Në Prishtinë po shpalosen ofertat e turizmit për verën e sivjetme

Në panairin e turizmit, organizuar nga CEO dhe Shoqata e Turizmit Alternativ të Kosovës në Prishtinë, po shpalosen ofertat e kompanive turistike të vendit, por edhe nga Shqipëria, Mali i Zi dhe Turqia.

Ndonëse nuk ka det, Kosova ka resurse të bollshme për të zhvilluar turizmin malor.

Ndër bukuritë e rralla natyrore është Rugova e Pejës. Në Bogë janë ndërtuar hotele të shumta. Ndër to është edhe “Magra Austria”, pronoari i të cilit thekson se është i kënaqur me interesimin e turistëve për të vizituar këtë pjesë.

Por, ai ka ankesa ndaj institucioneve për shkak të mungesës së investimeve në infrastrukturë. Kurse kompanitë dhe agjencitë turistike prezantojnë oferta të shumta për bregdet.

Përfaqësuesit e këtyre kompanive thonë se kanë ofertë shumë të pasur edhe për verën e sivjetshme.

Organizatorët e këtij panairi, kanë theksuar se sivjet është rritur numri i ekspozuesve, e rrjedhimisht edhe oferta turistike qoftë verore apo për stinët tjera.

Shqipëria prezantohet nga Ministria e Turizmit dhe Agjencia kombëtare e turizmit. Zëvendës-ministri i turizmit, Abaz Hado, ka thënë se qeveria shqiptare e ka në fokus të zhvillimit sferën e turizmit dhe në këtë drejtim janë bërë edhe investime të shumta.

Ai ka ftuar turistët nga Kosova që edhe sivjet në mënyrë masive të vizitojnë bregdetin e këtij vendi.

Përveç bregdeteve tejet atraktive, turistët që vizitojnë Shqipërinë kanë mundësi të merren edhe me sportin rafting, apo lundrim nëpër rrjedha të lumenjve të rrëmbyeshëm me barka, apo gomone.

Ulqini vazhdon të jetë ndër vendet më tërheqëse për turistët kosovarë. Edhe kryetari i Komunës së Ulqinit, Nazif Cungu, iu bëri thirrje turistëve që edhe këtë verë të vizitojnë këtë komunë, që ai e vlerësoi qendër të shqiptarëve të Kosovës.

Në Panair merr pjesë edhe Ministria e Turizmit e Turqisë që prezanton një ofertë mjaft të pasur turistike.