Dialogu për viza do të fillojë

Gentilini: Dialogu për viza do të fillojë dhe Kosova do të përfitojë nga liberalizimi i vizave, kur të plotësohen të gjitha kushtet

　

Përfaqësuesi special i Bashkimit Evropian në Kosovë, Fernando Gentilini, i ka uruar institucionet dhe popullin e Kosovës për progresin e bërë gjatë kësaj jave në agjendën Kosovë – BE.

　

“Konkluzionet e Këshillit të aprovuara me 5 dhjetor dhe të cilat u miratuan plotësisht nga shefat e shteteve anëtare të BE-së me 9 dhjetor, paraqesin një hap të rëndësishëm përpara. Tani më është e qartë se dialogu për viza do të fillojë dhe se Kosova do të përfitojë nga liberalizimi i vizave kur të plotësohen të gjitha kushtet”, thuhet në deklaratën e Gentilinit.

　

Përpos kësaj, sipas tij Këshilli, po ashtu, ka vendosur të shqyrtojë një marrëveshje tregtare me Kosovën dhe të hapë programet e BE-së për Kosovën.

　

“BE-ja, po ashtu, pranon se anëtarësimi në Bankën Evropiane për Rindërtim dhe Zhvillim do të rrisë zhvillimin socio-ekonomik të Kosovës”, ka thënë ai.

　

　

Ai thekson se e gjithë kjo është shumë pozitive dhe paraqet një arritje shumë të prekshme.

　

Sipas tij, tani është e rëndësishme që Kosova t’i dyfishojë përpjekjet e saja dhe të përqendrohet në adresimin e sfidave dhe shtyjë përpara proceset e reformave.

　

“Është gjithashtu e rëndësishme që Kosova të vazhdojë të jetë konstruktive në dialog me Serbinë dhe në zbatimin e marrëveshjeve përkatëse”, ka thënë Gentilini, duke shtuar se është shumë i inkurajuar nga ajo që ka parë gjatë periudhës së fundit në Kosovë dhe në Bruksel, sa i përket lëvizjes përpara të agjendës Kosovë – BE

 

---