Kosovë: Gastronomisë i zgjatet orari edhe për një orë

Qeveria e Kosoves

Qeveria e Kosovës në mbledhjen e 32-të ka nxjerrë vendim lidhur me masat parandaluese të pandemisë që ka shkaktuar koronavirusi, pas propozimit të Ministrisë së Shëndetësisë.

Në kuadër të vendimeve, gastronomisë i është zgjatur orari edhe për një orë.

Pastaj, të gjitha subjekteve që ofrojnë shërbime gastronomike, si restorantet dhe kafiteritë, u ndalohet funksionimi nga ora 23:30 deri në 5 të mëngjesit. Ndërsa nga ora 21:00 ndalohet muzika.

Matja e temperaturës është e obligueshme për të gjithë ata që hyjnë në objekte publike dhe private.

Po ashtu, të gjithë qytetarët e huaj që hyjnë në Republikën e Kosovës dhe që vijnë nga vendet me rrezik të lartë duhet të kenë testin PCR, me përjashtime.

Institucionet shëndetësore obligohen të rikthejnë shërbimet shëndetësore në përputhje me masat për mbrojtje nga COVID-19.

Të gjitha institucionet publike dhe private obligohen të menaxhojnë paraqitjen e stafit në punë në përputhje me Manualin për mbrojtjen nga COVID-19.