Archives

Ambasadori i ri gjerman: Jam optimist se në Kosovë do të ketë shpejt një qeveri me të cilën mund të bashkëpunojmë

Posted on by Drin Reçica

Ambasadori i sapo emëruar gjerman në Prishtinë, Ranier Rudolph, është shprehur optimist se Kosova shumë shpejt do të formojë qeverinë e re me të cilën mund të bashkëpunojnë.

Me rastin e pritjes për shënimin “Ditës së Bashkimit Gjerman”, diplomati  gjerman, nënvizoi se shteti i tij është dhe do të mbetet mik dhe partner i fortë i Kosovës, raporton KosovaPress.

“Këtu në Kosovë, jam optimist që shumë shpejt do të ketë një qeveri, e cila do të jetë plotësisht e mandatuar si partner me të cilin qeveria jonë mund të bashkëpunojë”, theksoi ai.

Diplomati gjerman ritheksoi mbështetjen karshi ambicies evropiane të Kosovës si dhe integrimin e saj ndërkombëtarë.

“Gjermania është dhe mbetet një mik dhe partner i fortë. Ne jemi krenarë që kemi mbështetur rrugëtimin e Kosovës që shumë para pavarësisë së saj dhe do të vazhdojmë ta bëjmë këtë. Qeveria jonë, e cila mori detyrën në maj, konfirmoi mbështetjen tonë të gjatë për Ballkanin Perëndimor si një nga prioritetet kryesore të politikës sonë të jashtme. Edhe në parlamentin tonë, Bundestagun, mbështetja dhe miqësia me Kosovën janë të thella dhe të  në të gjitha partitë demokratike, siç e përjetova në shumë biseda javët e fundit në Berlin….Kosova është pjesë e Evropës. Unë dua të mbështes ambiciet evropiane të Kosovës dhe integrimin e saj ndërkombëtar. Procesi i zgjerimit të BE-së është një prioritet personal për ministrin e Jashtëm Johann Wadephul. Për secilin prej nesh në Evropë, hapi i parë drejt integrimit evropian është forcimi i marrëdhënieve dhe bashkëpunimit rajonal me fqinjët tanë përkatës”, shtoi ai.

Barcelona po monitoron Fisnik Asllanin, ylli kosovar drejt Spanjës

Posted on by Drin Reçica

Barcelona po e monitoron sulmuesin e Kosovës, Fisnik Asllanin, ka raportuar të enjten në mbrëmje gazetari i “SkySportit” në Gjermani, Florian, përcjell albinfo.ch.

Siç ka shkruar Plettenberg në X, 23-vjeçari ka klauzolë te klubi i tij aktual Hoffenheim për verën e ardhshme.

“Barcelona është e njoftuar”, ka shkruar ai.

Madje siç ka shkruar Plettenberg, “kalimi në një top-klub evropian është tërësisht i planifikuar dhe klubi i ardhshëm i Asllanit pritet të garojë në Ligën e Kampionëve”.

“Klubi im i ëndrrave gjithmonë ka qenë Barcelona. Gjithmonë kam dashur të luaj aty”, i ka thënë Asllani ditë më parë “Sport Bildit”.

Në edicionin aktual, Asllani ka pasur gjashtë paraqitje në Bundesligë. Ka realizuar katër gola dhe ka asistuar një herë. Ndërkaq ditë më parë realizoi golin historik në fitoren e Kosovës si mysafire e Suedisë për ta afruar te shansi i madh për kualifikim në plejof për kualifikim në Botërorin e vitit 2026. Te Kosova në këto kualifikime ka realizuar një gol në tri paraqitje.  

Rama heq pagesën te Rruga e Kombit për protestën në Tiranë

Posted on by Drin Reçica

Pikërisht në ditën kur Albin Kurti është kthyer pas në kohë për t’i përmendur Edi Ramës mëkatet e të shkuarës, kur udhëtonte me avion drejt Prishtinës për ngritjen e Gjykatës Speciale, zv.kryeministrja Belinda Balluku ka marrë një vendim që u kujton qytetarëve të Kosovës një mëkat tjetër të Edi Ramës; vendosja e taksës në Rrugën e Kombit, përcjell albinfo.ch.

Në një postim në rrjetet sociale, Balluku njofton se ka marrë një vendim simbolik, se do ta heqë taksën e rrugës së Kombit në datën 17 tetor kur në Tiranë të zhvillohet protesta në mbështetje të komandantëve të UÇĶ.

“Rruga e Kombit pa pagesë në datë 17 Tetor! “Liria ka emër – Drejtësi për çlirimtarët”, bashkohemi në Tiranë për drejtësi, dinjitet dhe të vërtetën e luftës çlirimtare të Kosovës” shkruan Balluku në rrjetet sociale.

Por efekti i këtij akti simbolik për heqjen e taksës vetëm për një ditë, është krejt i kundërt.

Duke lehtësuar protestuesit që do të udhëtojnë nga Kosova, Balluku nuk ka bërë gjë tjetër veçse u ka kujtuar qindra mijëra qytetarëve të Kosovës se ishte qeveria e Edi Ramës që ua vendosi këtë taksë, megjithëse rruga ishte një investim fund e krye shtetëror, i paguar nga taksat e qytetarëve të Shqipërisë.

Mjafton pra ky akti i vogël i urdhëruar nga Rama për të treguar se sa hipokrite është qasja e qeverisë së Ramës ndaj Kosovës, të cilën kurdoherë e ka parë si një mjet në funksion të ambicieve personale.

Me flamujt kuq e zi dhe simbolet e UÇK-së, veturat nga Kosova nisen për në Shqipëri

Posted on by Drin Reçica

Vetura nga Kosova me flamujt kuq e zi dhe me tri germat “UÇK” shihen në drejtim të Shqipërisë, përcjell albinfo.ch.

Sot qytetarë nga gjitha trojet shqiptare do të bëhen bashkë në sheshin “Skenderbej” në kryeqytetin e Shqipërisë, Tiranë. Nga Shqipëria do të jehojnë thirrjet e shqiptarëve “Drejtësi per çlirimtarët”.

Nga Kosova në drejtim të Hagës, qytetit holandez, të mërkurën janë nisur edhe rreth 150 motoristë shqiptarë nga vende të ndryshme të Kosovës me bluza të veshura me mbishkrime “Liria ka emër”. Nga Haga, marshi i tyre do të vijojë edhe drejt Brukselit.

Përkrahje për protestë kanë deklaruar politikanë të ndryshëm shqiptarë nga Kosova dhe Shqipëria, teksa nga Kosova pritet të nisen rreth 60 autobusë me qytetarë që do t’i bashkohen protestës në Tiranë.

Autoritetet në Shqipëri dje kanë deklaruar se ‘Rruga e Kombit’ do të jetë pa pagesë për qarkullim sot me 17 tetor për të gjithë qytetarët në shenjë solidarizimi me protestën.

Kujtojmë se protestë në përkrahje të ish krerëve të UÇK-së u organizua edhe në Prishtinë dhe në Hagë.

Sot protestohet në Shqipëri, kërkohet drejtësi për ish–udhëheqësit e UÇK-së

Posted on by Drin Reçica

Bëhet e ditur se sot në Tiranë do të mbahet protestë në mbështetje të ish-udhëheqësve të Ushtrisë Çlirimtare të Kosovës, që për akuzat për krime lufte po gjykohen në Hagë, përcjell albinfo.ch.

Organizata e veteranëve të Luftës së UÇK-së, e cila e ka organizuar protestën ka njoftuar se mbi 60 autobusë do të nisen nga Kosova drejt Tiranës të premten.

Kjo organizatë ka njoftuar edhe se në periudhën 17 tetor, ora 9:00 – 18 tetor, ora 9:00, nuk do të ketë pagesë në Rrugën e Kombit.

Në mbështetje të protestës ka dalë edhe kryeministri i Shqipërisë Edi Rama. 

Protesta që do të mbahet në sheshin “Skenderbej” në Tiranë, është paraparë të mbahet në orën 17:00.

Protesta kundër Gjykatës Speciale e në mbështetje të Hashim Thaçit, Kadri Veselit, Rexhep Selimit dhe Jakup Krasniqit, janë mbajtur në gusht në Prishtinë, e në shtator te selia e Speciales në Holandë.

Thaçi, Veseli, Krasniqi dhe Selimi akuzohen nga Specialja për krime lufte e krime kundër njerëzimit. Ata janë duke u mbajtur në paraburgim që nga viti 2020.

Patentat në Gjermani kushtojnë deri në 4,500 euro, qeveria premton zbritje

Posted on by Drin Reçica

Çmimet për marrjen e patentës së shoferit në Gjermani po konsiderohen tepër të larta, dhe Ministri Federal i Transportit, Patrick Schnieder, ka paralajmëruar masa për t’i ulur ato, përcjell albinfo.ch.

Schnieder njoftoi se do të organizojë një takim me ministrat e landeve për komunikacion dhe shoqatat profesionale, për të diskutuar mënyrat konkrete të uljes së kostove. Planet e tij pritet të prezantohen zyrtarisht gjatë ditës së sotme.

Ndër masat e mundshme përfshihen ulja e çmimit të karburanteve për autoshkolla, reduktimi i qirave dhe kostove të personelit, si dhe rishikimi i tarifave të provimeve dhe orëve praktike.

Aktualisht, patenta e shoferit në Gjermani kushton mes 2,500 dhe 3,500 euro, ndërsa sipas ADAC, shumë kandidatë paguajnë deri në 4,500 euro, varësisht nga numri i orëve dhe rezultatet në provime.

Vetëm gjatë vitit të kaluar, çmimet u rritën me 5.8%, ndërsa 45% e kandidatëve dështojnë në provimin teorik dhe 37% në atë praktik.

“4,000 euro për patentë janë shumë para për familjet me fëmijë,” tha Schnieder, duke theksuar nevojën për ta bërë procesin më të përballueshëm financiarisht.

Shoqata “Bashkimi” në Bern organizon festë për 28 Nëntorin

Posted on by Drin Reçica

Shoqata Kulturore Shqiptare “Bashkimi” në Bern ka bërë të ditur se këtë vit do të organizojë një festë madhështore në nder të 28 Nëntorit – Ditës së Flamurit Kombëtar, transmeton albinfo.ch.

Ngjarja do të mbahet të shtunën, më 29 nëntor 2025, nga ora 18:00 deri në mesnatë, në Restaurant Ambiente, me adresë Bühlstrasse 5, 3012 Bern.

Për mbrëmjen është përgatitur një program artistik i pasur, nën tingujt e muzikës shqiptare. Publikun do ta argëtojnë Miranda Hashani, Xhemail Murtishi dhe Blerim Ramadani me orkestrën e tyre.

Organizatorët kanë bërë të ditur se vendet janë të kufizuara, prandaj pjesëmarrja bëhet vetëm me rezervim paraprak dhe konfirmim. Pagesa e hyrjes është 60 franga për person, me menu të përfshirë, dhe realizohet përmes xhirollogarisë me QR-Code të publikuar në fletushkën zyrtare të eventit.

Për më shumë informacion dhe rezervime, të interesuarit mund të kontaktojnë përmes emailit [email protected] ose në WhatsApp në numrat +41 76 746 84 63 dhe +41 78 711 93 99.

“Me shumë dashuri dhe respekt, ju ftojmë të festojmë së bashku Ditën e Flamurit dhe të kulturës sonë,” thuhet në njoftimin e Kryesisë së Shoqatës Kulturore Shqiptare “Bashkimi” Bern.

 

Behar Neziri, talenti shqiptar që ëndërron rikthimin te Bayerni

Posted on by Drin Reçica

Mesfushori 22-vjeçar Behar Neziri, i rritur në akademinë e Bayern Munchenit, po shkëlqen aktualisht me St. Gallenin në Superligën e Zvicrës, përcjell albinfo.ch.

Neziri ka luajtur në të gjitha tetë ndeshjet e këtij sezoni, duke impresionuar që në debutim me fitoren 2:1 ndaj Baselit. Ai thotë se ka pritur gjatë për këtë moment, pas dy vitesh të vështira me lëndime dhe huazimin te Wili.

“Kam dashur fanellën e Shaqirit, por ishte e rezervuar. Ndoshta herën tjetër,” ka thënë ai për Blick. Shaqiri mbetet një prej idhujve të tij, ndërsa të dy i lidh e kaluara te Bayerni dhe rrënjët kosovare.

Neziri iu bashkua Bayernit në vitin 2016 nga Augsburgu, ku luajti për ekipet e moshave dhe për ekipin e dytë. Në 2023 kaloi te St. Gallen U21, para se të bashkohej këtë verë me ekipin e parë.

Trajneri Enrico Maasen e vlerëson për inteligjencën taktike dhe kujdesin ndaj bashkëlojtarëve, ndërsa klubi e cilëson shembull profesionalizmi.

“Kam luajtur edhe me Musialën dhe Pavloviqin. Mund ta imagjinoj ta bëj këtë sërish, por me ekipin e parë të Bayernit,” thotë me ambicie Neziri, i cili ka përfaqësuar Kosovën U16, U19 dhe U21 dhe ishte pjesë e listës së gjerë për ndeshjet e shtatorit.

Udhëtare të pazakonta, tri pula në trenin S6 nga Esen në Këln

Posted on by Drin Reçica

Një ngjarje e pazakontë është regjistruar në një tren të linjës S6 nga Esen drejt Këlnit, ku tri pula janë gjetur në një nga vagonët e klasit të parë, të ulura qetësisht mbi një shtresë kashteje, transmeton albinfo.ch.

Sipas zëdhënësit të Deutsche Bahn, shpendët u vunë re vetëm në stacionin e fundit të linjës, kur makinisti kontrolloi trenin pas përfundimit të udhëtimit.

Pulat u dorëzuan më pas tek shërbimi i shpëtimit të kafshëve, ndërsa treni duhej të pastrohej plotësisht për shkak të ndotjes.

Ende nuk dihet kush i transportoi apo i la aty kafshët. Policia federale gjermane ka nisur hetimet për ndotje të hapësirave të transportit publik dhe po analizon pamjet e kamerave të sigurisë për të identifikuar personin përgjegjës.

Ngjarja ka ngjallur reagime të shumta në rrjetet sociale, ku shumë përdorues e kanë cilësuar incidentin si “një nga udhëtimet më të veçanta në historinë e Deutsche Bahn”.

Shteti evropian që miratoi ligjin që lejon deri në 13 orë pune në ditë

Posted on by Alb

Pas debatit të gjatë në parlament, Greqia ka miratuar një ligj të ri që lejon punonjësit të punojnë deri në 13 orë në ditë, raporton tgcom24.

Qeveria konservatore e ‘Demokracisë së Re’ e përshkruan këtë vendim si një reformë që synon të ofrojë “punë të drejtë dhe fleksibël për të gjithë”. Nga ana tjetër, sindikatat e vendit e kanë cilësuar masën si një legalizim të “skllavërisë së paguar”.

Ligji i ri, i nënshkruar nga ministrja e Punës Niki Kerameos, parashikon që punonjësit në sektorin privat mund të punojnë deri në 13 orë në ditë për të njëjtin punëdhënës, në mënyrë vullnetare dhe për një periudhë që nuk kalon 37 ditë në vit. Orët shtesë do të paguhen me një shtesë prej 40%.

Një ligj i mëparshëm, i miratuar dy vjet më parë, lejonte punë 13-orëshe vetëm nëse punonjësi kishte dy punëdhënës të ndryshëm.

Edhe pse sindikatat organizuan dy greva të përgjithshme për të kundërshtuar reformën, mazhoranca parlamentare e partisë në pushtet votoi në favor të saj. Demonstratat në qytetet kryesore u zhvilluan nën parulla që e përshkruanin këtë nismë si “kthim në Mesjetë” për të drejtat e punëtorëve.

Sipas Konfederatës së Përgjithshme të Punëtorëve Grekë, ky ligj cenon shëndetin dhe sigurinë e punonjësve, si dhe prish balancën mes jetës personale dhe asaj profesionale.

 

Beson në ëndrrën botërore: Foda gati të udhëheqë Kosovën drejt Botërorit 2026

Posted on by Alb

Pas një paraqitjeje mbresëlënëse në kualifikimet për Kupën e Botës 2026, përzgjedhësi i Kosovës, Franco Foda, ka shprehur publikisht dëshirën për të vazhduar bashkëpunimin me Federata e Futbollit e Kosovës përtej skadimit të kontratës aktuale.

Trajneri gjerman, i cili mori drejtimin e “Dardanëve” në vitin 2023, është shprehur i kënaqur me ambientin dhe profesionalizmin që ka gjetur në federatë dhe te grupi i lojtarëve. “Po, është e vërtetë që po zhvillojmë bisedime. Si unë si trajner, ashtu edhe federata, duhet të jemi të kënaqur me gjithçka nga kushtet e punës deri te bashkëpunimi profesional. Prandaj, është shumë e mundur që unë të qëndroj më gjatë në Kosovë,” ka deklaruar ai për mediumin “4-4-2”.

Kontrata e Fodës, e cila përfundon në korrik të vitit 2026, mund të zgjatet falë rezultateve pozitive që ka arritur përfaqësuesja e Kosovës kohët e fundit. Fitorja historike në fushën e Suedisë ka rritur ndjeshëm besimin në një kualifikim të mundshëm për Botërorin e ardhshëm, transmeton albinfo.ch.

Nëse Kosova nuk arrin ta sigurojë kualifikimin direkt në nëntor, trajneri dhe skuadra do të kenë një shans të dytë përmes fazës “play-off”, e cila zhvillohet në mars të vitit 2026.

 

Thermoplan vendos orar të shkurtuar pune për 355 punonjës pas tarifave të larta amerikane

Posted on by Alb

Kompania zvicerane Thermoplan, furnizues i madh i Starbucks, ka njoftuar se 355 nga rreth 500 punonjësit e saj në Zvicër do të kalojnë në orar të shkurtuar pune duke filluar nga 3 nëntori.

Vendimi vjen pas vendosjes së tarifave të reja doganore prej 39 % nga SHBA në gusht, të cilat kanë shkaktuar rënie të ndjeshme të porosive. Drejtori ekzekutiv i kompanisë, Adrian Steiner, tha se situata i ka bërë produktet e tyre “jo konkurruese” në tregun amerikan.

Thermoplan po shqyrton mundësinë e zhvendosjes së një pjese të prodhimit në Gjermani, ndërsa vazhdon negociatat me autoritetet doganore amerikane. Kompania shpreson të marrë një vendim deri në fund të vitit, ndërkohë që synon të shmangë shkurtimet e vendeve të punës.

Si u shndërrua energjia në një armë strategjike në konfliktin ukrainas

Posted on by Alb

Tre dimra lufte mes Rusia dhe Ukraina kanë treguar qartë: energjia është kthyer në një armë po aq të rëndësishme sa edhe armët konvencionale.

Në muajt e fundit, Kievi ka shtuar ndjeshëm sulmet ndaj rafinerive ruse të naftës, me synimin për t’i hequr Moskës të ardhurat që përdor për të financuar luftën. Nga ana tjetër, Rusia po intensifikon goditjet mbi sistemin energjetik ukrainas — veçanërisht infrastrukturën e gazit — duke treguar qartë rolin jetik të sektorit energjetik në këtë konflikt.

Ukraina godet zemrën e industrisë së naftës ruse

Që nga gushti 2025, Ukraina ka kryer rreth 30 sulme ndaj rafinerive dhe depozitave të karburantit në territorin rus dhe në zonat e pushtuara, veçanërisht në Krimea. Këto sulme kanë shkaktuar mungesa të karburantit në disa rajone, radhë të gjata në pikat e furnizimit dhe rritje të çmimeve të benzinës. Objektivi është i dyfishtë: të goditet opinioni publik rus dhe të kufizohet kapaciteti financiar i Moskës për të vazhduar luftën.

“Ukraina po vazhdon atë që kishte nisur, por tashmë me mjete më të avancuara,” shpjegon Thierry Bros, profesor në Sciences Po dhe ekspert energjetik. “Me dronë dhe raketa më të fuqishme, synimi është të reduktohet kapaciteti i rafinimit të Rusisë. Nëse kjo ndodh, Moska do të detyrohet të zgjedhë mes furnizimit të popullsisë së saj ose vazhdimit të eksporteve për të siguruar valutë të huaj.”

Inteligjenca amerikane në ndihmë të Kievit

Sipas raportimeve të mediave, deri në 38% të kapacitetit të rafinimit rus është prekur nga këto sulme — shifër që mbetet e vështirë për t’u verifikuar plotësisht. Sanksionet perëndimore po e bëjnë edhe më të ndërlikuar rikthimin në funksion të këtyre impianteve, pasi Rusia nuk mund të importojë më disa komponentë jetikë.

“Katalizatorët, që janë thelbësorë për funksionimin e rafinerive, vijnë kryesisht nga Perëndimi. Zëvendësimi i tyre kërkon kohë dhe ul ndjeshëm prodhimin,” shton Bros.

Moska po përpiqet të mbrohet me sisteme anti-dron, por për shkak të madhësisë së impianteve, mbrojtja është e vështirë. Sipas burimeve të cituara nga Financial Times, Shtetet e Bashkuara të Amerikës po i ofrojnë Kievit inteligjencë për planifikimin e disa prej këtyre sulmeve.

Rusia godet sistemin ukrainas të gazit

Nga ana tjetër, Rusia po vazhdon pa ndërprerje sulmet ndaj infrastrukturës energjetike të Ukrainës që nga viti 2022. Në fillim të tetorit, ajo ka lëshuar dhjetëra raketa dhe dronë mbi objektet e gazit ukrainas. Sipas autoriteteve në Kiev, rreth 60% e kapacitetit të prodhimit është dëmtuar.

“Këtë vit, taktika është shumë e qartë: të goditet prodhimi i gazit, nga i cili Ukraina varet shumë për sezonin e ngrohjes,” shpjegon Olena Pavlenko, eksperte energjie dhe presidente e Dixi Group. Sulmet synojnë jo vetëm prodhimin dhe magazinimin, por edhe gazsjellësit që përdoren për importime. “Objektivi i Rusisë është të privojë Ukrainën nga gazi — qoftë nga prodhimi vendas apo nga importet,” shton ajo.

Një reziliencë energjetike e detyruar

Pavarësisht dëmeve të mëdha, Ukraina po përshtatet. “Sistemi energjetik ishte shumë i centralizuar. Por që nga fillimi i sulmeve, komunitetet lokale kanë ngritur prodhime të tyre të pavarura me burime të rinovueshme, gaz apo gjeneratorë,” sqaron Pavlenko. Kjo “decentralizim i detyruar” është kthyer në një garanci mbijetese.

Por lufta e energjisë po prek edhe Evropën. “Magazinat e gazit në Bashkimi Evropian janë mbushur në 83%, kundrejt mbi 90% një vit më parë. Mund ta përballojmë një dimër të ftohtë, por nëse duhet të ndihmojmë edhe ukrainasit, situata bëhet shumë më e vështirë,” paralajmëron Bros.

BE vazhdon planin për të ndaluar tërësisht importet e gazit rus deri në fund të vitit 2027, i mbështetur fuqimisht nga Uashingtoni, që kërkon të rrisë eksportet e gazit të lëngshëm natyror.

Megjithatë, duke goditur prodhimin ukrainas, Moska dërgon një mesazh të qartë: pavarësisht sanksioneve, varësia energjetike mbetet një armë e fuqishme ndikimi në Evropë.

Donald Trump njofton takim me Vladimir Putin në Budapest

Posted on by Alb

Takimi i ardhshëm mes presidentit amerikan Donald Trump dhe homologut të tij rus Vladimir Putin pritet të zhvillohet në Budapest, Hungari. Njoftimi u bë të enjten nga presidenti amerikan, i cili nuk dha një datë të saktë për takimin.

Ky zhvillim erdhi pas një bisede telefonike me presidentin rus, gjatë së cilës Trump deklaroi se “është bërë përparim i madh”.

“Ne kemi vendosur që një takim i këshilltarëve tanë të lartë të mbahet javën e ardhshme. Takimet fillestare do të udhëhiqen nga Sekretari i Shtetit, Mario Rubio, në një vend që ende nuk është përcaktuar,” shkroi Trump në Truth Social.

“Më pas, Presidenti Putin dhe unë do të takohemi në Budapest për të parë nëse mund të japim fund kësaj lufte të turpshme midis Rusisë dhe Ukrainës.”

Ky do të jetë takimi i parë mes dy liderëve që nga takimi i 15 gushtit në një bazë ushtarake në Alaska, i cili nuk solli rezultate konkrete për zgjidhjen e konfliktit të nisur në shkurt 2022 me pushtimin rus të Ukrainës.

 

Verërat e Leskovikut, thesari i fshehur i Shqipërisë

Posted on by Alb

Leskoviku, një zonë e vendosur në juglindje të Shqipërisë pranë lumit Vjosë, është një rajon i njohur për prodhimin artizanal të verës dhe për klimën e veçantë që favorizon kultivimin e rrushit. Deri kohët e fundit, ky rajon ishte kryesisht i izoluar dhe i panjohur për jashtë, por sot po fiton vëmendje si një prej zonave më të rëndësishme të verës shqiptare.

Një nga kantinat më të njohura në këtë zonë është “Max Mavrud”, themeluar nga familja Fejzulla, e cila ka si qëllim të rikthejë dhe të promovojë traditën e verës në Leskovik. Kantina zotëron 17 hektarë vreshta në lartësi 750-780 metra mbi nivelin e detit, ku klima dhe tokat gëlqerore krijojnë kushte ideale për rritjen e rrushit. Verërat e prodhuara këtu karakterizohen nga një ekuilibër i mirë mes aciditetit, pjekurisë dhe freskisë.

Një nga produktet kryesore të kësaj kantine është vera “Trio3”, e përbërë nga një përzierje e rrushit lokal mavrud (50%) dhe varieteteve ndërkombëtare merlot (30%) dhe syrah (20%). Ky produkt qëndron në fuçi lisi franceze dhe hungareze për katër muaj para se të shitet, duke i dhënë asaj një shije të thellë dhe intensive.

Përveç prodhimit të verës, zona ka marrë vëmendje edhe për zbulime shkencore. Në fillim të vitit, një ekip shkencëtarësh çekë zbuloi liqenin termik nëntokësor më të madh në botë, “Liqeni Neuron”, pranë Leskovikut. Ky zbulim ka frymëzuar prodhimin e një vere speciale me të njëjtin emër, e bazuar ekskluzivisht në rrushin mavrud.

Leskoviku, megjithëse një destinacion i pazbuluar për shumicën e turistëve, ofron mundësi për të shijuar verëra autentike dhe produkte lokale, duke ruajtur një lidhje të fortë me natyrën dhe traditën e zonës.

 

Zvicra mbështet rritjen e transparencës në Kuvendin e Shqipërisë

Posted on by Alb

Kryetari i Kuvendit, Niko Peleshi, zhvilloi sot një takim me ambasadoren e Zvicrës në Shqipëri, Ruth Huber, ku në fokus të bisedimeve ishte forcimi i transparencës dhe afrimi i institucionit me qytetarët.

Gjatë takimit u theksua rëndësia e iniciativave që synojnë të rrisin pjesëmarrjen qytetare, siç është krijimi i një qendre të re për vizitorë — me qëllim informimin dhe përfshirjen e nxënësve e studentëve në jetën parlamentare. Po ashtu, u diskutua edhe për studimin e instrumentit të Referendumit, një model i suksesshëm në Zvicër që nxit demokracinë pjesëmarrëse.

Pjesë e bisedimeve ishte edhe zgjerimi i partneritetit ndërmjet parlamenteve të dy vendeve, me qëllim shkëmbimin e përvojave dhe forcimin e bashkëpunimit institucional.

Ambasada e Zvicrës nënvizoi se mbështetja e saj do të fokusohet në tre fusha kryesore: rritjen e transparencës, përmirësimin e procesit ligjvënës dhe forcimin e funksionit mbikëqyrës të Kuvendit.

 

BE: Mbrojtja kundër dronëve rusë, prioritet kryesor

Posted on by Alb

Komisioni Evropian shpreson që shtetet anëtare të Bashkimit Europian të arrijnë përparim të dukshëm në fushën e mbrojtjes ndaj dronëve të origjinës ruse.

Sipas informacioneve të marra, planet e armatimit në Bruksel kërkojnë që liderët e BE-së të miratojnë këtë vit një iniciativë të veçantë, e fokusuar kryesisht në mbrojtjen ndaj këtyre dronëve.

Faza e parë e prokurimit të sistemeve të përbashkëta të mbikëqyrjes dhe teknologjive mbrojtëse pritet të nisë së shpejti, me pjesë të funksionale që do të jenë në dispozicion deri në fund të vitit 2026, dhe me sistemin plotësisht funksional brenda vitit 2027.

Udhërrëfyesi i propozuar, i cili do të prezantohet nga Përfaqësuesja e Lartë për Punët e Jashtme të BE-së, Kaja Kallas, dhe Komisioneri për Mbrojtjen, Andrius Kubilius, thekson se shkeljet e përsëritura të hapësirës ajrore të vendeve anëtare kanë nxjerrë në pah nevojën urgjente për një kapacitet evropian mbrojtës kundër dronëve, që të jetë fleksibël, i përgjegjshëm dhe modern.

 

Siguria ajrore në Evropë rrezikohet nga presionet dhe kursimet në industri

Posted on by Alb

Një studim i fundit nga Universiteti i Ghent në Belgjikë tregon se siguria në linjat ajrore evropiane është kërcënuar seriozisht nga presionet për të punuar orë të gjata dhe nga shkurtime të shpenzimeve, sipas raportit të “The Financial Times”.

Studimi, që përfshiu rreth 6,900 punonjës të industrisë ajrore, evidenton se politikat për kursime dhe rritjen e fitimeve kanë dobësuar standardet e sigurisë. Pandemia COVID-19 ka përshpejtuar largimin e pilotëve me përvojë dhe zëvendësimin e tyre me punonjës të rinj, me kontrata të pasigurta, duke ulur kapacitetin për të mbajtur standardet e duhura.

Gjysma e punonjësve raportuan se ndihen të pasigurt për të shprehur shqetësimet e tyre ndaj menaxhmentit, dhe ekuipazhi i kabinës ndjen presion për të përmbushur detyra tregtare, si shitja e parfumeve dhe alkoolit gjatë fluturimeve, duke krijuar një konflikt mes sigurisë dhe kërkesave komerciale.

Pas rikthimit të trafikut ajror pas pandemisë, oraret e punës janë zgjatur dhe periudhat e pushimit janë reduktuar. Shumë pilotë dhe ekuipazh ndihen të frikësuar të raportojnë gjendjen e tyre shëndetësore, edhe nëse janë të lodhur ose të sëmurë.

Studimi vuri në pah se 68% e punonjësve kanë probleme me shëndetin mendor, ndërsa 78% ndihen të “dehumanizuar”. Punonjësit me kontrata afatshkurtra dhe ata në Evropën Lindore raportojnë kushtet më të vështira dhe pasiguri më të madhe.

Ekspertët paralajmërojnë se pa ndryshime në kontratat dhe rregulloret, Evropa mund të humbasë avantazhin e saj në sigurinë ajrore, duke e bërë industrinë më të ndjeshme ndaj gabimeve dhe aksidenteve.

Ignacio Plaza, sekretar i përgjithshëm i Shoqatës Evropiane të Pilotëve, theksoi nevojën për hetime urgjente dhe përmirësime të menjëhershme për të mbrojtur sigurinë e pasagjerëve dhe punonjësve.

 

Me revole dhe urdhër arresti: Arrestohet 41-vjeçari shqiptar në Gjermani

Posted on by albinfo.ch

Të mërkurën, Policia Federale e Passau ka arrestuar një 41-vjeçar shqiptar në pikën e kontrollit Rottal-Ost në A3. Ai mbante gjithashtu një armë zjarri pa leje.

Policia Federale e Passau njofton se e ka ndaluar personin në fjalë në një autobus rreth orës 2:50 të mëngjesit, transmeton albinfo.ch. Gjatë kontrollit, policët zbuluan një urdhër arresti të lëshuar ndaj tij nga Gjykata e Qarkut të Hamburgut. Ndaj tij ka dyshime serioze se ka kryer një vjedhje me thyerje në vitin 2017, shkruan pnp.de. Për këtë arsye, autoriteti përgjegjës kishte lëshuar një urdhër arresti për të.

41-vjeçari u arrestua më pas përkohësisht dhe u dërgua në stacionin e Policisë Federale të Passau. Atje, zyrtarët e policisë federale gjetën një pistoletë kalibri të vogël dhe tetë fishekë gjatë një kontrolli të bagazhit të tij. Burri i arrestuar kishte gjithashtu sprej piperi pa shenjën e kërkuar të miratimit, përcjell albinfo.ch. Gjatë marrjes në pyetje, ai deklaroi se e kishte blerë pistoletën në tregun e zi. Ai nuk ka leje për të mbajtur armë.

Departamenti i Hetimeve të Policisë Federale të Passaut më pas nisi një hetim për shkelje të Ligjit për Armët. Arma e zjarrit, municionet dhe spreji me piper u konfiskuan. Pas masave të marra nga policia, policët e çuan personin e përmendur në një qendër korrektuese.

Qeveria austriake do të ndalojë transportuesit elektrikë nga shtigjet e biçikletave sipas ligjit të ri të trafikut

Posted on by erezzaademi

Ministri i Transportit Peter Hanke (SPÖ) prezantoi projekt-amendamentin në Ligjin e Trafikut Rrugor (StVO) dhe ndryshimet në Ligjin e Automjeteve Motorike (KFG) dhe Ligjin e Lejes së Drejtimit (FSG) në një konferencë për shtyp në Vjenë të enjten.

Pikat kryesore: “Mopedët elektrikë” do të ndalohen nga shtigjet e biçikletave dhe do të zhvendosen në rrugë, rregullore të reja do të zbatohen për skuterët elektrikë dhe biçikletat elektrike – duke përfshirë një kërkesë të zgjeruar për helmetë – dhe do të futet një kuadër i ri ligjor për sistemet e menaxhimit të trafikut të bazuara në video, të tilla si ato të planifikuara për qendrën e qytetit të Vjenës, shkruan theinternational, përcjell albinfo.at.

Amendamenti i projekt-amendamentit omnibus tani do të hyjë në konsultim dhe është planifikuar të hyjë në fuqi më 1 maj 2026. Rregullat e reja në lidhje me mopedët elektrikë pritet të hyjnë në fuqi më 1 tetor 2026. Siç u njoftua tashmë në verë, “mopedët elektrikë” (L1-eB), të cilët aktualisht klasifikohen si biçikleta, do të riklasifikohen sipas Ligjit të Automjeteve Motorike, duke i zhvendosur ato në rrugë. Ato do të bëhen automjete motorike që i nënshtrohen kërkesave të regjistrimit (targës), sigurimit, patentës së drejtimit dhe kërkesave të detyrueshme për helmetë.

Ministria e Transportit po krijon një kornizë ligjore për bashkitë që të përdorin sisteme të bazuara në kamera për të rregulluar trafikun – diçka që Vjena e ka shtyrë për vite me radhë. Në të ardhmen, ndalimet e hyrjes dhe drejtimit të automjeteve me shumë korsi mund të monitorohen përmes sistemeve të automatizuara të menaxhimit të aksesit. Këto do të zbatohen vetëm për zonat e aksesit të përcaktuara qartë, siç janë pikat e hyrjes në qendrat e qyteteve. Zonat nën mbikëqyrje video do të shënohen me një shenjë shtesë që shfaq një simbol kamere dhe shenja të reja në trotuar.

Megjithatë, mbikëqyrja me kamera e korsive të autobusëve, trotuareve, shtigjeve të biçikletave ose zonave për këmbësorë si një masë e pavarur (“zgjidhje e pavarur”) nuk do të lejohet. I vetmi përjashtim do të jenë “rrugët e shkollave”, ku qetësimi i trafikut ka rëndësi të veçantë për sigurinë e fëmijëve. Automjetet motorike me një korsi, siç janë motoçikletat dhe mopedët, përjashtohen shprehimisht nga monitorimi i automatizuar.

Skuterët elektrikë dhe motorçikletat elektrike

Rregulla të reja do të zbatohen gjithashtu për skuterët elektrikë dhe biçikletat elektrike. Skuterët elektrikë tani do të klasifikohen në mënyrë të qartë si automjete, jo si pajisje të vogla transporti personal. Transporti i pasagjerëve ose i ngarkesave do të ndalohet, përdorimi i helmetës do të jetë i detyrueshëm deri në moshën 16 vjeç dhe skuterët duhet të jenë të pajisur me sinjale kthese dhe një zile. Kufiri i alkoolit në gjak do të ulet në 0.5. Për biçikletat elektrike, helmetat do të jenë të detyrueshme deri në moshën 14 vjeç.

Këshilla thelbësore për të shmangur përplasjen e kafshëve të egra në rrugët zvicerane këtë vjeshtë

Posted on by erezzaademi

Shoferët në Zvicër përballen me rreziqe të shumta gjatë drejtimit të automjeteve në vjeshtë dhe dimër, ku kafshët e egra kalojnë rrugën si një prej tyre. Por ka disa pjesë të vendit ku duhet të jeni më vigjilentë.

Kjo është ajo që del nga një studim i ri i publikuar nga sigurimi AXA, i cili shpenzoi “më shumë se 11.5 milionë franga në vitin 2024 për aksidente me kafshë të egra”.

Megjithatë, rreziku i një takimi të tillë ndryshon shumë nga një kanton në tjetrin, “sepse probabiliteti i goditjes së një kafshe nuk është i njëjtë në të gjitha rajonet e Zvicrës”.

Këtu është vendi ku incidenca është më e lartë

Sipas AXA, “rreziku i përplasjes me kafshë është veçanërisht i lartë në kantonet Fribourg, Jura, Thurgau dhe Schaffhausen”.

Në fakt, frekuenca e aksidenteve të lidhura me kafshët në ato rajone – domethënë, numri i aksidenteve për automjet të siguruar – është midis 5 dhe 6.9 përqind.

Kjo për shkak se “kantonet rurale kanë më shumë rrugë që kalojnë nëpër pyje dhe, në përgjithësi, ka më shumë kafshë të egra, gjë që rrit rrezikun e përplasjeve”, tha Michael Villiger, Drejtor i Kërkesave për Automjete Motorike dhe anëtar i Qendrës së Kompetencës së Lëvizshmërisë të AXA-s.

Këto shifra janë rreth dy herë më të larta se mesatarja zvicerane (3.2 përqind) dhe deri në tetë herë më të larta se në Basel-City (0.8 përqind), ku numri i aksidenteve që përfshijnë kafshë të egra është më i ulëti në Zvicër.

Jini vigjilentë

Kafshët gjithmonë paraqesin rrezik, “por kërkohet vigjilencë shtesë në tetor, nëntor dhe dhjetor sepse kur ditët shkurtohen, kafshët e egra kanë më shumë gjasa të kryqëzojnë rrugët me shoferët”, paralajmëroi AXA.

“Dhe në dimër, drerëve u pëlqen të lëpijnë mbetjet e kripës përgjatë rrugëve. Meqenëse është errësirë ​​në mëngjes dhe në mbrëmje, ato shihen vetëm vonë, ose shumë vonë.”

Prandaj, gjatë këtyre kohërave të ditës, shoferëve u këshillohet të rregullojnë shpejtësinë e tyre, veçanërisht rreth shenjave rrugore dhe në pjesët e rrugës që kalojnë nëpër pyje.

AXA gjithashtu sugjeron sa vijon:

Ndizni dritat e gjata të dritave kur të jetë e mundur, në mënyrë që kafshët e egra t’ju shohin sa më shpejt të jetë e mundur.
Sapo të shihni një kafshë të egër në buzë të rrugës, frenoni menjëherë, ulni dritat dhe bini borinë nëse kafsha nuk largohet. Kini kujdes nga çdo automjet pas jush.

– Jini të përgatitur për më shumë kafshë të egra në të njëjtin vend, pasi kafshët shpesh enden në grupe. Kjo do të thotë që nëse ka një kafshë, ka edhe të tjera, kështu që sapo kafsha kryesore të largohet, tufa pothuajse gjithmonë do t’ju ndjekë.
– Nëse një kafshë e egër hidhet papritur përpara makinës suaj, gjëja më e mirë që duhet të bëni është të frenoni fort, madje edhe në një rrugë të rrëshqitshme, sepse frenat anti-bllokues do të parandalojnë rrëshqitjen e makinës suaj. Kjo mund të zvogëlojë energjinë dhe të minimizojë ndikimin e çdo përplasjeje të mëvonshme. Shoferët duhet të shmangin devijimin e mprehtë.

Çfarë të bëni nëse godisni një kafshë të egër?

Raportojeni menjëherë këtë aksident në polici, duke telefonuar numrin e tyre të urgjencës në të gjithë vendin, 117.

“Kushdo që vonon raportimin e aksidentit në polici po kryen një akt të dënueshëm”, tha AXA.

Këta shoferë mund të përballen edhe me ndjekje penale për keqtrajtim neglizhent ose mizori ndaj kafshëve.

(Megjithatë, nuk ka detyrim ligjor për të raportuar përplasjet fatale me zogj, bretkosa dhe kafshë të vogla të egra të ngjashme).

Kush paguan për dëmin e makinës suaj?

Kjo përgjigje vjen nga një kompani tjetër sigurimi, Zurich.

“Dëmi do të mbulohet nga sigurimi i pjesshëm i makinës ose sigurimi plotësisht gjithëpërfshirës. Nëse ndodh një përplasje me një kafshë të egër, sigurimi i pjesshëm i kaskos do të mbulojë dëmin e makinës suaj. Nëse, megjithatë, dëmi është rezultat i një manovre shmangieje, atëherë do të hyjë në lojë sigurimi plotësisht gjithëpërfshirës.”

Cilat kompani zvicerane të sigurimeve shëndetësore janë më të lira në vjeshtën e vitit 2025?

Posted on by erezzaademi

Primet e sigurimit shëndetësor në Zvicër do të rriten mesatarisht me 4.4 përqind në vitin 2026 – me banorët e disa kantoneve që paguajnë edhe më shumë. Por një studim i ri tregon se ku janë marrëveshjet më të mira.

Kostoja në rritje e sigurimit të detyrueshëm shëndetësor (KVG/LaMal) përcaktohet nga disa faktorë, duke përfshirë rritjen e kostove të kujdesit shëndetësor, të nxitura nga faktorë si një jetëgjatësi më e gjatë, çmimi i lartë i përparimeve mjekësore dhe ilaçeve, dhe një rritje e kërkesës për frymë për shërbime.

Gjithashtu, kostoja e administrimit të skemës së sigurimit të detyrueshëm shëndetësor – duke përfshirë pagat e punonjësve, kostot e reklamimit dhe shpenzimet e tjera të biznesit – po rritet çdo vit.

Sipas platformës së konsumatorëve Moneyland, mesatarisht, 190 franga të parave që secili mbajtës police pagoi për sigurimin e detyrueshëm shëndetësor në vitin 2024 shkuan për të mbuluar shpenzimet operative.

Pse është i rëndësishëm ky fakt?

Edhe pse përqindja e shpenzuar për tarifat administrative është relativisht e vogël, siguruesit me kosto më të larta do të kenë një pjesë më të madhe të primeve të tyre të ndarë për shpenzime të përgjithshme.

Kjo mund të kontribuojë në prime më të larta krahasuar me ofruesit që janë më efikasë në aspektin e kostove administrative.

“Shumë banorë fajësojnë rritjen e çmimeve për sigurimin e detyrueshëm shëndetësor për kostot administrative të gjeneruara nga ofruesit e sigurimeve shëndetësore,” vuri në dukje Moneyland, transmeton thelocal.

Kjo është një pikë e rëndësishme, duke pasur parasysh se transportuesit e sigurimeve shëndetësore duhet t’i informojnë klientët e tyre për tarifat e reja të vitit 2026 deri në fund të tetorit, dhe mbajtësit e policave që duan të kalojnë në një plan më të lirë duhet ta bëjnë këtë deri më 30 nëntor, jo më vonë.

Për të sjellë transparencë në këtë proces, një platformë tjetër për konsumatorët, Comparis, shqyrtoi marrëdhënien midis kostove administrative dhe primeve dhe doli me kompani që ngarkojnë shumat më të larta dhe më të ulëta për të dyja.

Ajo publikoi gjetjet e saj, bazuar në numrat e vitit 2024, më 16 tetor 2025.

Fituesit dhe humbësit

Krankenkasse Luzerner Hinterland ishte fondi më efikas i sigurimeve shëndetësore në vitin 2024, zbuloi Comparis.

“Ajo i uli kostot e saj administrative me 31.55 franga krahasuar me vitin e kaluar dhe shpenzoi vetëm 2.4 përqind për kostot administrative për person të siguruar.”

Një mbajtës police paguante mesatarisht 3728.90 franga në vit për prime sigurimi bazë.

Sumiswalder Krankenkasse (103.50 franga) dhe Sodalis Gesundheitsgruppe (128.80 franga) ishin përkatësisht në vendin e dytë dhe të tretë.

Në anën tjetër të spektrit, Krankenkasse Birchmeier, pati kostot më të larta administrative: shpenzoi 513.95 franga për person të siguruar për administrim – 11.90 më shumë se vitin e kaluar.

Primi i saj mesatar vjetor arriti në gati 4,351 franga, përcjell albinfo.ch.

Midis 25 përqind të fondeve të sigurimeve shëndetësore me kostot më të larta administrative në vitin 2024 ishin edhe sigurues të ndryshëm të vegjël dhe të mesëm si Sanitas Grundversicherungen AG, Vivao Sympany SA, Assura-Basis SA dhe Atupri Health Insurance SA.

Prime më të ulëta dhe më të larta

Kompania e sigurimeve shëndetësore Visperterminen kishte primet mesatare më të ulëta – mesatarisht 3178,25 franga në vit. U gjet Comparis.

Tjetra ishte Sanavals Gesundheitskasse (3320.25 franga), e ndjekur nga Einsiedler Krankenkasse (3361.75).

Megjithatë, personat e siguruar me një degë të Visanës, vivacare AG, paguan primet më të larta vjetore: 5,025,30 franga.

Gjithashtu, për sa i përket efikasitetit, vivacare AG u rendit e 31-ta nga 39 kompanitë e sigurimeve shëndetësore të anketuara, me kosto administrative prej 223.65 frangash për person.

Ata të siguruar me Mutuel Assurance Maladie SA paguan një prim prej 4,927.95 frangash. Me kosto administrative prej 203.80 frangash, kompania renditet gjithashtu midis 25 përqind më pak efikaseve.

Kompania e tretë më e shtrenjtë e sigurimeve në vitin 2024 ishte Easy Sana Assurance Maladie SA, me një prim mesatar prej 4,893.55 frangash dhe kosto administrative prej 176.10 frangash.

A është ky informacion i dobishëm për ju për primet e vitit 2026?

Po, sepse kompanitë që njihen për norma administrative më të ulëta/më të larta zakonisht e ruajnë politikën e tyre të çmimeve në planin afatgjatë.

Edhe pse primet e tyre do të rriten me 4.4 përqind në vitin 2026 (dhe edhe më shumë në disa kantone), në përgjithësi ato ka të ngjarë të jenë pak a shumë konkurruese.

Nëse doni të ndërroni, por ende nuk keni filluar të kërkoni mundësi më të lira, tani është koha për ta bërë këtë.

Megjithatë, është shumë e rëndësishme të përdorni vetëm burimet më të besueshme për kërkimin tuaj.

Në Zvicër, këto të treja janë të besueshme:

Priminfo
Comparis
Moneyland