70 filma pjesë e festivalit “PriFest” në Prishtinë

Prishtina International Film Festival njofton se në edicionin e 11 të tij do të shfaqen 70 filma.
Festivali pritet të fillojë në mes të korrikut me datën 16 deri dhe zgjate deri më 21 korrik kur dhe shënohet ceremonia e ndarjes së çmimeve.
“Edhe këtë verë të nxehtë, PriFest do t’u jap një mundësi unike që mbrëmjet t’i kaloni në kinema. Në gjithsej 10 programe të ndryshme, nga të cilat pesë janë garuese dhe 5 jogaruese vijnë, 6 premiera botërore, 5 premiera ndërkombëtare, 1 premierë evropiane, 17 premiera regjionale dhe 34 të tjera premiera në Kosovë”, thuhet në njoftim.
Drejtori artistik i PriFest, Fatos Berisha ka thënë se është shumë i kënaqur me numrin e aplikimeve në festival dhe kualitetin e filmave.
“Numri i premierave botërore dhe regjionale flet se PriFest me kalimin e kohës është shndërruar në festival të rëndësishëm ndërkombëtar në rajon”, tha ai.
Shfaqja e filmave do të bëhet në katër lokacione, në Teatrin Kombëtar ku dhe do të jetë hapësira kryesore e festivalit, Kinemanë ABC dhe Kino Armata, si dhe në hapësirën tradicionale të festivalit në qiellin e hapur në sheshin Zahir Pajaziti.
“Biletat e festivalit për të përcjellur filmat edhe sivjet do të jenë 3 euro, ndërkohë që do të ofrohen edhe kartelat pako “All in One” që për 15 euro ku mund të përcillet i gjithë programi i festivalit”, theksohet në njoftim.