Ndalohet transmetimi i kanaleve me spotin kërcënues në serbisht

Rrjete Sociale

Komisioni i Pavarur për Media u ka kërkuar operatorëve të shpërndarjes që të ndalojë transmetimin e kanaleve të Arena-s.

Vendimi i KPM sipas kryetarit të Komisionit, Jeton Mehmeti është marrë pasi Kanalet e Arena-s kanë transmetuar përmbajtje që janë në kundërshtim me rregulloren e KPM-së.

“Është fjala për transmetim të videomesazheve që vinë nga Serbia që kanë përmbajtje me tekst që glorifikojnë sulmin në veri dhe përmbajnë mesazhe kërcënuese për qytetarët e Kosovës”, ka thënë Mehmeti, shkruan Koha.net.

Kjo është në kundërshtim me rregulloren e KPM-së.

“Veprimi i menjëhershëm është që pas gjetjeve që ato janë transmetuar, që menjëherë të ndalojmë transmetimet e Arena-s për shkak se një mesazh i tillë është në kundërshtim me rregulloren dhe cenon sigurinë në vend”, ka thënë Mehmeti, përcjell albinfo.ch.

Arena sport ritransmetohet nga operatorët kabllorë Artmotion, IPKO, Kujtesa, Telkos dhe MTS.

Në këto kanale disa herë është transmetuar një videospot kërcënues ku në gjuhën serbe shkruan “Pamticemo”, që në shqip do të thotë “do të mbajmë në mend”, duke glorifikuar tre sulmuesit e vrarë në Banjskë të Zveçanit më 24 shtator, të cilët ishin pjesë e grupit që sulmoi Policinë e Kosovës, me ç’rast u vra pjesëtari i Policisë së Kosovës, Afrim Bunjaku, shkruan Koha.net.

Sipas KPM-së është ndalur transmetimi i kanaleve të Arena-s në këta operatorë kabllorë.