Kosova

BE këmbëngul në rifillimin e dialogut Kosovë-Serbi

E diel, 21 Shkurt 2021 - 22:27 albinfo.ch

Bashkimi Evropian ka këmbëngulur sërish në rifillimin e dialogut Kosovë-Serbi.

Nga Brukseli është thënë se qeveria dhe autoritetet e reja duhet të angazhohen në mënyrë konstruktive, në mënyrë që të arrihet marrëveshja gjithëpërfshirëse.

Zëdhënësi i Komisionit Evropian, Peter Stano, ka deklaruar se BE-ja ishte shumë e qartë në deklaratën e përbashkët të lëshuar nga përfaqësuesi i lartë i BE-së për Punë të Jashtme, Borrell, dhe nga komisionari Varhelyi.

Por, sipas Arbër Fetahut nga Grupi për Studime Juridike e Politike, Qeveria e re duhet t’u qaset me seriozitetin e duhur çështjeve të rëndësishme të politikës së jashtme.

Arton Demhasaj nga organizata “ÇOHU” thotë se Qeveria Kurti e ka të pashmangshme të merret me dialogun.

Ai shprehet se për vazhdimin e dialogut ndaj Kurtit do të ketë presione nga Bashkimi Evropian dhe Washingtoni.

Ai ka deklaruar se edhe marrëveshja e Washingtonit s’mund të pengohet.

Por Lideri i Vetëvendosjes, partisë që ka fituar zgjedhjet e 14 shkurtit, Albin Kurti, ka thënë se dialogu nuk do të jetë prioritet i qeverisë së tij.

E Presidenti i Serbisë, Aleksandër Vuçiq, ka thënë se kandidati për kryeministër i Kosovës, Albin Kurti, nuk është i interesuar për dialog me Beogradin, më shumë sesa me serbët në Kosovë.

Ai ka tërhequr vërejtjen se interesat e serbëve në Kosovë nuk mund t’i përfaqësojnë ata që kanë dy për qind të votave, por ata që kanë 95 për qind.

Duke folur për mundësinë që të rritet presioni pas paralajmërimit se Washingtoni do të prezantojë një platformë të re të dialogut, Vuçiqi ka thënë se Serbia e di se cilat janë interesat e saj kombëtare dhe shtetërore, shkruajnë mediat kosovare, përcjell albinfo.ch

 Të ngjashme

Austriaku Menasse fiton Çmimi Evropian të Letërsisë për romanin me temë Shqipërinë

 Të tjera nga Kosova

Ministret e jashtme të Shqipërisë dhe Kosovës në shënimin përkujtimor të 90-vjetorit të lindjes së Ismail Kadaresë

 E-Diaspora

 Jeta në Zvicër