Kosova kërkon asistencë më të madhe të Gjermanisë në bujqësi

Në organizim të Ministrisë së Bujqësisë së Gjermanisë, Java e Gjelbër në Berlin sivjet ka grumbulluar ministrat e bujqësisë së 64 shteteve, të cilët kanë shkëmbyer njohuri dhe përvojë për sigurinë ushqimore globale dhe për zbutjen e varfërisë, duke u përqendruar në bujqësi me burime të kufizuara dhe rritje të qëndrueshme.

“E veçanta e këtij takimi ishte se në deklaratën përfundimtare Kosova për herë të parë prezantohej si shtet. Në mesin e këtyre vendeve kishte edhe shtete që ende nuk e kanë njohur shtetësinë e Kosovës, mirëpo reagime ka pasur vetëm nga Serbia dhe Rusia, të cilat, pas përkrahjes që mori Kosova nga shteti nikoqir, në shenjë proteste nuk morën pjesë në samitin e ministrave”, thuhet në kumtesën e Ministrisë së Bujqësisë.

Sipas kumtesës, gjatë këtij samiti, ministri i Bujqësisë, Blerand Stavileci është takuar me homologë të vendeve të ndryshme dhe po ashtu ka pasur një takim të shkurtër me homologen e tij gjermane, Ilse Aigner, të cilën e ka ftuar që gjatë muajve të ardhshëm ta vizitojë Kosovën.

Një ditë më parë, në takimin bilateral që ka pasur me sekretarin federal të Ministrisë së Bujqësisë së Gjermanisë, Robert Kloos, Stavileci ka diskutuar për mundësitë e rritjes së bashkëpunimit në mes të dy vendeve në fushën e bujqësisë dhe për nënshkrimin e një memorandumi të bashkëpunimit, nga i cili Kosova do të mund të përfitonte praktika të mira dhe asistencë për përmbushjen e standardeve në sektorin e bujqësisë dhe për përafrimin e saj me vendet e BE-së.

Në Javën e Gjelbër Ndërkombëtare në Berlin, e cila do të zgjasë deri më 29 janar, produktet e tyre ushqimore dhe bujqësore i kanë ekspozuar rreth 1 600 prodhues nga 59 vende të botës.