Organizohen Ditët e Bizneseve të Vogla

Me qëllim të promovimit dhe të avancimit të ndërmarrësisë si dhe përforcimit të dialogut publik dhe atij privat, për herë të parë në Kosovë, ka nis të organizohen Ditët e Bizneseve të Vogla.

Organizimi i këtij manifestimi do ta ngre shkallën e vetëdijes së publikut lidhur me atë se çfarë mbështetje janë duke ofruar autoritetet përkatëse, sektori privat si dhe komuniteti i donatorëve në shenjë të përkrahjes së tyre ndaj ndërmarrjeve të vogla e të mesme (NVM-ve).

Përmes një sërë organizimesh të tilla të mbajtura në nivelin rajonal, do të njihet kontributi i dhënë nga këto ndërmarrje të vogla dhe të mesme për zhvillimin e mëtejmë të konkurrencës.

Ndërkohë, në tërë Kosovën, të rinjtë do ta kenë rastin që të marrin pjesë në një konkurs i cili do të zgjasë dy muaj, lidhur me idetë për biznes si mjeti më i mirë për promovimin e mëtejmë të aspektit të ndërmarrësish, si një alternativë për zhvillimin e karrierës.

Duke filluar nga 29 nëntori e deri më 2 dhjetor, po ashtu do të mbahet edhe një panair i vogël, ku do të vendoset një bashkëveprim i fuqishëm në mes të institucioneve, shoqatave të biznesit, donatorëve si dhe agjencive të tjera që ofrojnë mbështetjen e tyre për zhvillimin e sektorit privat.

Ushtruesi i detyrës së Shefit të Zyrës Ndërlidhëse të Komisionit Evropian në Kosovë, Khaldoun Sinno ka theksuar se “ndërmarrjet e vogla dhe ato të mesme janë si një lokomotivë për zhvillimin ekonomik. Krijimi i kushteve për këto ndërmarrje që të ecin përpara dhe të kenë sukses si dhe promovimi i ndërmarrësisë si alternativë për zhvillimin e karrierës, janë mënyra të shkëlqyeshme për stimulimin e zhvillimit ekonomik në Kosovë”, thuhet në njoftimin e Zyrës Ndërlidhëse të KE-së.

Kurse, Mimoza Kusari-Lila, ministre e Tregtisë dhe Industrisë, theksoi se këtë ministri është caktuar si prioritet ofrimi i mbështetjes maksimale për aktivitetet e organizuara në funksion të promovimit të ndërmarrësisë, dhe pikërisht ky është qëllimi i organizimit të këtyre Ditëve të Bizneseve të Vogla.

Granit Berisha, kryeshef i Agjencisë për mbështetjen e NVM-ve, deklaroi se kjo agjenci synon të arrijë një ndër qëllimet themelore e që është koordinimi i interesave të sektorit privat me atë publik.