Kërkohet luftim serioz i korrupsionit, jo me tryeza

Dita ndërkombëtare kundër korrupsionit, ka mbledhur nëpër tryeza debatues të cilët kanë numëruar edhe njëherë fushat, ku zhvillohet korrupsioni dhe mënyrat sesi është i përhapur ky fenomen.

Shoqëria civile e ka shënuar këtë ditë me aksione dhe debate, të cilat kanë kritikuar qeverinë dhe partitë politike.

Ndërkohë që ka pasur kritika edhe ndaj grupeve të caktuara që luftimin e korrupsionit e ka shndërruar në biznes dhe se nuk po e prek në thelb problemin, por vetëm po flet për të në mënyrë të gjeneralizuar, shkruan Zëri

Instituti Demokratik i Kosovës (KDI) / Transparency International Kosova (TIK) dhe Transparency International Albania, me rastin e Ditës ndërkombëtare kundër-korrupsionit, kanë organizuar tryezë me temën “Transparenca në financimin e subjekteve politike”, ku është diskutuar tema që nuk ka të bëjë vetëm me transparencën e subjekteve politike.

Lidhur me relacionin e legjislacionit dhe zbatim të tij mbi financimin e subjekteve politike, u konstatua se Kosova ka dispozita ligjore të mjaftueshme në këtë fushë, por ka ngecje në zbatimin e tyre si nga ana e subjekteve politike, po ashtu edhe nga organet mbikëqyrëse si KQZ-ja.

Marschall, zëvendësdrejtor, nga Sekretariati i Transparency International, ka alarmuar për pesimizmin e shtetasve të Republikës së Kosovës.

Ai i ka cituar të gjeturat se “njerëzit e Kosovës nuk mendojnë që Qeveria e Kosovës po bën punë të mirë në luftimin e korrupsionit, dhe në fakt nuk presin që korrupsioni do të ulet. E ky fakt është goditës, duke e marrë parasysh që jeni një shtet i sapoformuar dhe keni popullatën më të re në Evropë”.