Duke u mbështetur në të dhënat preliminare të KQZ-së nga më shumë se 97% e vendvotimeve, numri i qytetarëve që kanë votuar deri në orën 11:00 është 162,439 votues apo 8.29%.

Kryesuesi i Komisionit Qendror të Zgjedhjeve, Kreshnik Radoniqi, ka thënë se procesi po vazhdon pa probleme.

“Procesi i votimit po zhvillohet sipas planifikimeve. Sipas të dhënave nga komisionet komunale, deri tash votimi po zhvillohet në kushte të rregullta dhe pa probleme”, ka thënë ai në konferencën e orën 11:30, transmeton albinfo.ch.

Në të njëjtën kohë në zgjedhjet e 28 dhjetorit patën votuar 8.27 për qind.

Kandidatja për presidente nga Lidhja Demokratike e Kosovës (LDK), Vjosa Osmani, ka ushtruar të drejtën e saj të votës në kuadër të zgjedhjeve të parakohshme parlamentare, duke bërë thirrje për një proces zgjedhor të rregullt dhe demokratik.

Pas votimit, Osmani u shpreh se pret që procesi të zhvillohet në mënyrë të qetë dhe transparente, duke kontribuar në forcimin e demokracisë dhe në formimin e shpejtë të institucioneve të reja në vend.

Ajo u bëri thirrje qytetarëve që të ushtrojnë të drejtën e tyre të votës, duke theksuar rëndësinë e pjesëmarrjes së gjerë në zgjedhje, transmeton albinfo.ch.

“Dua t’u uroj të gjithë qytetarëve një proces të rregullt, i cili kontribuon në demokraci dhe në krijimin sa më shpejt të institucioneve, në mënyrë që Kosova të dalë nga kriza. Shpresoj që sa më shumë qytetarë ta shfrytëzojnë të drejtën e tyre demokratike. Njëkohësisht i falënderoj të gjitha institucionet që gjatë ditës do të jenë në terren për të kryer detyrat dhe përgjegjësitë e tyre”, deklaroi ajo.

Osmani e cilësoi ditën e zgjedhjeve si një moment të rëndësishëm për vendin, duke shprehur besimin se qytetarët do të përcaktojnë drejtimin e ardhshëm politik të Kosovës.

“Shpresoj që sot të jetë dita e Kosovës, dita kur Kosova të festojë dhe të fitojë”, u shpreh ajo.

Sipas Osmanit, vota e qytetarëve do të jetë vendimtare për formimin e institucioneve të reja dhe për tejkalimin e krizës politike në vend.

Kandidati për kryeministër nga LDK, Lumir Abdixhiku, pasi ushtroi të drejtën e votës, e ka cilësuar ditën e zgjedhjeve si festë të demokracisë dhe ka ftuar qytetarët për pjesëmarrje masive në votime.

“Zgjedhjet janë festë për popullin tonë, janë festat e demokracisë, e shprehjes së lirë, e vullnetit të popullit të Kosovës. Sot presim të kemi zgjedhje të mira dhe demokratike”, deklaroi Abdixhiku.

Ai vlerësoi punën e institucioneve dhe akterëve të përfshirë në procesin zgjedhor, duke përfshirë komisionerët, vëzhguesit, Prokurorinë, Policinë e Kosovës, KQZ-në dhe mediat, transmeton albinfo.ch.

“Janë të gjitha kushtet që populli i Kosovës të vendosë fatin për katër vitet e ardhshme. Sot, brenda 12 orëve, vendoset fati i Republikës, prandaj çdo votë ka rëndësi”, u shpreh ai.

Abdixhiku theksoi pritjet për pjesëmarrje të lartë në zgjedhje dhe zhvillim të rregullt të procesit zgjedhor.

U.d. e Presidentes së Kosovës, Albulena Haxhiu, pasi ushtroi të drejtën e votës në shkollën fillore “Meto Bajraktari”, ka ftuar qytetarët që të marrin pjesë në procesin zgjedhor, duke theksuar rëndësinë e pjesëmarrjes së lartë në forcimin e demokracisë.

“Me këtë rast nga këtu ftoj të gjithë qytetarët e Republikës së Kosovës që sot, ditë e diel, 7 qershor, të dalin dhe ta ushtrojnë të drejtën e tyre të votës. Sa më e lartë pjesëmarrja në këto zgjedhje, aq më e fortë është demokracia jonë”, deklaroi Haxhiu.

Ajo bëri thirrje për maturi, respekt dhe dashuri ndaj vendit gjatë procesit zgjedhor.

“Ftoj të gjitha palët, ftoj të gjithë qytetarët e Republikës së Kosovës që në këtë ditë të bukur me diell të dëshmojnë maturi, të dëshmojnë respekt për njëri-tjetrin, por po ashtu edhe dashuri për vendin”, u shpreh ajo.

Haxhiu falënderoi mediat për punën në terren dhe uroi një proces zgjedhor të qetë dhe të lehtë për të gjithë.

Kandidati për kryeministër nga PDK, Bedri Hamza, pasi ushtroi të drejtën e votës bashkë me familjen e tij, u bëri thirrje qytetarëve të Kosovës që të marrin pjesë në zgjedhje dhe të votojnë lirshëm, në mënyrë demokratike dhe sipas bindjeve të tyre politike.

“Të nderuar përfaqësues të mediave, unë bashkë me familjen time posa e shfrytëzuam të drejtën tonë për të votuar. I ftoj të gjithë qytetarët e Kosovës me shfrytëzu këtë të drejtë, me dalë me votuar, me votuar sipas bindjeve të tyre politike, me votuar në mënyrë të lirë, në mënyrë të qetë, në mënyrë demokratike”, deklaroi Hamza.

Ai theksoi se dita e zgjedhjeve është moment i rëndësishëm për vendimmarrjen e qytetarëve për katër vitet e ardhshme, transmeton albinfo.ch.

“Ditë e bukur me shfrytëzu këtë ditë me dalë me votuar sepse ne sot vendosim për të ardhmen, për katër vitet e ardhshme”, u shpreh Hamza.

Hamza falënderoi mediat për prezencën dhe uroi një proces të qetë zgjedhor.

Kandidati për kryeministër të Kosovës nga Aleanca, Ardian Gjini ka ushtruar të drejtën e votës në qendrën më të madhe të votimit në komunën e Gjakovës, në shkollën Fehmi Agani.

Ai ftoi të gjithë qytetarët që të votojnë, duke theksuar se Kosova është e qytetarëve dhe ata duhet ta thonë fjalën e tyre sot, transmeton albinfo.ch.

“Sot është një ditë e mirë. Ftoj qytetarët me dalë me votu, me marrë Kosovën në duart e veta. Kosova është e qytetarëve dhe ata duhet ta thonë fjalën e vet sot. Urime të gjithëve për këto zgjedhje, me sjellje më të mira për Kosovën”, tha ai.

Të drejtë vote në komunën e Gjakovës kanë mbi 118 mijë qytetarë, të cilët mund të votojnë në 36 vendvotime të rregullta dhe një vendvotim me kusht.

Ndërkaq, shkolla fillore “Fehmi Agani” ka mbi 9,800 qytetarë të regjistruar për të votuar.

Kandidati për kryeministër nga Lëvizja Vetëvendosje, Albin Kurti, pasi ushtroi të drejtën e votës në objektin e Fakultetit Juridik të Universitetit të Prishtinës, u bëri thirrje qytetarëve që të marrin pjesë në procesin zgjedhor, duke theksuar rëndësinë e pjesëmarrjes në zgjedhje.

“Sot vendosin ata që votojnë, prandaj edhe u bëj thirrje qytetarëve të Republikës së Kosovës që ta ushtrojnë të drejtën e tyre demokratike, ta përdorin mundësinë qytetare të përcaktohen për përbërjen e ardhshme të Kuvendit të Republikës në legjislaturën e 11-të”, deklaroi Kurti.

Ai tha se para se të nisej për në vendvotim, kishte verifikuar në ueb-faqen e Komisionit Qendror të Zgjedhjeve vendvotimin e tij dhe u sugjeroi qytetarëve që të bëjnë të njëjtën gjë, transmeton albinfo.ch.

“Sa më e lartë të jetë dalja e qytetarëve në zgjedhje, aq më i madh është legjitimiteti i institucioneve dhe aq më solid stabiliteti i tyre”, u shpreh Kurti.

Ai e cilësoi ditën e zgjedhjeve si të rëndësishme për institucionet e Republikës së Kosovës, për qeverisjen në vazhdim dhe për mbarëvajtjen e vendit.

3.04 për qind e votuesve me të drejtë vote kanë votuar të dielën deri në orën 9:00.

Nga 2,429 vendvotimet e procesuara, Komisioni Qendror i Zgjedhjeve njoftoi në përditësimin e fundit se kanë votuar gjithsej 59,593 qytetarë, transmeton albinfo.ch.

Krahasuar me zgjedhjet e 28 dhjetorit 2025 në të njëjtën periudhë, vërehet se këtë herë kanë votuar një numër pak më i lartë. 2.68% ishte dalja e qytetarëve atëkohë.

Nga ora 7 e mëngjesit janë hapur vendvotimet në qendrat zgjedhore në komunat e Kosovës.

Të drejtë vote në këto zgjedhje kanë 2.092.174 qytetarë.

Një ditë para fillimit të votimit, Komisioni Qendror i Zgjedhjeve bëri të ditur se janë zhvilluar të gjitha përgatitjet e nevojshme për mbarëvajtjen e procesit, transmeton albinfo.ch.

Përveç qendrave të rregullta të votimit, në secilën komunë do të ketë nga një qendër për votim me kusht.

Sipas KQZ-së, procesi zgjedhor do të zhvillohet në 949 qendra të votimit në 2550 vendvotime.

Në Kosovë sot zhvillohen zgjedhjet e jashtëzakonshme parlamentare, të tretat me radhë brenda 16 muajve.

Komisioni Qendror i Zgjedhjeve tashmë ka bërë të ditur se në garë zgjedhore janë 23 parti politike dhe tri koalicione parazgjedhore.

Sipas listës së votuesve të miratuar nga KQZ, të drejtë vote kanë pak mbi dy milionë qytetarë, përfshirë edhe ata që jetojnë jashtë Kosovës.

Procesi zgjedhor brenda vendit do të zhvillohet në 949 qendra votimi, me gjithsej 2,550 pika votimi, prej të cilave 911 qendra me 2,498 pika votimi për votimin e rregullt dhe 38 qendra, nga një për çdo komunë, me 52 vendvotime për të mundësuar votimin me kusht.

Në zgjedhjet e fundit të 28.12.2025, rreth 900 mijë qytetarë morën pjesë në zgjedhje apo rreth 45% e trupës elektorale.

Për ditën e zgjedhjeve, autoritet e policisë dhe organet e drejtësisë, tashmë kanë bërë të gjitha përgatitjet që procesi zgjedhor të zhvillohet normalisht.

Po ashtu si njofton prokuroria e shtetit, rreth 100 prokurorë dhe zyrtarë të sistemit prokurorial do të jenë të angazhuar në gjithë territorin e Kosovës për të garantuar mbrojtjen e votës së lirë dhe integritetin e procesit zgjedhor në zgjedhjet e parakohshme për Kuvendin e Kosovës.

Edhe kësaj here, zgjedhjet do të vëzhgohen nga mijëra vëzhgues vendorë, por do të ketë pak vëzhgues ndërkombëtarë. Kjo për faktin që, sipas zyrtarëve të BE-së, për shkak të kohës së shkurtër nuk do të jetë në gjendje të dërgojë një mision vëzhgues për zgjedhjet e parakohshme parlamentare.