“Lufthansa” anuloi 1.500 fluturime

Kompania tha se fluturimet të shtunën do të zhvillohen kryesisht ashtu siç kanë qenë të planifikuara, por shtoi se pasagjerët duhet të presin “disa anulime dhe vonesa

Kompania ajrore gjermane “Lufthansa” njoftoi të premten se greva dyditëshe e ekuipazheve të aeroplanëve e ka detyruar atë të anulojë 1,500 fluturime, që kanë prekur rreth 200,000 njerëz.

Kompania tha se fluturimet të shtunën do të zhvillohen kryesisht ashtu siç kanë qenë të planifikuara, por shtoi se pasagjerët duhet të presin “disa anulime dhe vonesa” si rezultat i grevës 48-orëshe, shkruan R.E.L.

Nga ana tjetër, sindikata Ufo, e cila e ka thirrur grevën për shkak të mospajtimeve me pagat dhe kushtet, do të zhvillojë bisedime me Lufthansa-n gjatë fundjavës.

“Ose do të kemi zgjidhje, ose do të njoftojmë se do të ketë një zgjerim masiv të grevave”, tha zëdhënësi i Ufo-s, Nicoley Baublies.

Po ashtu, personeli i kabinës i Lufthansa-s ndaloi punën të enjten, në përpjekje për të detyruar kompaninë të paguajë shpenzime dhe shtesa më të larta, si dhe të bëjë përmirësime të tjera në kushtet e punës, transmeton albinfo.ch.

Ufo dhe Lufthansa, e cila ka 21,000 përcjellës të fluturimeve, kanë rënë dakord që negociatat e fundjavës të jenë konfidenciale.

---