Osmani: Liberalizimi i vizave – meritë e popullit, pavarësisht vonesave dhe padrejtësive

Presidentja e Kosovës, Vjosa Osmani, ka reaguar për vendimin e Parlamentit Evropian për liberalizimin e vizave

Presidentja e Kosovës, Vjosa Osmani, ka thënë se vendimi për liberalizimin e vizave është fitore jo vetëm e Kosovës, por edhe demokracinë dhe unitetin në Evropë, përcjell albinfo.ch.

Tutje, përmes një postimi në Facebook, ajo ka thënë se liberalizimi është meritë e popullit, “pavarësisht vonesave dhe padrejtësive të ndryshme”.

Postimi i plotë:

Vendimi i sotëm final për liberalizimin e vizave për qytetarët e Kosovës është fitore, jo vetëm për vendin tonë, por për vetë demokracinë dhe unitetin në Evropë. Ky vendim është meritë e popullit të Kosovës, vendosmërisë së pashembullt të treguar përgjatë viteve, pavarësisht vonesave dhe padrejtësive të ndryshme.

Më 1 janar 2024, qytetarët tanë më në fund do të ndihen të barabartë me popujt e tjerë evropianë, për të lëvizur lirshëm në kontinentin që ata i përkasin, e për të cilin kanë kontribuar ndër shekuj. Tanimë, lëvizja në shtetet evropiane është më e lehtë, familjet tona janë më afër dhe mundësitë për avancim e bashkëpunim më të mëdha.

---