Kosovë:Bie numri i investitorëve të huaj

Vitin e kaluar investimet kanë rënë në 265 milionë euro

Kriza ekonomike në eurozonë do të ndikojë në rënien e investimeve të huaja të drejtpërdrejta në Kosovë, thonë njohës të çështjeve ekonomike në Prishtinë.

Sipas tyre, çdo herë në kriza të tilla ekonomike globale, investitorët e huaj hezitojnë të investojnë jashtë vendit të tyre. Analisti i çështjeve ekonomike, Alban Zogaj, thotë për Radion Evropa e Lirë se krizat financiare evropiane dhe botërore do të ndikojnë padyshim edhe në ekonominë e Kosovës. “Efektet e para i kemi parë në zvogëlimin e nivelit të investimeve të jashtme direkte”, thotë ai. Sipas statistikave zyrtare, në vitin 2007 investimet e huaja të drejtpërdrejta në vend kanë qenë 421 milionë euro. Më 2008, vit ky kur është shpallur pavarësia, investimet kanë qenë 355 milionë euro; në 2009-ën 310 milionë euro; ndërsa vitin e kaluar ato kanë rënë në 265 milionë euro. Arian Zeka, nga Oda Ekonomike Amerikane në Kosovë, thotë se investimet e huaja të drejtpërdrejta në Kosovë nga vendet e eurozonës, të cilat janë në krizë ekonomike, do të mungojnë. “Kriza që i ka kapluar disa shtete brenda Bashkimit Evropian, do të ndikojë në sjelljen e investimeve të huaja direkte në Kosovë”, thekson Zeka. ​​“Një stagnim i tillë pritet të ndodhë edhe në këtë vitit dhe vitin e ardhshëm, kur pritet që kriza ekonomike globale të thellohet edhe më tej”.Ndryshe, investimet ndërkombëtare në Kosovë ishin konsideruar si mjet i rëndësishëm për zhvillimin ekonomik dhe social të vendit.