Kryeministri i Kosovës Albin Kurti është takuar me të dërguarin e Gjermanisë për Ballkanin, Manuel Sarrazin. 

Në një komunikatë për media pas takimit, u bë e ditur se është diskutuar për situatën pas zgjedhjeve të 23 prillit dhe përplasjet mes policisë dhe qytetarëve serbë që tentonin të bllokonin hyrjen e kryetarëve në objektet e komunave Leposaviq, Zubin Potok dhe Zveçan. 

“Kryeministri theksoi rëndësinë e respektimit të rezultateve të zgjedhjeve demokratike, duke shtuar se shkuarja e kryetarëve të komunës në zyrat e tyre të punës dhe ofrimi i shërbimeve bazike për qytetarë duhet të trajtohen si gjë normale”, thuhet në njoftim. 

Edhe presidentja e Kosovës, Vjosa Osmani ka biseduar me Sarrazin për Veriun dhe ka potencuar se veprimet e policisë janë legjitime. 

“Presidentja Osmani ka përsëritur se veprimet e Policisë së Kosovës ndaj strukturave ilegale e grupeve kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim. Kosova mbetet e përkushtuar ndaj vlerave evropiane të funksionimit si shtet qytetar duke ruajtur karakterin multietnik të saj dhe institucioneve të saj”, thuhet në komunikatën e Presidencës.