Fillon Liga Unike mes Kosovës dhe Shqipërisë

Më në fund do të jetësohet ëndrra e shumë shqiptarëve për zhvillimin e një lige ndërmjet Kosovës dhe Shqipërisë

Liga Unike që bëri bujë shumë të madhe në media, por që nuk u zhvillua për shkak të Covid-19, do të zhvillohet në formë të Final 8.

Kjo ligë është me iniciativë të Federatës së Basketbollit të Kosovës dhe asaj të Shqipërisë, derisa në nënshkrimin e marrëveshjen kishte marrë pjesë edhe kryeministri shqiptar Edi Rama, në shtator të vitit të kaluar.

Kryetari i Bordit të Ligës Unike, Ilir Trebicka, me anë të një njoftimi për media, ka bërë të ditur se më në fund do të zhvillohet edhe turneu i katër skuadrave më të mira nga Kosova dhe katër më të mira nga Shqipëria, shkruan albinfo.ch.

Skuadrat e nominura nga Federata Shqiptare e Basketbollit (FSHB) janë Tetua, Goga Basket, Vllaznia dhe Tirana, kurse nga Federata e Basketbollit e Kosovës (FBK) janë Sigal Prishtina, Golden Eagle Ylli, Peja dhe Rahoveci.

Garat do të zhvillohen në format të “Final 8” me sistem eliminimi dhe ndeshjet e para çerekfinale do të luhen në Rahovec me datë 6 dhe 7 Prill 2021, ndërsa ndeshjet gjysmëfinale, gara për vendin e tretë dhe finalja e madhe e Ligës UNIKE do të zhvillohen me datat 13-14 Prill në Durrës.

---