Aksion policor, për shpëtimin e emigrantëve aziatikë

Rreth 120 refugjatë nga Afganistani e Siria po mbaheshin me dhunë në fshatin Vaksincë, nga një udhëheqës i trafikimit i njohur si “Ali Baba”

Në orët e hershme të mëngjesit ka nisur një aksion i gjerë i Policisë së Maqedonisë për të shpëtuar, siç thuhet, një grup refugjatësh nga Afganistani dhe Siria që po mbaheshin dhunshëm në tri shtëpi të fshatit Vaksincë të Kumanovës. Refugjatët, rreth 120 sosh, po mbaheshin me dhunë nga një udhëheqës i trafikimit i njohur si “Ali Baba”.

Mësohet se emigrantët janë keqtrajtuar në mënyrë brutale nga grupi i udhëhequr nga “Ali Baba”. Zhurnal kontaktoi me zëdhënësin e MPB-së Ivo Kotevski, mirëpo ai deklaroi se tani nuk mund të jepen informacione deri në përfundimin e aksionit policor.

Golgota e mbi 120 emigrantëve nga Siria dhe Afganistani të cilët me javë ishin mbajtur peng në disa shtëpi të fshatit Vaksincë të Kumanovës pritet të mbarojë së shpejti, transmetojnë mediet lokale ne Shkup.

Shqetësimet për marrjen e emigrantëve si pengje e bëri një media britanike e cila prezantoi dëshmi prekëse ku emigrantët në mënyrë çnjerëzore torturohen dhe plaçkiten në Maqedoni. Jozyrtarisht mësohet se pas këtij trafikimi me qenie njerëzore qëndrojnë çarqe të caktuara të cilët fitojnë shuma marramendëse për transportin e tyre deri në kufi me Serbinë.