Digjen edhe tri vetura në veri të Kosovës

Policia e Kosovës ka njoftuar se mëngjesin e së shtunës në Veri të Kosovës janë djegur edhe tri vetura të tjera. “Në ora 03:10, policia është njoftuar nga një qytetar serb kosovar, se në Leshak të Leposaviqit, tri vetura të tij (nuk janë me targa RKS), janë përfshirë nga zjarri”, thuhet në njoftim, përcjellë albinfo.ch.

Gjatë së shtunës edhe shefi i kabinetit të presidentes, Blerin Vela njoftoi për djegien e veturave. “Kampanja kriminale për djegien e veturave në Veri të Kosovës vazhdon. Edhe tre vetura të tjera janë djegur këtë mëngjes”, ka shkruar Vela, duke shtuar se përgjegjësit do të vihen para drejtësisë, përcjellë albinfo.ch.

Vela tutje thotë se “strukturat ilegale të Serbisë po targetojnë qytetarë serbë që i konsiderojnë të afërt me institucionet e Kosovës”, përcjellë albinfo.ch.

Me afrimin e datës së zgjedhjeve 23 prill ka nisur djegia e veturave në katër komunat veriore të Kosovës.