Kosova dhe Maqedonia e Veriut nënshkruajnë marrëveshje për themelim të pikave të përbashkëta kufitare

Foto FB: Ministria e Punëve të Brendshme

Kosova dhe Maqedonia e Veriut kanë nënshkruar sot marrëveshjen për themelimin e pikave të përbashkëta kufitare.

Ministri i Punëve të Brendshme, Xhelal Sveçla, e ka pritur në takim ambasadoren e Maqedonisë së Veriut në Kosovë, Shpresa Jusufi, teksa kanë nënshkruar marrëveshjen nga ministri Oliver Spasovski.

Në bazë të marrëveshjes, do të ngrihen dy pikat kufitare, “Han i Elezit – Bllacë” dhe “Glloboqicë-Jazhincë”, përcjell albinfo.ch.

Në pikën e përbashkët të kalimit kufitar “Han i Elezit – Bllacë”, kontrollet doganore dhe kufitare do të kryhen në territorin e Maqedonisë së Veriut, ndërsa në pikën “Glloboqicë – Jazhincë”, në territorin e Kosovës.

Me këtë rast, qytetarët e dy vendeve më nuk do të kenë nevojë për kontrolle të dyfishta gjatë kalimit të kufijve, ndërsa aktualisht Kosova ka disa pika të përbashkëta kufitare me vendet fqinje.

“Kjo marrëveshje ka për qëllim thjeshtimin e procedurave dhe lehtësimin e lëvizjes së personave dhe automjeteve. Tani e tutje, qytetarët do të legjitimohen vetëm në njërën pikë kufitare”, ka shkruar Sveçla.