Feride Rushiti vlerësohet me Çmimin “European of the Year 2025″

Veprimtarja e njohur është vlerësuar me Çmimin “European of the Year 2025”, mirënjohje për një angazhim të qëndrueshëm në mbrojtje të dinjitetit njerëzor

Për herë të parë pas dhjetë vjetësh, ceremonia e ndarjes së Çmimit “European of the Year” u shënua nga dhënia e dy vlerësimeve, duke reflektuar një qasje gjithëpërfshirëse ndaj kontributeve që mishërojnë vlerat themelore evropiane të të drejtave të njeriut, drejtësisë dhe solidaritetit.

Njëri nga këto çmime iu nda Feride Rushiti, themeluese dhe drejtoreshë ekzekutive e KRCT – Kosova Rehabilitation Centre for Torture Victims, si dhe kandidate për Çmimin Nobel për Paqen 2025, shkruan albinfo.ch. Vlerësimi u dha si njohje e angazhimit të saj shumëvjeçar profesional dhe etik në rehabilitimin e të mbijetuarve të torturës, viktimave të luftës, refugjatëve, të riatdhesuarve dhe azilkërkuesve në Kosovë.

Në fjalën e saj të mirënjohjes, Rushiti e vendosi theksin te dimensioni kolektiv i këtij vlerësimi, duke nënvizuar se çmimi tejkalon aspektin individual dhe përfaqëson një rrugëtim të përbashkët institucional dhe njerëzor.

“Ky çmim është një vlerësim për mua, por mbi të gjitha është një dëshmi e rrugës sonë të përbashkët, e përkushtimit dhe e punës së palodhur të kolegeve dhe kolegëve tanë pranë të mbijetuarve,” u shpreh ajo. Rushiti ia dedikoi këtë mirënjohje grave, vajzave dhe burrave që i mbijetuan dhunës së luftës, duke theksuar se zëri dhe dinjiteti i tyre përbëjnë kujtesën kolektive dhe ndërgjegjen morale të shoqërisë kosovare.

Ajo falënderoi gjithashtu European Union in Kosovo për besimin dhe vlerësimin e vazhdueshëm, duke e cilësuar mbështetjen evropiane si thelbësore për forcimin e standardeve të të drejtave të njeriut dhe për proceset afatgjata të shërimit shoqëror.

Çmimi i dytë “European of the Year 2025” iu nda Perspektivës Rinore, studentëve të Fakultetit Juridik të Universiteti i Prishtinës, të cilët përmes pjesëmarrjes në gara ndërkombëtare të gjyqeve simuluese kontribuojnë në promovimin e sundimit të ligjit, drejtësisë dhe barazisë, duke përfaqësuar Kosovën në forume akademike ndërkombëtare.

Të dy vlerësimet u përcaktuan përmes votimit publik dhe synojnë të theksojnë rolin e individëve dhe institucioneve që, përmes punës së qëndrueshme dhe profesionale, avancojnë vlerat evropiane dhe forcojnë besimin në drejtësi, solidaritet dhe dinjitet njerëzor. Ceremonia u perceptua si një moment institucional reflektimi, që lidh kujtesën historike me përgjegjësinë e së tashmes dhe vizionin evropian të së ardhmes së Kosovës.

 

 

---