Modelet e vjetra nga Zvicra, po sillen si të reja

Prodhime të vjetra tekstili nga Zvicra janë tentuar të kontrabandohen në Kosovë, për t’ua shituar më pas kosovarëve si të reja. Rreth 3500 konfiskuar në terminalin e Ferizajt

Një maune e mbushur me prodhime të vjetra tekstili nga Zvicra, është tentuar të kontrabandohej në Kosovë, për t’ua shituar më pas kosovarëve si mall i ri. Në këtë maune, kanë qenë të padeklaruara rreth 3500 copë të firmave, Armani, Pierre Balmain, Max Mara, Burberry, Moschino, Cavalli, Dondup, etj.

Kjo maune është ndaluar nga oficerët doganorë në terminalin doganor në Ferizaj, ndërsa malli ishte me origjinë nga Zvicra.

“Fatkeqësisht, kemi biznese që tentojnë t’i fshehin mallrat e tyre, siç po shihet në këto mallrat të përziera kemi gjetur një sasi të konsiderueshme të mallrave të tekstilit, të cilat tërësisht kanë qenë të padeklaruara, që u tentuan të kontrabandohen”, ka deklaruar për Adriatik Stavileci, Zëdhënës i Doganave të Kosovës.

Sipas Stavilecit, nuk dihet vlera e saktë të këtij malli, për shkak se njësitet e specializuara janë duke punuar në këtë rast.

Zyrtarët doganorë nuk e kanë bërë të ditur adresën se në cilin biznes kosovar do të shkonin këto mallra, ndërkohë zyrtarisht merret vesh se ky tekstil i kontrabanduar  destinacion kishte Prishtinën. Sipas burimeve të RTK-­së, ato janë modele të vjetra dhe që blihen në ankande publike në shtetet evropiane, por që kosovarëve u shiten me çmime të larta.