Archives

Austria nga alarmin për rrezik nga zjarret në pyje në disa rajone

Posted on by albinfo.ch

Ministria e Bujqësisë në Austri ka paralajmëruar për rrezik të shtuar nga zjarret në pyje, pavarësisht reshjeve të fundit, duke theksuar se disa rajone, veçanërisht në Austrinë e Poshtme, mbeten shumë të ndjeshme, shkruan ORF, transmeton albinfo.ch.

Autoritetet lokale kanë vendosur rregullore të rrepta që ndalojnë ndezjen e zjarreve dhe pirjen e duhanit në dhe pranë pyjeve në shumë qarqe të Burgenlandit, Austrisë së Poshtme, Austrisë së Epërme, Tirolit dhe Steiermarkut. Këto masa synojnë të mbrojnë njerëzit, kafshët dhe natyrën.

Sipas statistikave zyrtare, nga janari deri në fund të korrikut janë regjistruar rreth 160 zjarre pyjore që kanë djegur gjithsej 56 hektarë. Ministri Norbert Totschnig (ÖVP) apeloi për sjellje të përgjegjshme, duke kujtuar se mbi 80% e zjarreve shkaktohen nga njerëzit. Ai kërkoi zbatimin e pesë rregullave të sjelljes për parandalimin e fatkeqësive.

Ligji i Pyjeve ndalon hedhjen e objekteve të ndezura, ndezjen e zjarreve pa leje, barbekytë dhe prushin e hedhur në pyll, si dhe përdorimin e fishekzjarrëve pranë zonave pyjore. Shkelësit rrezikojnë gjoba deri në 7,270 euro ose deri në katër javë burgim. Në rast zjarri, qytetarët duhet të njoftojnë menjëherë zjarrfikësit në numrin emergjent 122.

Zvicra nën presion tarifor nga SHBA, por qytetarët kundërshtojnë lëshimet

Posted on by albinfo.ch

Shumica e qytetarëve zviceranë janë kundër ofrimit të lëshimeve ndaj Shteteve të Bashkuara në mosmarrëveshjen aktuale për tarifat e importit, pavarësisht rrezikut që këto masa paraqesin për ekonominë vendase. Kështu tregon një sondazh i publikuar të mërkurën nga instituti kërkimor YouGov, shkruan Swissinfo, transmeton albinfo.ch.

Tarifa e re prej 39% e vendosur nga SHBA për shumicën e mallrave zvicerane ka gjasa të dëmtojë ndjeshëm ekonominë zvicerane, por kjo nuk ka ndikuar në qëndrimin e qytetarëve. Sipas sondazhit, rreth dy të tretat e të anketuarve besojnë se Zvicra nuk duhet të lejojë veten të vihet nën presion diplomatik, edhe nëse kjo nënkupton përballimin e tarifave të larta. Vetëm një e katërta e pjesëmarrësve janë në favor të lëshimeve për të shmangur tarifat.

Ndërkohë, 66% e të anketuarve presin që tarifat e reja të kenë ndikim negativ në ekonominë zvicerane, ndërsa vetëm 5% besojnë se dëmet do të jenë të vogla ose të papërfillshme.

Gjysma e pjesëmarrësve në sondazh shprehen se Zvicra duhet të përqendrohet më shumë në prodhimin dhe konsumimin e produkteve vendase në të ardhmen, edhe pse kjo mund të çojë në rritje të çmimeve. Për më tepër, 41% janë kundër investimeve të mëdha nga kompanitë zvicerane në SHBA, ndërsa vetëm 15% i mbështesin ato.

Sipas YouGov, ekziston një konsensus i gjerë në të gjithë spektrin politik për mënyrën se si Zvicra duhet të reagojë ndaj tarifës së re. Megjithatë, një përjashtim është qëndrimi ndaj Bashkimit Evropian: mbi gjysma e të anketuarve janë në favor të një bashkëpunimi më të ngushtë me BE-në, ndërsa mbështetësit e Partisë Popullore Zvicerane shprehen qartësisht kundër kësaj ideje.

Sondazhi është zhvilluar nga 5 deri më 11 gusht dhe ka përfshirë 1,260 persona nga e gjithë Zvicra, transmeton albinfo.ch.

Zvicër: Më shumë se një fëmijë në ditë preket nga aksidentet rrugore gjatë rrugës për në shkollë

Posted on by albinfo.ch

Në vitin 2024, në Zvicër janë regjistruar 455 aksidente rrugore që përfshinin fëmijë gjatë rrugës për në shkollë, mesatarisht më shumë se një fëmijë në ditë. Për ta adresuar këtë problem, Touring Club Switzerland (TCS) ka nisur një fushatë kombëtare me sloganin “Vëzhgo, Ngadalëso, Ndalo”, e drejtuar kryesisht drejt përdoruesve të rrugës, shkruan RTS, transmeton albinfo.ch.

Jordan Girod, zëdhënës i TCS, theksoi se shkaktarët kryesorë janë mungesa e vëmendjes dhe mosdhënia e përparësisë, sidomos në kalimet për këmbësorë. Slogani i ri nënvizon rëndësinë e vigjilencës, uljes së shpejtësisë dhe ndalimit për t’i lejuar fëmijët të kalojnë në siguri.

Fushata zhvillohet në bashkëpunim me policinë, komunat, shkollat dhe prindërit. Përveç materialeve informuese, do të shpërndahen sprej dhe aromatizues ajri për automjete si kujtesë nuhatëse për mesazhin e fushatës. Prindërve do t’u jepen figura të personalizuara të krijuara nga vetë fëmijët, për t’i vendosur në makina.

Risi e kësaj fushate është njoftimi përmes WhatsApp-it ose aplikacionit TCS, ku përdoruesit do të marrin kujtesa të personalizuara për praninë e fëmijëve në rrugë sipas rajonit. TCS kujton se edhe fushatat e mëparshme, si “Ndalo, Shiko, Dëgjo, Kalo”, kanë ndikuar në rritjen e ndërgjegjësimit, por numri i aksidenteve mbetet i lartë.

Bazel: Dy ndërtesa të reja me banesa të përballueshme

Posted on by albinfo.ch

Në Bazel, në zonën mes Lehenmattstrasse, Stadionstrasse, Birsstrasse dhe Muttenzerweg, është planifikuar ndërtimi i dy ndërtesave të reja banimi, njëra me shtatë kate dhe tjetra me gjashtë kate, me lartësi maksimale muri 26 dhe 23 metra, shkruan Blick, transmeton albinfo.ch.

Të paktën një e treta e sipërfaqes së përgjithshme të dyshemesë do të dedikohet për banesa të përballueshme. Projekti synon të krijojë hapësira për rreth 600 banorë dhe 150 vende pune.

Vendndodhja, pranë lumit Birs, është pronë e kompanisë teknologjike Haefely AG, e themeluar më 1904, dhe e investitorit Creafonds nga Lucerna. Haefely planifikon ta zhvendosë selinë e saj brenda Bazelit.

Plani përfshin ruajtjen e dy ndërtesave ekzistuese dhe ndërtimin e strukturave të reja me të njëjtën lartësi, duke krijuar kalime që lidhin zonën me lumin. Rishikimi publik i projektit dhe ndryshimet në planin e zonimit do të jenë të hapura deri më 12 shtator.

Valais ndalon ndezjen e zjarreve në natyrë, për shkak të temperaturave të larta dhe rrezikut

Posted on by albinfo.ch

Kantoni i Valais është bërë i pari në Zvicër që ka vendosur ndalim të plotë të ndezjes së zjarreve në natyrë në pjesë të mëdha të territorit të tij, për shkak të temperaturave të larta dhe thatësirës që kanë rritur rrezikun e zjarreve në pyje, shkruan RTS, transmeton albinfo.ch.

Sipas Zyrës Federale për Mjedisin, rreziku i zjarreve në pyje është i konsiderueshëm deri shumë i lartë në kantonet Valais, Ticino dhe Graubünden. Niveli ” shumë i lartë ” është kategoria më e lartë e përcaktuar nga autoritetet federale.

Në Valais, ndalimi i zjarrit është vendosur nga 11 gushti dhe vlen për zonat ku rreziku është i lartë ose shumë i lartë. Ky ndalim përfshin pyjet dhe hapësirat pranë tyre. Situata e rrezikut do të rivlerësohet çdo javë nga autoritetet kantonale.

Jean-Christophe Clivaz, nga Departamenti i Pyjeve, Natyrës dhe Peizazhit në Valais, tha se disa komuna tashmë kanë marrë masa të ngjashme dhe paralajmëroi se rreziku mund të rritet në ditët dhe javët e ardhshme. Ai theksoi se pas zjarreve të fundit në Bitche, Visp dhe Leuk, banorët janë më të vetëdijshëm dhe po respektojnë rregullat e sjelljes.

Ndërkohë, në kantonet e tjera, si Graubünden dhe Ticino, autoritetet ende nuk kanë vendosur ndalim të plotë, por po monitorojnë situatën çdo ditë. Rregulloret ligjore për ndalimin e zjarrit ndryshojnë nga kantoni në kanton, ndërsa në disa raste përgjegjësia mbetet te komunat, transmeton albinfo.ch.

Transporti publik falas në Gjenevë, kjo është arsyeja

Posted on by albinfo.ch

Transporti publik në kantonin e Gjenevës do të jetë falas të mërkurën për shkak të rritjes së konsiderueshme të ndotjes nga ozoni, raporton albinfo.ch.

Departamenti i Territorit i Gjenevës njoftoi se vendimi u mor pasi niveli i ozonit në stacionin matës të Meyrin tejkaloi pragun prej 180 mikrogramë/m³, duke arritur afër 230 mikrogramë/m³.

Masat e vendosura

Transport publik falas për të gjithë përdoruesit.

Aktivizimi i sistemit të qarkullimit të diferencuar: nga ora 06:00 deri në 22:00, në qendër të qytetit lejohen vetëm automjetet me afishet Stick’AIR 0, 1, 2 dhe 3.

Automjetet më ndotëse do të ndalohen dhe shkelësit rrezikojnë gjobë.

Në rrugën anashkaluese të qytetit, shpejtësia kufizohet në 80 km/orë.

Qëllimi i masave
Drejtoresha e Shërbimit Ajror Kantonal, Aline Staub Spörri, tha se masat synojnë uljen e emetimeve të dioksidit të azotit me 20-25%, duke mbrojtur shëndetin publik. Ekspozimi i lartë ndaj ozonit mund të shkaktojë dhimbje koke, sulme astme dhe probleme në frymëmarrje, veçanërisht tek fëmijët, të moshuarit dhe personat me sëmundje kardiopulmonare.

Autoritetet paralajmëruan se kufizimet mund të zbatohen sërish në ditët në vijim, varësisht nga zhvillimi i situatës së ndotjes.

Raporti i DASH: Liria e shprehjes së medias e kufizuara në Ballkanin Perëndimor

Posted on by albinfo.ch

Departamenti amerikan i Shtetit, në raportin e tij të fundit për të drejtat e njeriut, vlerëson se në vendet e Ballkanit Perëndimor vijojnë kufizimet e lirisë së shprehjes dhe të medias, si dhe problemet me mosndëshkimin e krimeve të luftës, raporton albinfo.ch.

Kosova
Raporti kritikon mungesën e hapave të qëndrueshëm për identifikimin, hetimin dhe ndëshkimin e zyrtarëve të përfshirë në shkelje të të drejtave të njeriut. Përmendet gjithashtu se Asociacioni i Gazetarëve të Kosovës është përballur me shpifje, kërcënime, sulme dhe presione që kanë çuar shpesh në vetëcensurë.

Shqipëria
Theksohet ndikimi i qeverisë, partive politike dhe grupeve kriminale mbi mediat, ku presioni, korrupsioni dhe autocensura mbeten probleme madhore.

Bosnja dhe Hercegovina
Presidenti i Republikës Sërpska, Millorad Dodik, kritikohet për sulme verbale dhe juridike që, sipas raportit, kanë minuar rendin kushtetues dhe kanë shtuar tensionet ndëretnike.

Serbia
Vihen re kufizime serioze të lirisë së shprehjes dhe medias, dhunë ndaj gazetarëve, autocensurë dhe mungesë transparence në pronësinë e mediave.

Mali i Zi
Raporti përmend raste të torturës dhe presione të vazhdueshme ndaj mediave kritike.

Maqedonia e Veriut
Theksohet rreziku nga paditë strategjike (SLAPP), presionet politike dhe sulmet ndaj gazetarëve që hetojnë korrupsionin dhe gjuhën e urrejtjes.

DASH vëren se kritikat ndaj disa vendeve partnere të afërta të administratës Trump janë zbutur, ndërsa janë shtuar referencat për kufizime të fjalës politike edhe në disa aleatë të SHBA-së në Evropë, si Britania e Madhe, Franca dhe Gjermania.

ZRRE: Nga 16 gushti ndërpritet rryma për bizneset pa kontrata në tregun e lirë

Posted on by albinfo.ch

Zyra e Rregullatorit për Energji (ZRRE) ka bërë të ditur se nga 16 gusht 2025 do të ndërpritet furnizimi me energji elektrike për të gjithë konsumatorët komercialë që nuk kanë lidhur kontratë me një furnizues të licencuar në tregun e lirë, raporton albinfo.ch.

Ky vendim bazohet në aktgjykimin e Shkallës së Dytë të Gjykatës Komerciale, e cila ka refuzuar kërkesën për shtyrjen e liberalizimit të tregut. ZRRE thekson se procesi është zhvilluar në përputhje me ligjin, në mënyrë transparente dhe të paanshme, ndërsa ligjshmëria e tij është konfirmuar nga gjykatat kompetente.

Institucioni u bën thirrje të gjithë bizneseve që ende nuk kanë lidhur kontratë furnizimi të zgjedhin sa më shpejt një nga furnizuesit e licencuar të publikuar në faqen e tyre zyrtare, për të shmangur ndërprerjen nga rrjeti energjetik.

Në mars të këtij viti, ZRRE shpalli hapjen e tregut të energjisë për bizneset e mëdha, duke prekur mbi 1000 kompani private. Edhe pse Gjykata Komerciale e kishte anuluar fillimisht vendimin, tani Shkalla e Dytë ka konfirmuar vlefshmërinë e procesit, duke hapur rrugën për zbatimin e plotë të liberalizimit në Kosovë.

UEFA gjobit Lech Poznanin për banerin “Kosova është Serbi”

Posted on by albinfo.ch

UEFA ka gjobitur klubin polak Lech Poznan me 10 mijë euro për shfaqjen e një baneri me përmbajtje politike gjatë ndeshjes kualifikuese të Ligës së Kampionëve kundër Cërvena Zvezdës, raporton albinfo.ch.

Në ndeshjen e fazës së tretë kualifikuese, tifozët e Lech Poznanit vendosën një baner të madh me mbishkrimin “Kosova është Serbi”, gjë që përbën shkelje të rregullave të UEFA-s për ndalimin e mesazheve politike në stadiume.

Përveç kësaj, klubi është ndëshkuar edhe për disa shkelje të tjera të rregullave disiplinore, por gjoba për banerin ka qenë më e theksuara në vendimin e UEFA-s. Institucioni ka theksuar se do të vazhdojë të zbatojë rreptësisht rregulloret për të parandaluar përdorimin e ndeshjeve të futbollit për mesazhe politike.

VV-ja mbron emërimin e Hysenit në ATK

Posted on by albinfo.ch

Lëvizja Vetëvendosje ka reaguar pas kritikave të ngritura për emërimin e Mentor Hysenit, anëtar i kësaj partie, në postin e drejtorit të Administratës Tatimore të Kosovës (ATK). Në një përgjigje për KOHËN, VV-ja ka theksuar se është kundër çdo emërimi me motiv partiak apo personal që nuk bazohet në profesionalizëm dhe integritet, raporton albinfo.ch.

“Lëvizja VETËVENDOSJE! kurrë nuk ka kritikuar profesionistët, qoftë edhe nga partitë e tjera. Ne kemi qenë dhe jemi kundër emërimeve me motiv partiak e personal pa bazë profesionale e të integritetit”, thuhet në reagimin e partisë, ku theksohet se përfaqësuesit e saj në institucione kanë promovuar edhe zyrtarë që nuk ndajnë bindje të njëjta politike me ta.

Ministria e Financave ka konfirmuar emërimin e Mentor Hysenit si drejtor të ri të Administratës Tatimore të Kosovës, duke theksuar se procesi i rekrutimit është zhvilluar në mënyrë transparente dhe profesionale. Megjithatë, fakti që Hyseni në vitin 2019 ishte prezantuar si anëtar i Lëvizjes Vetëvendosje ka nxitur reagime nga shoqëria civile dhe partitë opozitare, të cilat kanë ngritur pikëpyetje mbi ndikimin e mundshëm politik në këtë përzgjedhje.

Nga ana e saj, Vetëvendosje e ka cilësuar Hysenin si profesionist të fushës së financave dhe sektorit publik, duke theksuar se përzgjedhja është bërë nga institucionet kompetente dhe se lidhja me subjektin politik nuk përbën kriter për emërim në pozita publike. Partia ka shtuar se shumë profesionistë kanë bashkëpunuar ose janë anëtarësuar në Lëvizje, por janë angazhuar vetëm në aspektin profesional dhe jo organizativ.

Vjedhje me thyerje në Rüti ZH: Arrestohet një kosovar

Posted on by albinfo.ch

Policia e Kantonit të Cyrihut ka arrestuar një burrë herët të martën në mëngjes në Rüti, i cili më parë kishte hyrë me forcë në një apartament në një pallat apartamentesh.

Sipas Policisë së Kantonit të Cyrihut, rreth orës 03:40 të mëngjesit, një banor raportoi përmes numrit të emergjencës 117 se kishte dëgjuar zhurma të dyshimta që vinin nga një apartament fqinj, megjithëse fqinjët ishin me pushime, transmeton albinfo.ch. Disa patrulla të Policisë së Kantonit të Cyrihut u nisën menjëherë për në vendin e ngjarjes.

Ndërsa policët iu afruan ndërtesës, dy persona u larguan me vrap.

Policia arriti ta kapë dhe ta arrestojë një person që po ikte në këmbë. Gjatë arratisjes ai kishte hedhur mjete tipike për vjedhje, shkruan Zürich24. Hetimet fillestare zbuluan se në apartamentin e raportuar kishte ndodhur një vjedhje.

Hetimet për rrethanat e sakta të incidentit po vazhdojnë. Specialistët nga Instituti i Mjekësisë Ligjore i Cyrihut (FOR) siguruan prova në vendngjarje. I arrestuari, një 41-vjeçar kosovar, do t’i referohet Prokurorisë Publike nën dyshimin për vjedhje me thyerje.

Kërkimi për të arratisurin e dytë po vazhdon. Është sekuestruar mjeti i dyshuar i përdorur për vjedhje me thyerje.

Anëtari i VV-së emërohet drejtor i ATK-së

Posted on by Drin Reçica

Zyrtarisht, Mentor Hyseni është zgjedhur drejtor i ri i Administratës Tatimore të Kosovës, ka njoftuar Ministria e Financave, përcjell albinfo.ch.

“Ministria e Financave, Punës dhe Transfereve njofton se pas përmbylljes së procedurës së rekrutimit dhe në përputhje me kërkesat dhe kriteret ligjore, është përzgjedhur dhe emëruar drejtor i ri i Administratës Tatimore të Kosovës, z. Mentor Hyseni. Procesi është zhvilluar në mënyrë transparente dhe profesionale, duke u siguruar që kandidati i përzgjedhur të plotësojë të gjitha kushtet e nevojshme për këtë pozitë me rëndësi të lartë. MFPT ka besim të plotë se z. Hyseni do të vazhdojë dhe avancojë punën e mirë që është bërë deri më tani, në shërbim të një administrate moderne, transparente dhe të drejtë”, thuhet në njoftimin e Ministrisë.

Në vitin 2019, Mentor Hyseni u prezantua si anëtar i ri i Lëvizjes Vetëvendosje.

Më herët, Hyseni ka qenë edhe kryesues i Bordit të Drejtorëve në Agjencinë Kosovare të Privatizimit.

Kosovë: Për pak ditë 633 zjarre, 23 të arrestuar për zjarrvënie

Posted on by Drin Reçica

Ditëve të fundit janë raportuar 633 zjarre në gjithë territorin e Kosovës, ndërsa aktualisht janë nëntë vatra aktive, bëri të ditur Agjencia për Menaxhim të Emergjencave (AME) në konferencë të përbashkët për media me Policinë e Kosovës, përcjell albinfo.ch.

Drejtori i AME-së, Genc Metaj, tha se shumica e zjarreve janë lokalizuar falë angazhimit të institucioneve, përfshirë edhe me ndihmën e KFOR-it në Kçiq të Vogël dhe Kamenicë.

Ai bëri thirrje për kujdes dhe paralajmëroi ndëshkime për çdo neglizhencë.

“Vendi po përballet me zjarre të shumta. AME-ja në koordinim me Policinë dhe Ministrinë e Punëve të Brendshme është duke u angazhuar maksimalisht për të parandaluar 633 zjarre që janë raportuar gjatë ditëve të fundit. Falë angazhimit, zjarret kanë arritur të lokalizohen. Kemi pasur intervenim të KFOR në Kçiq të Vogël dhe në Kamenicë. Nëntë vatra aktive i kemi aktualisht. Gjendja aktuale në vend është stabile, por e brishtë për shkak të thatësirave dhe zjarrvënieve të qëllimshme. Ndalohen të gjitha format e zjarreve në ambiente të hapura të vendit. Çdo neglizhencë do të trajtohet seriozisht dhe do të pasojë me dënime ligjore. U apelojmë qytetarëve të angazhohen dhe të marrin veprimet parandaluese. Bashkëpunimi ndërinstitucional është në nivel të duhur. Sfidë është menaxhimi nga qytetarët”, tha Metaj.

Ndërsa, drejtori i Divizioni të komunikacionit rrugor në Policinë e Kosovës, Jeton Rexhepi, bëri të ditur se janë arrestuar 23 persona dhe kanë trajtuar 193 raste që lidhen me zjarrvënie.

Ai kërkoi nga qytetarët të shmangin çdo veprim që mund të shkaktojë zjarre, sidomos për shkak të temperaturave të larta.

“Policia e Kosovës në bashkëpunim me AME-në po punon me kapacitet të plotë për të parandaluar zjarret dhe pasojat, qoftë tek njerëzit, qoftë në vendbanime. Policia në kuadër të bashkëpunimeve iu ka përgjigj të gjithave rasteve të raportuara. Janë arrestuar 23 persona dhe trajtuar 193 raste që kanë të bëjnë me shkaktimin e zjarreve. Apelojmë që të kenë kujdes që nga pakujdesia mos të shkaktohet zjarri. Nga temperaturat e larta mundësitë janë më të mëdha për zjarr. U apeloj qytetarëve të kenë kujdes që të kemi më pak zjarre dhe të kemi më shume siguri për banorët”, tha Rexhepi./EO

Gjykata jep detaje: Vrasja në Baicë s’u krye vetëm nga një person

Posted on by Drin Reçica

T.K. dyshohet se nuk e ka kryer i vetëm vrasjen e Enver Bajraktarit në Baicë të Lipjanit, përcjell albinfo.ch.

Në një njoftim për media, Gjykata ka dhënë detaje për rastin në të cilin T.K. ka pranuar fajin. Aty thuhet se ekziston dyshimi i bazuar se i pandehuri ka kryer veprën në bashkëkryerje me persona ende të paidentifikuar deri më tani.

“Ekziston dyshimi i bazuar se i pandehuri T.K. mes datës 03.08.2025 ora 16:00 dhe datës 04.08.2025 rreth orës 12:10, në fshatin Baicë, Komuna e Lipjanit, për shkak te mosmarrëveshjeve paraprake mes vete, me dashje e në bashkëkryerje edhe me persona ende të paidentifikuar deri më tani, në mënyrë dinake dhe mizore privojnë nga jeta tani të ndjerin E.B., në atë mënyrë që i ndjeri E. me datën 03.8.2025 rreth orës 16:00 kishte dal nga shtëpia duke e dërguar gjedhen e tij për kullos në livadhet e fshatit dhe aty i njëjti fillimisht goditet me mjete të forta në kokë dhe trup, më pas ngulfatet dhe trupi i tij tërhiqet zvarrë për disa metra duke kaluar përmes një arre të mbjellë me misër dhe aty fillimisht hiqen disa rrënje misri, gërmohet një gropë me thellësi mbi 1m, më pas brenda saj vendoset trupi i pajetë i të ndjerit, e sipër të cilit vendosen dërrasa dhe më pas gropa mbulohet me dhe, kurse aty rivendosen rrënjët e misrit. Më pas me datën 04.8.2025 rreth orës 12:10 familjarët e viktimës duke bërë kërkime nëpër zona të fshatit arrijnë ta gjejnë viktimën e varrosur pa shenja jete, me çka në bashkëkryerje kanë kryer veprën penale Vrasje e Rëndë”, thuhet në njoftim.

Sot Gjykata vendosi për masën e paraburgimit prej një muaji ndaj të pandehurit.

Zjarr i madh në Winterthur, ndërpritet trafiku hekurudhor

Posted on by Drin Reçica

Një zjarr i madh shpërtheu të mërkurën pasdite në lagjen Grüze të Winterthurit, duke përfshirë plotësisht një garazh makinash pranë kompanisë publike të shërbimeve Winterthur, transmeton albinfo.ch.

Flakët dhe tymi i dendur që ngrihej nga ndërtesa ishin të dukshme nga larg, siç tregojnë fotot dhe videot e publikuara nga dëshmitarë okularë. Pamjet tregojnë zjarrin që del nga tavani, ndërsa re të mëdha tymi përhapen mbi zonë.

Shërbimi zjarrfikës është në vendngjarje me shumë njësi emergjente, ndërkohë që trafiku hekurudhor në zonë është ndërprerë për shkak të afërsisë me linjat hekurudhore.

Nuk dihet ende nëse ka të lënduar apo çfarë e shkaktoi zjarrin. Autoritetet janë duke hetuar ngjarjen, shkruan 20 minute. https://www.20min.ch/story/winterthur-grosser-brand-ausgebrochen-feuerwehr-vor-ort-103397467

Zvicra drejt energjisë bërthamore: Këshilli Federal mbështet ndërtimin e centraleve të reja

Posted on by Drin Reçica

Qeveria federale zvicerane ka dhënë dritën jeshile për ndërtimin e centraleve të reja bërthamore, duke bërë një hap të madh në drejtim të ndryshimeve në politikën energjetike të vendit, përcjell albinfo.ch.

Të mërkurën, Këshilli Federal konfirmoi zyrtarisht kundërpropozimin indirekt ndaj të ashtuquajturës “Iniciativa e Errësimit”, duke propozuar heqjen e ndalimit ligjor për ndërtimin e centraleve të reja bërthamore, i cili është në fuqi që nga viti 2018, si pjesë e Strategjisë së Energjisë 2050, shkruan 20 minute.

Ministri i Mjedisit, Albert Rösti, i njohur për qëndrimin e tij pro energjisë bërthamore, ka mbështetur këtë vendim për muaj me radhë. Tani, me konfirmimin nga Këshilli Federal, kjo mbështetje është zyrtarizuar.

Kundërpropozimi nuk kërkon ndryshim kushtetues, siç kërkon iniciativa origjinale, por vepron në nivelin e ligjit, gjë që mund të përshpejtojë procesin e miratimit dhe zbatimit.

Ky zhvillim shënon një kthesë të rëndësishme në politikën energjetike të Zvicrës, në një kohë kur vendi përballet me sfida të mëdha për garantimin e furnizimit të qëndrueshëm dhe të sigurt me energji në të ardhmen.

Po voziste 231 km/orë: Policia ndalon 18-vjeçarin në A7 drejt Cyrihut

Posted on by Drin Reçica

Raportohet se një 18-vjeçar italian është ndaluar nga policia kantonale e Thurgaut, pasi u kap duke udhëtuar me 231 km/orë në autostradën A7, në drejtim të Cyrihut. Ngjarja ka ndodhur të shtunën herët në mëngjes, rreth orës 03:45, përcjell albinfo.ch.

Radari i policisë regjistroi shpejtësinë ekstreme të mjetit pranë zonës së Frauenfeldit. Pas zbritjes së kufirit të tolerancës teknike, rezultoi se drejtuesi e kishte tejkaluar me 106 km/orë kufirin e lejuar prej 120 km/orë.

Si pasojë, i riu humbi menjëherë lejen e drejtimit, e cila iu konfiskua nga autoritetet. Policia ka konfirmuar se rasti është dërguar në prokurori, ku 18-vjeçari do të përballet me akuza për shkelje të rënda të rregullave të trafikut.

Ngjarja konsiderohet si një rast klasik i “Raserei”, një term që në Zvicër i referohet ngarjes me shpejtësi ekstreme dhe të rrezikshme, e cila trajtohet si vepër penale me pasoja serioze, shkruan 20 Minuten.

https://www.20min.ch/story/frauenfeld-mit-231-kmh-richtung-zuerich-gerast-polizei-stoppt-18-jaehrigen-103397445

Zvicra drejt kartëmonedhave të reja, publikohen 12 dizajnet, hapet konsultimi publik

Posted on by Drin Reçica

Banka Kombëtare Zvicerane (SNB) ka zbuluar 12 dizajnet e para për serinë e re të kartëmonedhave me temën “Zvicra dhe lartësitë e saj të mëdha”. Tani, publiku zviceran ka mundësinë të japë mendimin e tij përmes një ankete që do të zgjasë deri më 7 shtator 2025, ndërsa një bord këshillimor i ekspertëve do të bëjë vlerësimin profesional të tyre, transmeton albinfo.ch.

Gjashtë dizajnet më të vlerësuara do të kalojnë në fazën e dytë të konkursit, ndërsa fituesi do të shpallet në fillim të vitit 2026. Kartëmonedhat e reja nuk priten të futen në qarkullim para fillimit të viteve 2030.

Dizajnet përfshijnë tema si: mjediset e jetesës, topografia dhe identiteti kombëtar, inovacioni dhe tradita, ndryshimet klimatike, flora dhe fauna, si dhe kontributet kulturore dhe shkencore nga rajone të ndryshme të Zvicrës. Çdo koncept sjell një qasje unike, që kombinon elemente vizuale moderne me vlera të thella historike dhe kulturore, shkruan Blick.

Ky projekt synon të reflektojë diversitetin natyror, kulturor dhe teknologjik të Zvicrës, duke ruajtur sigurinë dhe estetiken në dizajnin e kartëmonedhave të së ardhmes.

Secili koncept sjell një qasje unike, duke reflektuar diversitetin natyror, kulturor dhe teknologjik të Zvicrës:

Koncepti A paraqet mjediset e jetesës dhe lidhjen mes njeriut, natyrës dhe ushqimit.

Koncepti B kombinon dritën, topografinë dhe temat kombëtare si uji, kërkimi dhe vizioni.

Koncepti C fokusohet në identitetin kombëtar përmes gjeologjisë dhe jetës sociale.

Koncepti D thekson përparimin përmes peizazheve malore dhe kontributeve inovative.

Koncepti E ndërlidh habitate natyrore me krijimtari njerëzore dhe trashëgimi rajonale.

Koncepti F shtjellon ndryshimin dhe qëndrueshmërinë në një narrativë të vazhdueshme.

Koncepti G vendos në dialog inovacionin shkencor dhe traditat tipike zvicerane.

Koncepti H përdor gurin dhe peizazhet për të simbolizuar qëndrueshmërinë dhe identitetin.

Koncepti I përshkruan një udhëtim vizual nëpër Zvicër, nga ultësirat te majat alpine.

Koncepti J kombinon bimësinë vendase me arritjet kulturore dhe teknologjike.

Koncepti K kap “shpirtin e vendit” përmes peizazheve dhe ndjesive simbolike.

Koncepti L e përshkruan Zvicrën si një ekosistem të gjallë në ndërveprim të vazhdueshëm.

Pas përfundimit të anketës publike dhe vlerësimit nga bordi këshillimor i ekspertëve, gjashtë dizajnet më të vlerësuara do të kalojnë në fazën finale të konkursit. Fituesi do të shpallet në fillim të vitit 2026, ndërsa kartëmonedhat e reja pritet të hyjnë në qarkullim në fillim të viteve 2030. /Albinfo.ch

Korriku, muaji më i suksesshëm ndonjëherë për Aeroportin Ndërkombëtar të Prishtinës

Posted on by Drin Reçica
Aeroporti Ndërkombëtar i Prishtinës “Adem Jashari” ka shënuar një tjetër rekord historik. Vetëm gjatë muajit korrik 2025, aeroporti u shfrytëzua nga plot 458,348 pasagjerë, duke e bërë atë muajin më të suksesshëm ndonjëherë në historinë e aeroportit, transmeton albinfo.ch.
Krahasuar me korrikun e vitit 2024, ka pasur një rritje prej 9.24% në numrin e pasagjerëve, ndërsa numri i fluturimeve u rrit për 8.11%, duke arritur në 3,298 fluturime për dhe nga Prishtina (krahasuar me 2,958 fluturime dhe 419,578 pasagjerë në korrik 2024).
“Duke fluturuar drejt horizonteve më të larta!”,  ky është mesazhi që shoqëron statistikat e publikuara në faqen zyrtare të Aeroportit në rrjetet sociale, që pasqyrojnë një trend të qëndrueshëm të rritjes.
Rekordi i korrikut nuk është rastësor,  ai vjen si vazhdimësi e një performance të jashtëzakonshme që ka karakterizuar çdo muaj të vitit 2025. Që nga janari, Aeroporti ka parë rritje të ndjeshme krahasuar me të njëjtët muaj të vitit paraprak:
Janari: +19.8%
Shkurti: +16%
Marsi: +11%
Prilli: +22%
Maji: +13%
Qershori: +17%
Ky ritëm i rritjes e ka pozicionuar Aeroportin e Prishtinës si një nga më të shpejtë-rritësit në Evropë. Sipas një raporti të fundit nga ACI Europe, Aeroporti i Prishtinës renditet i katërti në listën e aeroporteve me rritjen më të madhe të trafikut që nga viti 2019  me një rritje prej 72.1% në numrin e pasagjerëve.
Për më tepër, në vitin 2024 Aeroporti theu një tjetër rekord duke tejkaluar për herë të parë katër milionë pasagjerë brenda një viti, një dëshmi e qartë e rolit gjithnjë e më të rëndësishëm që ka në rajon dhe për diasporën. /Albinfo.ch

Ambasadori i Zvicrës në Kosovë viziton Aeroportin Ndërkombëtar të Prishtinës

Posted on by Drin Reçica

Ambasadori i Zvicrës në Kosovë, Jürg Sprecher, realizoi një vizitë në Aeroportin Ndërkombëtar të Prishtinës “Adem Jashari”, ku pati mundësinë të njihet nga afër me funksionimin dhe operacionet e përditshme të aeroportit, përcjell albinfo.ch.

Gjatë vizitës, ambasadori Sprecher u prit me mikpritje dhe mori një guidë përmes ambienteve të aeroportit, përfshirë edhe zonat prapa skenës, duke u njohur më për së afërmi me mënyrën se si organizohet dhe menaxhohet ky institucion jetik për lidhjen ajrore të Kosovës me botën.

Kosova dhe Zvicra janë të lidhura ngushtë përmes fluturimeve të përditshme që përbëjnë një urë të rëndësishme komunikimi, sidomos për diasporën e madhe kosovare në Zvicër. Aeroporti i Prishtinës luan një rol kyç në këtë drejtim, duke shërbyer si nyje strategjike për lëvizjen e udhëtarëve dhe zhvillimin ekonomik.

Ambasada e Zvicrës në Kosovë shpreh mirënjohjen për bashkëpunimin e shkëlqyer dhe shumëvjeçar me Aeroportin Ndërkombëtar të Prishtinës, bashkëpunim që ka ndihmuar në forcimin e marrëdhënieve mes dy vendeve.

Një falënderim i veçantë u drejtohet Aeroportit Ndërkombëtar LIMAK Kosova, Shërbimeve të Navigacionit Ajror të Kosovës (KANS), si dhe stacionit policor të Aeroportit Ndërkombëtar të Prishtinës për organizimin dhe kontributin e tyre të çmuar gjatë vizitës.

Zelensky shkon në Berlin për takimin me Trumpin

Posted on by Drin Reçica

Sot, Presidenti i Ukrainës, Volodymyr Zelensky, do të vizitojë Berlinin për t’u bashkuar me kancelarin gjerman, Friedrich Merz, për bisedime me udhëheqësit evropianë dhe amerikanë përpara samitit Trump-Putin më vonë këtë javë, ka thënë qeveria gjermane, përcjell albinfo.ch.

Merz-i ka organizuar një seri takimesh virtuale të mërkurën, në një përpjekje për të dëgjuar zërin e udhëheqësve evropianë dhe ukrainas, përpara një samiti nga i cili ata janë lënë mënjanë, raporton AP.

Zelensky pritet të takohet fillimisht me udhëheqësit evropianë, në përgatitje të një telefonate virtuale me presidentin e SHBA-së, Donald Trump, dhe zëvendëspresidentin JD Vance rreth një orë më vonë.

Një telefonatë midis udhëheqësve të vendeve të përfshira në “koalicionin e të vullnetshmëve”, ata që janë të përgatitur të ndihmojnë në kontrollin e çdo marrëveshjeje të ardhshme paqeje midis Moskës dhe Kievit, do të zhvillohet e fundit.

Të mërkurën, Merz-i është zotuar të ndihmojë Ukrainën të zhvillojë sistemet e veta të raketave me rreze të gjatë veprimi, që do të jenë të lira nga çdo kufizim i imponuar nga Perëndimi në përdorimin dhe objektivat e tyre, ndërsa qeveria e Kievit lufton për të sprapsur pushtimin e Rusisë.

Zelensky e ka vizituar për herë të fundit Berlinin në fund të majit.

Takimi Trump-Putin do të zhvillohet të premten në Alaska.

Kosovë: 11 armë zjarri të sekuestruara në 24 orët e fundit

Posted on by Drin Reçica

Në 24 orët e fundit janë sekuestruar 11 armë zjarri në Kosovë. Sipas raportit 24-orësh të Policisë së Kosovës, janë sekuestruar nëntë pistoleta e dy pushkë, si dhe katër thika, përcjell albinfo.ch.

Në një rast në fshatin Gramaçcel të Deçanit, gjatë një bastisje në pronat e tyre janë gjetur dhe konfiskuar dy pistoleta me leje, dy pushkë, pajisje për mirëmbajtje të armëve, rreth 110 fishekë, si dhe katër thika dhe afro 1.5 gram marihuanë. Po ashtu u sekuestruan dy vetura për shmangie doganore. U ndaluan dy burra e dy gra, ndërsa me vendim të prokurorit ata më pas u liruan në procedurë të rregullt. 

“Fsh. Gramaçel, Deçan 12.08.2025-09:30.Janë arrestuar tre të dyshuar, një mashkull kosovar dhe dy femra, njëra kosovare dhe tjetra me shtetësi të huaj, pasi që gjatë bastisjes në pronat e tyre janë gjetur dhe konfiskuar;  një pistoletë (me leje) me 16 fishekë, një pushkë,  një pistoletë (me leje) me karikator dhe me 24 fishekë, pajisje për mirëmbajtje të armëve, një pushkë, gjithsej 110 fishekë të kalibrave të ndryshëm, katër thika si dhe sasi të vogla substancë të dyshuar narkotike të llojit marihuanë me peshë rreth 1.5 gram. Po ashtu, janë sekuestruar dy automjete për shmangie doganore, të cilat janë proceduar tek Dogana e Kosovës. Pas intervistimit, me vendim të prokurorit të dyshuarit janë liruar në procedurë të rregullt”, ka njoftuar Policia e Kosovës. 

Pistoleta janë sekuestruar edhe në Lipjan, Drenas, Obiliq, Fushë-Kosovë, e Skënderaj dhe dy në Rahovec – në fshatrat Xërxë dhe Polluzhë.

Tre persona u dërguan në mbajtje e rastet tjera shkuan në procedurë të rregullt. 

Rastet e raportuara në Polici: 

MBAJTJE NË PRONËSI, KONTROLL OSE POSEDIM TË PAAUTORIZUAR I ARMËVE /PËRDORIM I ARMËS APO MJETIT TË RREZIKSHËM

Lipjan 29.05.2025-08:30. Është shoqëruar në stacionin policor e dyshuara femër kosovare pasi që muaj më parë kishte publikuar një video në rrjet social duke shtënë me armë zjarri. Pistoleta është sekuestruar dhe me vendim të prokurorit e dyshuara është liruar dhe rasti shkon në procedurë të rregullt.

Gllogoc 12.08.2025-18:30. Raportohet se njësiti policor nga i dyshuari mashkull kosovar  ka konfiskuar armën e zjarrit me një karikator me 27 fishekë pasi që i njëjti gjatë ahengut familjar dyshohet se ka shtënë me të. I dyshuari është intervistuar dhe me vendim të prokurorit është liruar në procedurë të rregullt.

KANOSJE/PËRDORIM I ARMËS APO MJETIT TË RREZIKSHËM

Plemetin, Obiliq 12.08.2025-20:40. Njësiti policor gjatë patrullimit ka hasur të dyshuarin mashkull kosovar i cili me vete kishte një armë zjarri. Nga i dyshuari arma e zjarrit me shtatë fishekë dhe dy gëzhoja janë konfiskuar, ndërsa me vendim të prokurorit i dyshuari është liruar në procedurë të rregullt.

KANOSJE/ MBAJTJE NË PRONËSI, KONTROLL OSE POSEDIM TË PAAUTORIZUAR I ARMËVE

Rr. Gjergj Fishta, Fushë Kosovë 12.08.2025-18:12. Është arrestuar i dyshuari mashkull kosovar pasi që, i njëjti pas një mosmarrëveshje ka kanosur viktimën mashkull kosovar duke i drejtuar armën e zjarrit. Nga i dyshuari është konfiskuar arma e zjarrit me një karikator me 9 fishekë. Pas intervistimit, me vendim të prokurorit i dyshuari dërgohet në mbajtje.

MBAJTJE NË PRONËSI, KONTROLL OSE POSEDIM TË PAAUTORIZUAR I ARMËVE

Fsh. Gramaçel, Deçan 12.08.2025-09:30. Janë arrestuar tre të dyshuar, një mashkull kosovar dhe dy femra, njëra kosovare dhe tjetra me shtetësi të huaj, pasi që gjatë bastisjes në pronat e tyre janë gjetur dhe konfiskuar;  një pistoletë (me leje) me 16 fishekë, një pushkë,  një pistoletë (me leje) me karikator dhe me 24 fishekë, pajisje për mirëmbajtje të armëve, një pushkë, gjithsej 110 fishekë të kalibrave të ndryshëm, katër thika si dhe sasi të vogla substancë të dyshuar narkotike të llojit marihuanë me peshë rreth 1.5 gram. Po ashtu, janë sekuestruar dy automjete për shmangie doganore, të cilat janë proceduar tek Dogana e Kosovës. Pas intervistimit, me vendim të prokurorit të dyshuarit janë liruar në procedurë të rregullt.

MBAJTJE NË PRONËSI, KONTROLL OSE POSEDIM TË PAAUTORIZUAR I ARMËVE

Fsh. Xërxë, Rahovec 12.08.2025-01:00. Është arrestuar i dyshuari mashkull kosovar pasi që, dyshohet se kishte shtënë me armë zjarri. Pistoleta me një karikator me pesë fishekë dhe pesë gëzhoja janë sekuestruar. Me vendim të prokurorit, i dyshuari është dërguar në mbajtje.

Fsh. Polluzhë, Rahovec 11.08.2025-21:00. Është arrestuar i dyshuari mashkull kosovar pasi që dyshohet se kishte shtënë me armë zjarri në një aheng familjar. Pistoleta me një karikator është sekuestruar. Me vendim të prokurorit, i dyshuari është liruar dhe rasti shkon në procedurë të rregullt.

KANOSJE/ MBAJTJE NË PRONËSI, KONTROLL OSE POSEDIM TË PAAUTORIZUAR I ARMËS

Fsh. Abri e Poshtme, Skenderaj 12.08.2025-19:30. Është arrestuar i dyshuari kosovar pasi që, i njëjti  kishte ekspozuar një armë të zjarrit. Nga i dyshuari është sekuestruar  një revole. Me vendim të prokurorit i dyshuari pas intervistimit dërgohet në mbajtje.