5 shtetet që kanë filluar rihapjen

Më shumë se 18 muaj pas shfaqjes së pandemisë Covid-19, një numër vendesh kanë vendosur se është koha për t’u hapur dhe për të zbatuar modelin “të jetojmë me Covid-19”

Danimarka: Vendi që deklaroi masat paraprake

Qeveria daneze hoqi të gjitha kufizimet e mbetura të koronavirusit më 10 shtator, duke thënë se Covid-19 nuk ishte më “një sëmundje që konsiderohej si një kërcënim kritik për shoqërinë”.

Danezët tani mund të hyjnë në klube nate dhe restorante pa treguar një “pasaportë Covid”, të përdorin transportin publik pa mbajtur maskë dhe të takohen në një numër të madh, pa kufizime, shkruan Monitor, transmeton albinfo.ch.

Shkalla e transmetimit, ose shkalla R, aktualisht është 0.7, tha ministri i Shëndetësisë Magnus Heunicke në Twitter të mërkurën, që do të thotë se epidemia po vazhdon të zbehet. Nëse është mbi 1.0, rastet e Covid-19 do të rriten në të ardhmen e afërt. Nëse është nën 1.0, rastet do të ulen në të ardhmen e afërt.

Singapori: Përpjekje për të jetuar me Covid-19, por Delta po e vështirëson situatën

Qeveria e Singaporit njoftoi në qershor se po planifikonte të zhvendosej drejt një strategjie tjetër në lidhje me Covid-19, duke u përpjekur të kontrollojë përhapjen me vaksina dhe duke monitoruar shtrimet në spital, por pa kufizuar jetën e qytetarëve.

“Lajmi i keq është se Covid-19 nuk mund të largohet kurrë. Lajmi i mirë është se është e mundur të jetosh normalisht me të”, deklaruan zyrtarët e shëndetësisë në Singapor.

Autoritetet filluan të lehtësojnë disa kufizime në gusht, duke lejuar njerëzit e vaksinuar plotësisht, të darkojnë në restorante dhe të mblidhen në grupe prej pesë vetash.

Singapori ka një nga nivelet më të larta të vaksinimit kundër Covid-19 në botë, dhe 81% e popullsisë është vaksinuar plotësisht.

Tajlanda: Vaksinimi i ngadaltë, por vendi gjithsesi po hapet

Tajlanda planifikon të rihapë Bangkokun dhe destinacionet e tjera për vizitorët e huaj muajin e ardhshëm, thanë zyrtarët javën e kaluar, ndërsa kombi i Azisë Juglindore po përpiqet të ringjallë industrinë e turizmit, pavarësisht rritjes së numrit të infeksioneve.

Pasi i mbajti infeksionet të ulëta në vitin 2020 falë masave të suksesshme të kontrollit, Tajlanda është përpjekur të mbajë rastet në kontroll këtë vit.

Shkalla e vaksinimit ka mbetur e ulët. Vetëm 18% e popullsisë tajlandeze është vaksinuar plotësisht kundër Covid-19 që nga 13 shtatori, sipas Our World in Data, dhe 21% është vaksinuar pjesërisht.

Afrika e Jugut: Lehtësim i kufizimeve, por Delta është ende një kërcënim

Afrika e Jugut ka filluar të lehtësojë disa kufizime ndërsa normat e infeksionit ulen në vend.

Lehtësimi i kufizimeve, i shpallur nga Presidenti Cyril Ramaphosa të dielën, është i dukshëm në një vend që kaloi pjesën më të madhe të pandemisë me rregulla jashtëzakonisht të rrepta të distancimit shoqëror, madje duke ndaluar ndonjëherë të gjitha tubimet përveç funeraleve – dhe ku normat e vaksinimit mbeten të ulëta.

Ramaphosa paralajmëroi se një valë e tretë e nxitur nga varianti Delta nuk kishte përfunduar, por shtoi se vendi tani ka doza të mjaftueshme vaksine për të vaksinuar të gjithë popullsinë e rritur.

Ai inkurajoi të gjithë të vaksinohen dhe të respektojnë kufizimet e mbetura për të lejuar që vendi të kthehet në normalitet.

Kili: Shkalla e lartë e vaksinimit lejon kthimin e turistëve

Kili është vlerësuar ndërkombëtarisht për fushatën e tij të qetë dhe të suksesshme të vaksinimit. Sipas raporteve të fundit të Ministrisë së Shëndetësisë, gati 87% e kilianëve janë plotësisht të vaksinuar.

Pavarësisht kërcënimit të paraqitur nga varianti Delta, qeveria të mërkurën njoftoi vendimin për të rihapur vendin për turizmin ndërkombëtar nga 1 tetori.

“Fakti që turistët e huaj mund të vijnë në Kili është një hap i rëndësishëm për rimëkëmbjen e turizmit”, tha Nënsekretari për Turizmin José Luis Uriarte. “Është e rëndësishme të theksohet se ky është hapi i parë dhe ne do të jemi në gjendje të vazhdojmë të ecim përpara për sa kohë që ruajmë kushtet e duhura shëndetësore.

---