Archives

Asllani po largohet nga Inter, ja ku pritet të transferohet

Posted on by Drin Reçica

Interi pritet t’i shesë disa lojtarë gjatë afatit veror të transferimeve, përcjell albinfo.ch.

Një nga kandidatët kryesorë për t’u larguar nga zikaltrit mbetet Kristjan Asllani.

Mesfushori shqiptar i Kombëtares kuqezi nuk është pjesë e planeve teknike të klubit, por e ardhmja e tij është ende në ajër.

Nuk ka mungesë klubesh të interesuara, por ende nuk ka mbërritur asnjë ofertë konkrete në selinë e Interit.

Sipas thashethemeve të fundit për transferimet, Fiorentina është klubi i parë i gatshëm të thyejë bllokadën dhe të bëjë një ofertë konkrete në zyrat e Marottës dhe Ausilios për mesfushorin shqiptar të lindur në vitin 2002, i vlerësuar nga Interi në 18-20 milionë euro.

Ky veprim mund t’i detyrojë klubet e tjera të interesuara, si Bologna, të bëjnë lëvizjet e tyre, ndërsa oferta e Betis u refuzua nga lojtari.

Shënim: Disa imazhe gjenden në internet dhe konsiderohen të jenë në domenin publik. Nëse dikush pretendon pronësinë, ne do të citojmë autorin ose, sipas kërkesës, do ta heqim menjëherë imazhin.

Tre shqiptarë dënohen me 48 vite burg në Itali

Posted on by Drin Reçica

Tre shtetas shqiptarë janë dënuar me gjithsej 48 vite burg nga Gjykata e Brindisit në Itali, si pjesë e një grupi ndërkombëtar prej shtatë anëtarësh që trafikonte sasi të mëdha droge nga Holanda drejt tregut italian, përcjell albinfo.ch.

Të dënuarit janë:

• A. B., 35 vjeç, me 13 vjet e 6 muaj burg
• K. M., 60 vjeç, me 22 vjet e 6 muaj
• R. M., 43 vjeç, me 12 vjet burg

Sipas mediave italiane, çështja u hetua nga prokurorja Giovanna Cannarile e Drejtorisë Antimafia të Leçes (DDA). Më 22 janar 2022, Guardia di Finanza, gjatë operacionit “Tackle”, ekzekutoi 23 urdhra ndalimi.

Gjykata konfirmoi se K. M. ishte promotori kryesor i rrjetit kriminal, së bashku me një tjetër të pandehur që po gjykohet në një procedurë të ndarë. Grupi dyshohet se kishte lidhje me shtetas shqiptarë dhe italianë, përfshirë Pierluigi Chionna.

Përveç shqiptarëve, gjykata dënoi edhe:

• Fabrizio Russo me 9 vjet e 9 muaj burg dhe 11.500 euro gjobë
• Salvatore Schiavone me 8 vjet burg dhe 8.000 euro gjobë
• Salvatore Chionna me 7 vjet burg dhe 30.000 euro gjobë
• Roberto Mazzuti me 8 vjet burg dhe 8.000 euro gjobë

Të gjithë të dënuarit nuk do të lejohen të ushtrojnë funksione publike. Akuzat ndaj tyre përfshijnë pjesëmarrje në organizatë ndërkombëtare të trafikut të drogës, zhvatje me metoda mafioze dhe shpërndarje narkotikësh.

Shqipëria përfaqësohet denjësisht në Zvicër

Posted on by Drin Reçica

Bëhet e ditur se për herë të parë, Shqipëria organizoi një aktivitet në ambientet e Organizatës Botërore të Pronësisë Intelektuale (WIPO) në Gjenevë të Zvicrls, në kuadër të Asamblesë së Përgjithshme të 66-të, transmeton albinfo.ch.

 

Vlen të theksohet se nën temën “Treguesit Gjeografikë dhe Shprehjet e Traditës Kulturore”, Shqipëria u prezantua me produkte unike si: vaji i ullirit “Valmi” nga Elbasani, mjalti i Bedunicës, kërpudha e Pukës, qepa e thatë e Drishtit, kumbulla e Shumbatit dhe glikoja e Përmetit.

Mbrëmja u pasurua nga një performancë magjepsëse e Ansamblit Kombëtar të Këngëve dhe Valleve Popullore, si dhe ekspozimi i veshjeve tradicionale shqiptare që ngjallën interes dhe vlerësim nga delegatët ndërkombëtarë.

Në këtë ngjarje të rëndësishme mori pjesë edhe z. Valon Gashi, Sekretar i Parë i Ambasadës së Shqipërisë në Bernë, i cili përfaqësoi Ambasadën në promovimin e trashëgimisë sonë kulturore përpara publikut global. /Albinfo.ch

Rrëmbehet një avion, Aeroporti Ndërkombëtar i Vankuverit i paralizuar për një orë

Posted on by Drin Reçica

Aeroporti Ndërkombëtar i Vankuverit, një nga më të mëdhenjtë dhe më të ngarkuarit në Kanada, u mbyll për gati një orë të martën pasi një aeroplan i vogël u raportua se ishte “rrëmbyer”, sipas autoriteteve, përcjell albinfo.ch.

Policia tha se mori një raport në orën 13:10 (ora lokale; 23:10 ET) se një Cessna 172, një aeroplan me një motor dhe katër vende, ishte “rrëmbyer në zonën e Ishullit të Vankuverit dhe po i afrohej hapësirës ajrore pranë Aeroportit Ndërkombëtar të Vankuverit” (perëndim).

“I dyshuari ishte personi i vetëm në bordin e avionit”, tha Policia Mbretërore Kanadeze e Kalëruar në një deklaratë. Ai u arrestua pa rezistencë dhe pa “asnjë incident” pasi Cessna u ul rreth një orë më vonë, tha policia, pa shpjegime të mëtejshme.

Nëntë fluturime hyrëse u devijuan në aeroporte të tjera, tha aeroporti në një deklaratë, e cila njoftoi se ndalimi i uljes zgjati 39 minuta.

Specialja rrëzon mocionin e mbrojtjes në rastin Thaçi dhe të tjerët

Posted on by Drin Reçica

Sot, trupi gjykues i Themelores së Dhomave të Specializuara e rrëzoi parashtrimin e përbashkët të mbrojtjes së Hashim Thaçit, Rexhep Selimit, Kadri Veselit dhe Jakup Krasniqit për t’i hequr nga aktakuza të gjitha incidentet që, sipas mbrojtjes, binin jashtë periudhës së konfliktit të armatosur.

Kryetari i trupit gjykues, Charles Smith, tha se heqja e periudhës para fundit të majit 1998 dhe pas 20 qershorit 1999 do ta fragmentonte rastin. Smith tha po ashtu se rregullat gjyqësore parashohin kundërshtim të pikave të aktakuzës si tërësi, e jo kundërshtim të pikave të veçanta, siç ka bërë mbrojtja.

Seanca pritet të vazhdojë me dëgjimin e dëshmitarëve të Mbrojtësit të Viktimave.

“As ligji e as rregullorja nuk përmendin nocionin e pikave, por përdorin nocionin e akuzave, megjithëse ZPS-ja e ka përdorur shprehjen ‘pika’ në tekstin e aktakuzës. Trupi gjykues vëren më tej se rregulli 130 i lejon mbrojtjes që të kërkojë që trupi gjykues të urdhërojë rrëzimin e çdo, disa ose të gjitha akuzave në aktakuzë, kur përmbushet pragu përkatës. Sa i takon thelbit të kundërshtimit të mbrojtjes, trupi gjykues vëren se incidentet dhe akuzat e lidhura me kohën që kundërshtohet prej mbrojtjes nuk janë akuza brenda kuptimit të rregullit 130. Në fakt, ato janë fakte materiale që kanë të bëjnë me akuzat dhe pikat në aktakuzë. Ajo që kundërshton mbrojtja, për rrjedhojë, nuk është akuzë, por pjesë e një akuze në formën e fakteve materiale të caktuara që përbëjnë akuzat apo pikat në aktakuzë”, ka thënë Smith.

Smith ka thënë se, edhe nëse këto kundërshtime të mbrojtjes do të rezultonin të suksesshme, mocioni i mbrojtjes së të pandehurve nuk do të çonte në rrëzimin e asnjë prej pikave të aktakuzës.

Kryetari i trupit gjykues tha se nuk e ka autoritetin për ta vlerësuar kundërshtimin e mbrojtjes së të akuzuarve në bazë të rregullit 130 dhe se këtë vlerësim do ta bëjë në fund të procesit gjyqësor.

“Trupi gjykues nuk ka nevojë të shkojë në themelësinë e argumenteve të mbrojtjes sa i përket fillimit dhe përfundimit të konfliktit të armatosur jo-ndërkombëtar. Çështja e shtrirjes kohore të konfliktit të armatosur që ka të bëjë me këtë çështje gjyqësore do të trajtohet në fund të gjykimit, kur do të vendoset për themelësinë e çështjes”, ka thënë ai.

Seanca pritet të vazhdojë me dëgjimin e dëshmitarëve të Mbrojtësit të Viktimave.

Shqipëria vazhdon me shifra rekorde të turistëve të huaj

Posted on by Drin Reçica

Shqipëria vazhdon me shifra rekorde të turistëve të huaj, që është konfirmim se po bëhet një destinacion gjithnjë më tërheqës, përcjell albinfo.ch.

Siç njoftoi kryeministri Edi Rama në Facebook, në gjysmën e parë të këtij viti në vend kanë qëndruar mbi 4,76 milionë të huaj.

Ai thekson se këto shifra janë tregues i një “rritjeje të stabilizuar të flukseve hyrëse dhe ekuilibrave të qëndrueshëm në menaxhimin e ofertës turistike”.

“Qëndrimi i 1,32 milionë vizitorëve të huaj vetëm gjatë qershorit është fryt i një pune të suksesshme dhe përgjegjësi e shtuar për të gjithë në monitorimin e sezonit turistik veror”, vlerësoi kryeministri.

Konkretisht, në qershor të vitit 2023, Shqipërinë e vizituan 1.007.033 turistë të huaj, ndërsa në qershor të vitit 2024 vendi u vizitua nga 1.244.967 të huaj. Në qershor të këtij viti, Shqipërinë e vizituan 1.329.204 turistë të huaj, ose shtatë për qind më shumë krahasuar me qershorin e vitit 2024.

Duke bërë krahasim me periudhën janar-qershor të vitit 2023, janë regjistruar 3.396.932 turistë të huaj, ndërsa në të njëjtën periudhë të vitit 2024 ka pasur 4.547.896.

Sipas Ramës, në periudhën janar-qershor të vitit 2025 rezultojnë 4.761.648, ose pesë për qind më shumë krahasuar me periudhën janar-qershor të vitit të kaluar.

“Bukuritë e Shqipërisë, që nga majat e Alpeve të thepisura, brigjet magjepsëse të rivierës shqiptare dhe të Adriatikut, sitet e trashëgimisë në UNESCO, monumentet e trashëgimisë kulturore dhe natyrore, parqet kombëtare, fshatrat e bukur turistikë nga veriu në jug, kulinaria dhe prodhimet tradicionale tërhoqën 4,76 milionë të huaj gjatë gjashtë muajve të këtij viti”, konstatoi Rama.

Sot momenti kyç në Hagë: Merret vendimi për mocionin e mbrojtjes ndaj Thaçit e të tjerëve

Posted on by Drin Reçica

Mësohet se sot pritet një ndër vendimet e rëndësishme në procesin gjyqësor ndaj ish-krerëve të UÇK-së, përcjell albinfo.ch.

Trupi gjykues në çështjen “Thaçi dhe të tjerët” ka caktuar datën 16 korrik (sot) për ta bërë publik vendimin e tyre në lidhje me mocionin e përbashkët të ekipeve mbrojtëse për të rrëzuar pjesë të caktuara të aktakuzës për krime lufte dhe krime kundër njerëzimit.

Gjykata do të vendosë nëse do t’i rrëzojë disa nga pikat e aktakuzës ndaj Hashim Thaçit, Kadri Veselit, Rexhep Selimit dhe Jakup Krasniqit.

Ky hap mund të ndikojë drejtpërdrejt në ecurinë e mëtejme të gjykimit. Avokatë dhe përfaqësues të organizatave të drejtësisë sqarojnë rëndësinë e kësaj faze dhe ecurinë e rasteve të tjera në Dhomat e Specializuara.

Procesi gjyqësor ndaj katërshes Thaçi, Veseli, Krasniqi dhe Selimi tashmë ka hyrë në fazën përfundimtare dhe cilido qoftë vendimi për rrëzimin ose jo të akuzave, pritet të ndikojë dukshëm në vazhdimin e çështjes. Të mërkurën, gjykata do të vendosë për mocionin e mbrojtjes që kërkon rrëzimin e disa pikave të aktakuzës ndaj Hashim Thaçit, Kadri Veselit, Rexhep Selimit dhe Jakup Krasniqit.

Seanca për vendimin më të rëndësishëm pas përfundimit të paraqitjes së provave dhe dëshmitarëve nga Prokuroria do të fillojë nga ora 9 e mëngjesit dhe pritet që gjatë ditës të vazhdohet tutje me procesin, përkatësisht dëgjimin e dëshmitarëve ekspertë të Zyrës së Mbrojtësit të Viktimave.

Gjyqtarët kanë urdhëruar MV-në t’i bëjë gati ekspertët pavarësisht vendimit për mocionin, ngaqë sipas Charles Smith, natyra e këtij mocioni kundërshtues është e limituar, andaj gjykimi do të kalojë në fazën tjetër.

Mbrojtja e kishte dorëzuar këtë mocion më 12 qershor, ndërkaq kundërpërgjigjja e Zyrës së Prokurorit të Specializuar ka shkuar në adresë të Gjykatës më 7 korrik.

Avokati Taulant Hodaj shpjegon procedurat që ndjek Gjykata Speciale në këtë fazë.

“Ky është një filtër që, nëse eventualisht aktakuza është e dobët në bazë të provave që i ka ofruar vetë Prokuroria dhe dëshmitarët e saj dëshmojnë të kundërtën e asaj që pretendohet në aktakuzë, atëherë gjykata mund të ndërhyjë. Është një stad i ndërmjetëm. Nesër trupi gjykues mund të rrëzojë disa pika të aktakuzës, mund të mos rrëzojë asnjë ose mund të vendosë të vazhdojë me të gjitha. Nga njoftimi zyrtar, nesër do të jepet një vendim, ndërsa është kërkuar nga përfaqësuesi i viktimave që të paraqesë fjalën e tij, që në njëfarë mënyre nënkupton se jo të gjitha pikat e aktakuzës do të rrëzohen, apo asnjë prej tyre”, ka thënë ai.

Sipas avokatit Hodaj, rrëzimi i disa pikave të aktakuzës mund ta lehtësojë vendimmarrjen përfundimtare që pritet në fund të këtij viti apo në fillim të vitit të ardhshëm.

Ndërkohë, Gjykata Speciale tashmë ka dhënë një vendim të formës së prerë në rastin e Salih Mustafës, një vendim që konfirmon aktgjykimin e Apelit me dënim prej 15 vjetësh burgim. Sa i përket rastit të Pjetër Shalës, përfaqësuesja e Institutit të Kosovës për Drejtësi, Blendina Veliqi, shpjegon procedurat e mëtejshme:

“Qoftë mbrojtja, qoftë Prokuroria mund të bëjnë ankesë për mbrojtje të ligjshmërisë. Aty nuk bëhet vlerësimi i provave, por mund të paraqiten pretendime për shkelje të ndonjë ligji. Në atë rast, procedurat vazhdojnë në Gjykatën Supreme, e cila mund ta ndryshojë vendimin, mund ta kthejë në rishqyrtim, ose mund të konstatojë se ka pasur shkelje që nuk ndikojnë në ndryshimin e vendimit të Apelit”, ka thënë Veliqi.

Gjykata e Apelit e Gjykatës Speciale ia ka ulur dënimin Pjetër Shalës, i njohur si “Ujku”, nga 18 në 13 vjet burg.

Sot i jepet lamtumira e fundit mërgimtarës që humbi jetën në një aksident në Gjermani

Posted on by Drin Reçica

Yllka Hoti, e cila vdiq pas një aksidenti në Gjermani, do të varroset sot në fshatin Hoçë e Vogël të Rahovecit, transmeton albinfo.ch.

Në një aksident të rëndë në Gjermani, në afërsi të Reutlingenit, ajo ka ndërruar jetë, siç njofton policia, në një vetaksident në autostradën B28.

Vdekjen e saj e ka konfirmuar familja, e cila ka njoftuar edhe për ceremoninë e varrimit, e cila do të mbahet sot.

Yllka, gjatë udhëtimit, ka humbur kontrollin ndaj veturës dhe ka dalë nga rruga. Aksidenti i rëndë ka ndodhur javën e kaluar, por Yllka ka ndërruar jetë të shtunën.

Për këtë aksident me pasoja të rënda kanë raportuar edhe autoritetet policore gjermane, si dhe mediat gjermane, të cilat shkruajnë se autostrada B28, nga Metzingen drejt Reutlingenit, ishte e mbyllur për një kohë. Ndërhyrja është bërë edhe me helikopter, por, për fat të keq, pasojat ishin tepër të rënda.

Policia po heton të gjitha detajet, ndërsa ne i shprehim ngushëllime familjes Hoti dhe miqve të tyre.

Kaltrina Kusari mbyll postdoktoraturën në Universitetin e Calgary-t

Posted on by Drin Reçica

Prorektorja dhe njëherësh profesorja asistente në Fakultetin e Shkencave Sociale në Universitetin “Fehmi Agani” në Gjakovë (UFAGJ), Prof. Ass. Dr. Kaltrina Kusari, ka përfunduar me sukses postdoktoraturën e saj në Universitetin e Calgaryt, në Kanada, gjatë muajit qershor 2025, transmeton albinfo.ch.

Gjatë kësaj përvoje akademike ndërkombëtare, Dr. Kusari u bë pjesë e projektit hulumtues Aging in the Right Place (AIRP), një partneritet shumëqytetësh që shqyrton përvojat e të moshuarve të prekur nga pasiguria në banim dhe rreziku i pastrehësisë në qytete të ndryshme të Kanadasë. Në veçanti, ajo kontribuoi në analizimin e të dhënave që lidhen me migrantët e moshuar, duke ofruar perspektiva të reja mbi mënyrën se si statusi i migrimit ndikon në procesin e plakjes dhe sfidat e strehimit.

Në përmbyllje të programit, Prof. Kusari prezantoi gjetjet kryesore të studimit në konferencën ndërkombëtare “Our Future is Aging”, e cila u mbajt në Halifax, Nova Scotia. Prezantimi i saj u mirëprit nga pjesëmarrësit dhe nxiti diskutime të thella mbi rëndësinë e qasjeve gjithëpërfshirëse në politikat e strehimit dhe përkrahjes së të moshuarve në shoqëritë moderne.

Përvoja dhe ekspertiza e fituar gjatë kësaj postdoktorature pritet të pasurojnë edhe më tej punën e saj akademike në Kosovë, duke i dhënë një shtysë të re kërkimeve në fushat e plakjes, migrimit dhe drejtësisë sociale. /albinfo.ch

Maqedoni: Tre muaj burg për vrasjen e një qeni

Posted on by Alb

Gjykata Penale Themelore në Shkup ka shpallur fajtorë Ljube Krstevskin dhe Branko Bilbilovskin për vrasjen e qenit Feliks, i cili ndërroi jetë më 7 janar 2025 si pasojë e plagëve të shkaktuara.

Krstevski u dënua me tre muaj burg, ndërsa Bilbilovski mori një gjobë prej 1,000 eurosh, e cila u vendos në formë të njëqind gjobave ditore me vlerë 10 euro secila, transmeton alsat pêrcjell albinfo.ch.

Sipas aktakuzës, më 19 nëntor 2024, Krstevski goditi qenin Feliks në kokë me një mjet të fortë, pa ndonjë arsye të justifikueshme, duke i shkaktuar lëndime serioze. Së bashku me Bilbilovskin, ata e lidhën qenin me tel dhe e tërhoqën zvarrë, duke menduar se ishte i vdekur.

Ngjarja u trajtua sipas nenit 233, paragrafi 1 të Kodit Penal, që ndalon vrasjen ose keqtrajtimin e kafshëve pa shkak dhe parashikon dënime deri në tre vjet burgim.

Ky është vendim historik për drejtësinë në Maqedoninë e Veriut, pasi është hera e parë që jepet dënim me burg për një rast të tillë.

Ja sa kushton tani kompania e Mira Muratit 

Posted on by Alb

Mira Murati, ish-CTO e OpenAI, ka ngritur një start-up të ri në fushën e inteligjencës artificiale, Thinking Machines Lab, i cili mbylli së fundmi një raund të madh financimi “pre-seed”.

Kompania arriti të tërheqë dy miliardë dollarë investime, duke e vlerësuar atë në 12 miliardë dollarë pas investimit, shkruan techcrunch.

Këto fonde erdhën nga investitorë të rëndësishëm, përfshirë gjigantë në fushën e mikroçipave si Nvidia dhe AMD, si dhe kompani si Andreessen Horowitz, Accel dhe Jane Street, ky i fundit i njohur për vendosjet e tij në fintech dhe inteligjencë artificiale.

Murati po planifikon që brenda disa muajve të prezantojë produktin e parë, i cili do të përfshijë një komponent open source për të mbështetur kërkimin akademik dhe zhvilluesit që kërkojnë të krijojnë modele të përshtatura.

Qendra e kompanisë është në San Francisco dhe ajo fokusohet në zhvillimin e AI shumë-modal që ndërvepron me njerëzit në një mënyrë natyrale, përmes bisedës, pamjes dhe bashkëpunimit të përbashkët.

Murati, 36 vjeçe, ka ndërtuar një ekip të fuqishëm duke përfshirë ish-punonjës nga OpenAI, Google, Meta dhe Mistral.

Gjatë karrierës së saj në OpenAI, ajo kontribuoi në zhvillimin e produkteve si ChatGPT, DALL‑E dhe modaliteti i zërit. Ajo gjithashtu shërbeu përkohësisht si CEO gjatë trazirave të brendshme në fund të vitit 2023.

Bernë: Dënohet për mashtrim polici i rremë

Posted on by Alb

Një polici i rremë ka mashtruar dy persona në kantonin e Bernës me një shumë prej 60,000 frangash zvicerane. Tani ai është dënuar.

Një polici i rremë është dënuar në kantonin e Bernës për mashtrim komercial dhe larje parash në formë të rënduar. Ai ka marrë 15 muaj burg dhe dëbim nga Zvicra për shtatë vjet. Vendimi është përfundimtar, njofton prokuroria publike e kantonit Bern.

53-vjeçari nga Polonia u ndalua fillimisht në autostradën në Bayreuth, Gjermani, më 25 tetor, në shoqërim me një person tjetër, transmeton albinfo.ch.

Gjatë kontrollit, autoritetet bavareze gjetën një plaçkë – bizhuteri ari dhe para cash me vlerë 60,000 franga zvicerane. Ndërsa e liruan personin, paratë dhe bizhuteritë u sekuestruan nga policia. Këto të vlefshme u lidhën më pas me dy raste mashtrimi telefonik në kantonin e Bernës.

Një fund i lumtur për viktimat

53-vjeçari u arrestua më 13 gusht 2024 në Republikën Çeke dhe u ekstradua në Zvicër më 11 mars. Bashkëpunëtori i tij i dyshuar ende nuk është kapur.

Policia arriti t’u kthente sendet e vjedhura dy viktimave, dy grave të moshuara.

Në deklaratën e saj, prokuroria paralajmëron qartë për mashtruesit telefonikë dhe jep këshilla për mbrojtje:

  • Kini dyshim nëse të huajt kërkojnë të tërhiqni para, të paguani, dorëzoni ose depozitoni para, kartela bankare apo sende me vlerë.

  • Mbyllni menjëherë thirrjen e dyshimtë dhe raportoni te policia.

  • Mos jepni kurrë informacion personal, fjalëkalime apo të dhëna financiare për askënd.

  • Policia nuk kërkon asnjëherë kartela bankare apo PIN.

  • Bisedoni me të moshuarit për rreziqet dhe përhapni paralajmërimin.

Projekti i SBB-së zemëron gjermanët: Edhe ne këtu kemi të drejta!

Posted on by Alb

SBB planifikon të rrisë frekuencën e trenave ndërmjet Cyrihut dhe Schaffhausen-it në çdo 30 minuta, duke zgjeruar linjën hekurudhore në Lottstetten (Gjermani) me 3.8 kilometra binar të dyfishtë. Projekti përfshin rindërtimin e stacionit, ndërtimin e një kalimi të nëndheshëm dhe modifikime të urave dhe viadukteve. Ndërtimi pritet të nisë në vitin 2027 dhe të kushtojë rreth 180 milionë franga zvicerane.

Banorët e Lottstetten-it kundërshtojnë projektin, duke u shqetësuar për zhurmën, kufizimet dhe barrierat e zhurmës që do të ndikojnë drejtpërdrejt në shtëpitë e tyre. Një peticion me gati 700 firma denoncon pabarazitë krahasuar me Zvicrën dhe rrezikun e shpronësimeve, transmeton albinfo.ch.

Kryetari i komunës mbështet zgjerimin, por kritikon vendndodhjen dhe propozon alternativa jashtë komunës, të cilat SBB i ka refuzuar për arsye teknike dhe logjistike. Projekti është në ekspozim publik deri më 18 gusht 2025 dhe komuna do të organizojë një takim informues më 30 korrik.

 

21-vjeçarja nga Kosova humbi jetën në aksident në Gjermani

Posted on by Alb

Një 21-vjeçare me prejardhje nga Kosova ka ndërruar jetë si pasojë e plagëve të rënda që mori në një aksident të rëndë trafiku në Gjermani. Siç ka bërë të ditur policia e Reutlingen mëngjesin e së hënës, vajza u aksidentua të enjten, më 10 korrik, në autostradën B28 mes Metzingen dhe Reutlingen. Automjeti i saj doli nga rruga, u përmbys disa herë dhe ajo mbeti e plagosur rëndë.

Aksidenti, siç raportojnë mediat gjermane ndodhi pranë strehës së kafshëve. Pas aksidentit, rruga B28 u mbyll plotësisht në drejtim të Reutlingenit. Në vendngjarje ishte thirrur edhe helikopteri i shpëtimit, transmeton albinfo.ch.

Asnjë mjet tjetër nuk ishte i përfshirë në aksident. Sipas policisë, makina doli nga rruga pa u përplasur me ndonjë automjet tjetër. Hetimet e njësisë së qarkullimit rrugor vazhdojnë.

Sëmundjet që shkaktojnë vdekje të parakohshme në Evropë sipas OBSH-së

Posted on by Alb

Sëmundjet jotransmetuese janë shkaku kryesor i vdekjeve të parakohshme në botë, sipas një raporti të fundit të Organizatës Botërore të Shëndetësisë (OBSH).

Në rajonin europian, ku bën pjesë edhe Shqipëria, rreth 20 për qind e burrave dhe 10 për qind e grave vdesin para moshës 70 vjeç për shkak të sëmundjeve si ato kardiovaskulare, kanceri, diabeti dhe sëmundjet kronike të frymëmarrjes.

Ekspertët thonë se çdo vit regjistrohen afërsisht 1.8 milionë vdekje nga këto sëmundje, shumica e të cilave janë të parandalueshme, transmeton albinfo.ch.

Rreth 60 për qind e rasteve lidhen me faktorë rreziku si pirja e duhanit, konsumimi i alkoolit, presioni i lartë i gjakut, ushqimi i pashëndetshëm dhe mungesa e aktivitetit fizik.

Ndërkaq, 40 për qind e vdekjeve shkaktohen nga sëmundje që mund të trajtohen nëse zbulohen herët dhe nëse ka akses në shërbime shëndetësore cilësore.

Raporti gjithashtu nënvizon ndikimin negativ të pandemisë COVID-19 në arritjen e qëllimit global për uljen e vdekjeve me 25 për qind deri në vitin 2030.

Vetëm 10 vende europiane, përfshirë Danimarkën, Izraelin dhe Suedinë, e kanë arritur këtë objektiv, ndërsa 26 vende të tjera, përfshirë Shqipërinë, duhet të bëjnë përpjekje më të mëdha.

 

Trump tregon se si e “ndaloi konfliktin” mes Serbisë dhe Kosovës

Posted on by Alb

Presidenti i Shteteve të Bashkuara, Donald Trump, ka rikthyer deklaratën se gjatë kohës që ka qenë në detyrë, ka ndaluar një konflikt mes Kosovës dhe Serbisë.

Ai e bëri këtë deklaratë gjatë një takimi me Sekretarin e Përgjithshëm të NATO-s, Mark Rutte, duke përmendur edhe rolin e tij në parandalimin e një krize në rajon.

“Çështja mes Serbisë dhe Kosovës ishte një problem që do të ndodhte, por unë ndërhyra për ta zgjidhur. Kam përdorur tregtinë si një mjet shumë efektiv për të parandaluar luftërat. Ky ishte një ndër sukseset e mia më të rëndësishme,” tha Trump, duke listuar vendet ku sipas tij ka ndihmuar në shmangien e konflikteve të armatosura, transmeton euronews përcjell albinfo.ch.

Edhe presidentja e Kosovës, Vjosa Osmani, e konfirmoi këtë, duke thënë se Trump ka ndikuar në parandalimin e një përshkallëzimi të mundshëm të situatës së sigurisë në Kosovë.

OBSH-ja ‘jashtëzakonisht e shqetësuar’ për rritjen e skepticizmit ndaj vaksinimit

Posted on by Alb

Sipas Organizatës Botërore të Shëndetësisë (OBSH), skepticizmi ndaj vaksinave dhe ulja drastike e financimit për fushatat e vaksinimit paraqesin një kërcënim të madh për shëndetin e popullsisë globale.

Kate O’Brien, drejtoreshë e Departamentit të Vaksinimit në OBSH, shprehet: “Jemi jashtëzakonisht të shqetësuar për informacionet e pasakta dhe keqinformimet rreth imunizimit.” Ajo shton se ulja e ndihmës financiare është “shumë problematike”, gjatë prezantimit të raportit vjetor për normat e vaksinimit në botë nga OBSH dhe Fondi i Kombeve të Bashkuara për Fëmijët (UNICEF).

Sipas raportit, pengesa kryesore për mbrojtjen e plotë të fëmijëve është konflikti dhe vështirësitë për të arritur fëmijët në rajone shumë të largëta. Vitin e kaluar, 14.3 milionë fëmijë nuk morën asnjë dozë vaksine gjatë vitit të parë të jetës, një shifër shumë e ngjashme me vitin paraardhës.

Mungesa e fondeve për të mbështetur vendet e varfra me fushata vaksinimi vazhdon të jetë shqetësuese. Uljet e ndihmës për zhvillim, sidomos nga SHBA dhe vende të tjera këtë vit, pritet të kenë pasoja shkatërruese, paralajmërojnë OBSH dhe UNICEF.

Fëmijët në rrezik

Ekspertët nuk komentojnë drejtpërdrejt qëndrimin e sekretarit amerikan të Shëndetësisë, Robert Kennedy, i cili njihet si skeptik ndaj vaksinave, por theksojnë rolin e rëndësishëm të politikanëve dhe figurave fetare apo të tjera udhëheqëse në forcimin e besimit ndaj vaksinave të testuara dhe të monitoruara për dekada. “Në më pak se 50 vjet, vaksinat kanë shpëtuar 150 milionë jetë,” thotë Ephrem Lemango nga UNICEF, duke i bërë thirrje ministrave që të nënvizojnë se sëmundjet vdekjeprurëse si fruthi mund të parandalohen përmes vaksinimit.

Rritje e shpërthimeve të fruthit

Megjithëse mbulimi global me dozën e dytë të vaksinës kundër fruthit është rritur pak, duke arritur 76 për qind, 30 milionë fëmijë në botë mbeten të pambrojtur nga kjo sëmundje e rrezikshme. OBSH thotë se norma e vaksinimit duhet të jetë të paktën 95 për qind në çdo rajon për të parandaluar shpërthimet. Në vitin 2024, 60 vende përjetuan shpërthime të rënda të fruthit, më shumë se dyfishin e vitit 2022. Në disa vende, këto shpërthime lidhen me skepticizmin e gjerë ndaj vaksinimit.

Hans Kluge, drejtor rajonal i OBSH-së për Europën, shpjegon: “Vaksinat shpëtojnë jetë, dhe kur mbulimi ulet, sëmundjet përhapen.” Vitin e kaluar, rreth 300 mijë njerëz në rajonin evropian u sëmurën nga kollitja e fortë dhe mbi 125 mijë nga fruthi, shifra këto që përbëjnë trefishimin ose dyfishimin krahasuar me vitin paraardhës. Ai bëri thirrje për forcimin e sistemeve shëndetësore lokale, sigurimin e vaksinave kudo dhe luftimin e keqinformimit.

Suksesi i vaksinës kundër HPV

Raporti i vitit 2024 tregon një rritje të lehtë të normave të vaksinimit në botë. Rreth 85 për qind e foshnjave kanë marrë tre doza të vaksinës kundër difterisë, tetanosit dhe kollitjes së fortë (DTP), një tregues i rëndësishëm i mbulimit global të imunizimit.

Vaksina kundër HPV-së, që parandalon kancerin e qafës së mitrës, është një histori suksesi globale. Përqindja e vajzave të reja të vaksinuara është rritur me katër pikë përqindjeje në 31 për qind globalisht, kryesisht falë përfshirjes së vaksinës në programet rutinë të vendeve si Nigeria dhe Bangladeshi. Në vitin 2019, vetëm 17 për qind e adoleshenteve kishin marrë vaksinën, ndërsa qëlli

Broja largohet, kërkohet në Gjermani

Posted on by BR

Sulmuesi i Shqipërisë, Armando Broja do të largohet gjithsesi nga Chelsea në afatin kalimtar të verës.

“Blues” nuk janë bindur asnjëherë me kualitetet e sulmuesit shqiptar që kur e kanë transferuar atë, ndërsa lojtari kryesisht këtë periudhë e ka kaluar në huazime, transmeton albinfo.ch.

Mediumi britanik “The Athletic” raporton se sulmuesin shtatlartë e duan dy klubet e Bundesligës, Stuttgart dhe Red Bull Leipzig.

Leipzigu është duke u përgatitur për largimin e Benjamin Seskos dhe Xavi Simonsit, prandaj Broja shihet si një alternativë ideale e tyre, transmeton albinfo.ch.

Ndërkohë, Stuttgarti e sheh të nevojshëm përforcimin në sulm dhe shqiptari shihet si një zgjidhje ideale.

Chelsea është e gatshme të mos kërkojë shumë para vetëm për t’ia gjetur një klub Brojës, i cili në “Transfermarkt” vlerësohet 12 milionë euro.

Lojtari ka nevojë për një ekip ku do të mundë të luante në vazhdimësi për ta kapur hapin pasi ka ngecur prapa pa kontinuitet.

Infermierët e huaj në Gjermani vazhdojnë të përballen me barriera gjuhësore dhe kulturore

Posted on by Alb

Sistemi shëndetësor gjerman mbështetet fuqishëm te infermierët e huaj, ku sipas Agjencisë Federale të Punësimit, përqindja e tyre është rritur ndjeshëm në dekadën e fundit, duke arritur në 16 për qind në vitin 2023 dhe vijon të rritet.

Megjithatë, shumë infermierë dhe kujdestarë të huaj përballen me sfida të mëdha, jo vetëm për shkak të mungesës së njohurive të gjuhës gjermane, por edhe për shkak të problemeve sistematike si mosnjohja e plotë e diplomave dhe përvojave të tyre.

Shumë prej tyre fillojnë punën ndërkohë që ende po mësojnë gjermanishten, ka thënë Këshilli Gjerman i Infermierisë (DBfK). Kjo shkakton vështirësi si për vetë infermierët e huaj, ashtu edhe për kolegët gjermanë që shpesh detyrohen t’i trajnojnë për terminologjinë teknike përveç detyrave të tyre të zakonshme.

Presidentja e DBfK, Christine Vogler, ka kërkuar që standardet gjuhësore të jenë të detyrueshme dhe të unifikuara për të gjithë infermierët, pasi aktualisht ato ndryshojnë shumë nga një land në tjetrin, transmeton albinfo.ch.

Gjuha nuk ka të bëjë vetëm me transmetimin e informacionit, por edhe me krijimin e marrëdhënieve në vendin e punës, tha zëdhënësja e DBfK, Anja Hild. Ajo shtoi se shpeshherë, diferencat kulturore rreth pritshmërive për rolin e infermierëve ngatërrohen thjesht si çështje gjuhësore.

P.sh. shumë infermierë të huaj, të trajnuar si staf mjekësor në vendet e tyre, habiten kur kuptojnë se në Gjermani infermierët kujdesen edhe për higjienën personale të pacientëve, i ndihmojnë të lahen, të hanë apo të ngrihen nga shtrati.

“Edhe nëse di gjermanisht perfekt, nëse nuk e di që kujdesi personal është pjesë e punës së infermierit këtu, do ta kesh të vështirë,” tha Koudjo Johnson, menaxher integrimi në Klinikën Ernst-von-Bergmann në Potsdam.

Ai përmendi një rast ku një infermiere me përvojë në kirurgjinë traumatike u caktua në një klinikë okulistike, gjë që e la të ndjehej e nënvlerësuar dhe e demotivuar. Sipas tij, punësimi duhet të bëhet duke u bazuar në përvojën dhe aftësitë, jo vetëm në nevojën për staf.

Një studim i DBfK tregon se pothuajse 80 për qind e infermierëve gjermanë pajtohen që sistemi shëndetësor ka nevojë për punonjës të huaj.

Si mund të ndikojnë traktatet e reja të Zvicrës me BE-në në emigracion?

Posted on by Alb

Disa rregulla të reja që lidhen me emigracionin janë përfshirë në marrëveshjen e re mes Bernës dhe Brukselit.

Në dhjetor 2024, Zvicra arriti një paketë traktatesh me Bashkimin Evropian. Çfarë ndikimi mund të kenë këto marrëveshje të reja mbi Marrëveshjen për Lëvizjen e Lirë të Personave (AFMP)?

Sipas qeverisë zvicerane, AFMP, që hyri në fuqi në qershor 2002, “heq kufizimet për qytetarët e BE-së që duan të jetojnë ose punojnë në Zvicër. E drejta për lëvizje të lirë shoqërohet me njohjen e ndërsjellë të kualifikimeve profesionale, të drejtën për të blerë prona dhe koordinimin e sistemeve të sigurimeve shoqërore.”

Kjo marrëveshje ka qenë themeli i politikës së emigracionit të Zvicrës për më shumë se dy dekada.

Por çfarë ndryshimesh sjell traktati i ri për AFMP?

Në përgjithësi, traktati i ri hap rrugën për zgjerimin e kësaj marrëveshjeje, sipas Vincenzo Mascioli, shef i Sekretariatit Shtetëror për Migracionin (SEM), transmeton albinfo.ch.

Në terma konkretë, këto janë ndryshimet kryesore:

Emigracion i lidhur me punësimin

Në ndryshim nga BE-ja, emigracioni në Zvicër mbetet i lidhur ngushtë me tregun e punës.

Qytetarët e BE-së do të mund të hyjnë dhe qëndrojnë në Zvicër vetëm me kontratë pune të firmosur.

Ata që vijnë pa punë do të kenë të drejtë të qëndrojnë vetëm 3 muaj, pa leje qëndrimi dhe pa përfitime sociale.

Nëse një qytetar i BE-së humb punën brenda vitit të parë, mund të përfitojë ndihmë të përkohshme, por humbet të drejtën e qëndrimit pas 6 muajsh.

Statusi i ri i qëndrimit të përhershëm

Ndryshimi real qëndron tek e drejta për qëndrim afatgjatë.

Zvicra do të prezantojë një status të ri “qëndrim i përhershëm” për emigrantët nga BE.

Ata që kanë punuar legalisht për 5 vite radhazi do të mund të qëndrojnë pa kufizime.

Marrja e ndihmës sociale për më shumë se 6 muaj do ta zgjasë këtë periudhë për marrjen e statusit.

Ndërkohë, ata që marrin përfitime papunësie nuk do të penalizohen, pasi konsiderohen ende si pjesë aktive e tregut të punës, për sa kohë kërkojnë punë.

Ky ndryshim është veçanërisht i favorshëm për qytetarët nga Europa Lindore, të cilët aktualisht aplikojnë për qëndrim të përhershëm vetëm pas 10 vitesh.

Gjithashtu, statusi i qëndrimit të përhershëm nuk do të ketë më kufizime për ndihmën sociale pas 10 viteve qëndrim, megjithëse rregullat aktuale mbeten për natyralizim.

Bashkimi familjar

Rregullat aktuale mbeten të pandryshuara.

Punonjësit e BE-së në Zvicër mund të sjellin bashkëshortët dhe fëmijët nën 21 vjeç.

Teorikisht, kjo vlen edhe për prindërit dhe vjehrrit, por praktikisht ndodh rrallë.

Marrëveshja e re përfshin çiftet e regjistruara të së njëjtës gjini, duke i barazuar në të drejta.

Lejohet gjithashtu bashkimi familjar për çiftet që bashkëjetojnë pa u martuar dhe anëtarët e familjes që kanë nevojë për kujdes, me kusht që të provojnë marrëdhënie të qëndrueshme dhe arsye të forta shëndetësore.

Kërkesa aktuale për “banesë të përshtatshme” do të hiqet, por kantonet mund të kërkojnë ende kontratë qiraje.

Kur do të hyjnë në fuqi këto rregulla të reja?

Aktualisht, janë vetëm në letër.

Vendimin përfundimtar do ta marrin qytetarët zviceranë përmes referendumit, data e të cilit nuk është caktuar ende.

Paditë për ndalimin e blerjes së dronëve izraelitë nga Zvicra: A shkelet neutraliteti?

Posted on by Alb

Grupi për një Zvicër pa Ushtri, Lidhja Zvicerane për të Drejtat e Njeriut dhe Shoqata e Juristëve për Palestinën kanë paraqitur padi civile për të anuluar kontratën 250 milionë CHF mes Zvicrës dhe kompanisë izraelite Elbit për blerjen e dronëve ushtarakë.

Sipas paditësve, marrëveshja shkel ligjin ndërkombëtar dhe atë zviceran, pasi Elbit furnizon armë që përdoren në shkelje të të drejtës humanitare, ndërsa kompania reklamohet si “të testuara në betejë”. Ata pretendojnë gjithashtu se bashkëpunimi me Elbit bie ndesh me neutralitetin e sanksionuar në Kushtetutë.

Dorëzimi i dronëve është shtyrë deri në fund të vitit 2026, pasi kompania përqendroi prodhimin në pushtimin e Gazës. Paditësit e konsiderojnë këtë shtyrje si mbështetje indirekte të veprimeve ushtarake izraelite, të cilat akuzohen për krime lufte dhe gjenocid, transmeton albinfo.ch.

Nga ana tjetër, Armasuisse deklaroi se nuk ka marrë ende asnjë njoftim zyrtar për padinë, ndërsa deputeti UDC, Jean-Luc Addor, mbrojti kontratën duke theksuar se ajo nuk shkel neutralitetin, pasi Zvicra ka të drejtë të blejë sisteme për sigurinë e saj kombëtare.

Ardon Jashari rikthehet në stërvitje te Club Brugge

Posted on by BR

Ardon Jashari i është bashkuar Club Brugget në përgatitje për edicionin e ardhshëm.

Mediat belge raportojnë se ylli shqiptar ka ushtruar në mëngjesin e sotëm rregullisht në kampin Belfius pasi kishte munguar në angazhimet paraprake.

Jashari fillimisht do të ushtrojë individualisht para se t’i bashkohet më pas grupit të futbollistëve në stërvitje, transmeton albinfo.ch.

Për ta parë përfaqësuesin zviceran në aksion edhe në fushën e blertë duhet të presim deri më 27 korrik për ndeshjen e xhiros së parë të sezonit të ri kundër Genkut.

Sa u përket bisedimeve me Milanin, portali belg shpjegon se po vazhdon “status quo”.

Po shtohen gjithnjë mundësitë që ish-futbollisti i Luzernit të qëndrojë në Belgjikë edhe në edicionin e ardhshëm, aty ku ishte shpallur futbollisti i vitit për sezoni 2024/25.

Në ditët e kaluara Jashari nuk kishte marrë pjesë në disa evente publike të Club Brugge, prej tyre edhe në prezantimin e fanellave të tyre dhe në festën e tifozëve.

Sidoqoftë, ai sot ishte prezent në stërvitje dhe duket se është rikthyer qetësia e stabiliteti në Club Brugge.

Lojtari nuk e ka fshehur dëshirën për t’iu bashkuar Milanit duke hequr madje dorë nga disa oferta që i kishin ardhur, përfshirë ato nga Anglia e nga Gjermania.