Festivali “Swikos”, një portë e hapur për filmin kosovar

Në edicionin e sivjetmë të SWIKOS konkurrojnë artistë nga Zvicra, Shqipëria, Kosova, Gjermania dhe Franca, gjegjësisht marrin pjesë 6 prodhime nga artistë zviceranë, 3 prodhime nga Gjermania, si dhe 5 filma janë të artistëve nga Kosova dhe Shqipëria

Në një sallë të stërmbushur me mysafirë, të ftuar nderi e dashamirë të filmit, të premten mbrëma në Bazel ka filluar edicioni i 9-të i Festivalit të filmit të shkurtër SWIKOS 2015, ku gjatë dy ditëve do të garojnë 14 projekte filmike.

Në fjalën e hapjes të Festivalit, publikut iu drejtua drejtori I këtij festivali, Florim Brajshori, I cili dukej me të vërtetë shumë i emocionuar me atë që është arritur deri më tash me këtë festival filmi, i cili vitin e ardhshëm pritet të festojë vitin e 10-të jubilar.

Në edicionin e sivjetmë të SWIKOS konkurrojnë artistë nga Zvicra, Shqipëria, Kosova, Gjermania dhe Franca, gjegjësisht marrin pjesë 6 prodhime nga artistë zviceranë, 3 prodhime nga Gjermania, si dhe 5 filma janë të artistëve nga Kosova dhe Shqipëria.

Regjisori i njohur Kosovar, Agim Sopi, I cili njëherësh është edhe anëtar I jurisë, festivalin e Filmit Swikos e cilëson si një gjetje mjaft origjinale, që filmave, e në veçanti atyre kosovarë, iu mundëson hapjen e një dere të vogël, me anë të së cilës mund të krahasohen me filmat e tjerë nga bota.

Nata e parë e festivalit filloi me filmin “Steinzeit”, me regji të Mirjam Zimmermann, për t’u pasuar nga filmi “Kali”, me regji të Alban Ukajt dhe Yll Çitakut. Filmi i tretë i mbrëmjes së parë ishte “Inland”, me regji të Piet Baumgarter.

Më pas u shfaqën filmat “Leonardo” nga Ilir Hasanaj, “Breath” me regji të Artur Gorishtit, “Luftschloss” me regji të Olga Dinnikova. Ndërsa filmi përmbyllës i natës së parë ishte ai nga Gjermania, “Da nicht fur” nga Martina Pluro.

Festivali ka karakter garues dhe çmimet që do të ndahen janë: Filmi më i mirë, Aktori më i mirë, Regjisori më i mirë, Kamera më e mirë, Editimi më i mirë dhe çmimi i publikut.

„Swikos“mbahet edhe këtë herë në sallën “Stadt Casino” të Bazelit, ndërsa hyrja për të shikuar filmat është pa pagesë.

Filmi kosovar i Lindita Zeqirajt ishte fitues i edicionit të kaluar të festivalit të filmit të shkurtë SWIKOS në Bazel të Zvicrës.