Filarmonia e Kosovës prezantohet në kryeqytetin francez

Të mërkurën e javës që po hyjmë Filarmonia e Kosovës do të mbajë koncert në Paris për viktimat e luftës në Kosovë.

Koncerti për paqen do të luhet nga solistët, kori, Orkestra e Filarmonisë së Kosovës dhe me dirigjent Baki Jashari dhe do të mbahet në orën 19:30 në Hotel National Des Invalides në Paris.

Drejtorit i Filarmonisë, Baki Jashari, ka deklaruar se ky koncert është bërë për nder të 20-vjetorit të çlirimit të Kosovës.

Ai ka thënë se për në kryeqytetin francez do të udhëtojnë e gjithë trupa përfshi korin e orkestrën simfonike, transmeton albinfo.ch.

“Ambasada e Francës në Kosovë është iniciator i këtij evenimenti të madh. Do të prezantohet me 110 përformues në skenë” ka deklaruar Jashari.

Violinisti Festim Fana deklaroi se janë bërë të gjitha përgatitjet dhe tha se shpreson se do të kthehen faqebardhë nga ky prezantim.

Fana deklaroi se janë të lumtur që do të mbajnë koncert në një vend si Parisi.