Anëtarësimi i Kosovës në Interpol, ‘peng’ i çështjeve politike

Pas dështimit të parë për anëtarësim në Interpol, Kosova vazhdon të mbetet peng i problemeve politike për të arritur synimin për të qenë pjesë e këtij institucioni të rëndësishëm ndërkombëtar.

Ministri i Brendshëm, Xhelal Sveçla, deklaroi të mërkurën se pengesat janë kryekëput politike, raporton albinfo.ch.

“Sa u takon aftësive së PK-së, patjetër që jo vetëm se PK do të ishte pjesë e Interpolit, por do të ishte një ndër policitë më të mira në Interpol, ashtu siç është policia më e mirë në rajon. Është çështje e pengesave politike, për të cilat të gjithë jemi dëshmitarë. Jam i bindur se me një mobilizim të duhur të të gjithë aktorëve në këtë fushë, do të arrijmë edhe këtë sukses, ashtu siç edhe u bëmë pjesë apo dërguam përfaqësuesin tonë në Europol”, tha ai.