Përfundon afati: Më shumë se 70 mijë votues nga diaspora

Kurse për të votuar fizikisht në përfaqësitë diplomatike jashtë Kosovës, zëdhënësi i KQZ-së tha se janë regjistruar rreth 18 mijë shtetas

Të shtunën në mesnatë është përmbyllur procesi i regjistrimit të votuesve jashtë Kosovës, për të votuar në zgjedhjet e parakohshme për Kuvendin e Kosovës të cilat do të mbahen më 28 dhjetor.

Lajmin për portalin rtv21.tv e ka konfirmuar zëdhënësi i KQZ-së, Valmir Elezi, transmeton albinfo.ch.

Ai tregoi të dhënat nga procesi i regjistrimit, kurse vlerësimi i të gjitha aplikimeve pritet të përfundojë gjatë ditës. Derisa shtoi se janë refuzuar rreth 6 mijë e 700 aplikime.

“Është përmbyllur periudha për regjistrimin e votuesve jashtë Kosovës për zgjedhjet e parakohshme për Kuvendin e Kosovës. Sipas të dhënave preliminare, gjatë periudhës 11-ditore (26 nëntor – 6 dhjetor) përmes platformës elektronike të KQZ-së https://diaspora.kqz-ks.org janë pranuar mbi 84,700 aplikime për regjistrim për votim jashtë Kosovës, prej të cilave janë aprovuar rreth 71,900, ndërkaq janë refuzuar rreth 6,700. Në vlerësim e sipër janë rreth 5,900 aplikime”, tha Elezi.

Elezi bërë të ditur se pjesa më e madhe e votuesve të regjistruar kanë përzgjedhur të votojnë përmes postës dhe vetëm një pjesë për të votuar fizikisht në përfaqësitë diplomatike të Republikës së Kosovës.

Kurse për të votuar fizikisht në përfaqësitë diplomatike jashtë Kosovës, zëdhënësi i KQZ-së tha se janë regjistruar rreth 18 mijë shtetas.

“Nga numri i përgjithshëm i aplikuesve të aprovuar, pjesa më e madhe janë regjistruar për të votuar përmes postës, mbi 51,000 prej tyre për të dërguar pakon me fletëvotim në ndonjërën nga adresat e kutive postare jashtë Kosovës dhe rreth 2,500 të tjerë për të dërguar pakon me fletëvotim në kutinë postare të KQZ-së në Kosovë. Ndërkaq, rreth 18,000 shtetas janë regjistruar për të votuar fizikisht në ndonjërën nga përfaqësitë diplomatike”, tregoi Elezi.

---