Pas dorëheqjes së ministrit Liburn Aliu, Hysen Durmishi është caktuar ushtrues detyre i Ministrisë së Mjedisit, Planifikimit Hapësinor dhe Infrastrukturës në Kosovë. Deri më tani, Durmishi ka shërbyer si zëvendësministër.
Në një njoftim, Zyra e Kryeministrit thekson se Albin Kurti e ka uruar Durmishin për përgjegjësinë e re dhe i ka dëshiruar suksese në detyrë. Aliu dha dorëheqjen pas zgjedhjes së Dimal Bashës si kryeparlamentar, duke argumentuar se zgjedhja nuk ishte në përputhje me idealet e tij për Republikën.
SBB planifikon të marrë me leasing deri në 40 trenë të shpejtë për linjat ndërkombëtare drejt Italisë dhe Francës, duke shmangur blerjen e tyre për shkak të situatës së vështirë financiare. Modeli i leasing-ut ofron fleksibilitet dhe mundëson kalimin tek trenat e rinj pas 15 vitesh.
Trenat do të ndërtohen sipas specifikimeve të SBB-së, por pronësia do të mbetet tek kompania leasing-u, ndërsa SBB do të paguajë një tarifë mujore plus një margjinë për ofruesin. Tenderi për leasing-un është publikuar tashmë, dhe CEO i SBB-së, Vincent Ducrot, do ta shpjegojë më hollësisht në konferencën gjysmëvjetore me mediat.
Sipas SBB-së, leasing-u është një zgjidhje për të kursyer shpenzime, ruajtur likuiditetin dhe ruajtur fleksibilitetin, ndërsa lidhjet me Londrën mbeten sfiduese për shkak të kontrolleve kufitare jashtë zonës Schengen.
Një ekip kërkimor kinez ka kryer me sukses transplantimin e një mushkërie të majtë të modifikuar gjenetikisht nga një derr miniaturë Bama tek një person me tru të vdekur, duke shënuar rastin e parë të këtij lloji në botë. Ky hap mund të ndihmojë në zvogëlimin e mungesës së organeve për donatorë.
Derri dhurues ishte modifikuar në gjashtë pika gjenetike për të ulur rrezikun e refuzimit imunitar. Pas operacionit, mushkëritë funksionuan normalisht për 9 ditë pa shenja refuzimi ose infeksioni.
Ekipi synon të përmirësojë trajtimet gjenetike dhe anti-refuzimin për të zgjatur mbijetesën e organeve. Një teknikë e re pa intubim është gjithashtu në testim për të reduktuar dëmtimet gjatë ventilimit.
Studimi u realizua sipas standardeve etike dhe ligjore, me pëlqimin e familjes së pacientit, dhe u ndërpre në ditën e nëntë sipas kërkesës së tyre.
Ksenotransplantimi konsiderohet një nga fushat më sfiduese në mjekësi, veçanërisht për mushkëritë për shkak të ndjeshmërisë së tyre dhe kontaktit të vazhdueshëm me ajrin. Kina ka qenë në krye të këtij kërkimi, pas transplantit të parë të mëlçisë së derrit të modifikuar vitin e kaluar.
Qeveria e Shqipërisë njofton se nga 15 shtatori, kalimi në Tunelin e Llogarasë do të ketë tarifë 10 euro për vajtje-ardhje për automjetet. Më parë, ministrja e Infrastrukturës kishte deklaruar se qarkullimi do të ishte falas deri në fund të sezonit turistik.
Tuneli, me gjatësi 5.9 km, zvogëlon ndjeshëm kohën e udhëtimit nga Dukati drejt Palasës nga 45 minuta sa nevojitej përmes Qafës së Llogarasë, tani përshkrohet për vetëm 7 minuta. Projekti përfshin dy tunele, ku njëri shërben si tunel emergjence dhe mund të aktivizohet sipas nevojës gjatë fluksit të turistëve.
Menaxhimi i pagesave dhe mirëmbajtja e sistemit do të bëhet nga Enti Kombëtar i Operimit Rrugor, një kompani shtetërore nën administrimin e Ministrisë së Infrastrukturës dhe Energjisë.
Aktualisht, rrugët me pagesë në Shqipëri janë: Milot-Morinë, Thumanë-Kashar dhe Dukat-Palasë.
Pas shtatë vitesh kërkimesh, specialistët në Institutin Federal të Teknologjisë në Cyrih (ETHZ) kanë zbuluar sekretin e qëndrueshmërisë së shkumës së birrës.
Ky zbulim u publikua më 27 gusht 2025 në revistën Physics of Fluids.
Ekipi i udhëhequr nga Jan Vermant tregoi se birrat belge të fermentuara trefish kanë shkumbën më të qëndrueshme, ndërsa lagerët e fermentuar në fund dallohen për shpërbërjen e shpejtë të saj.
Deri tani besohej se proteinave të maltit të elbit të cilat ndikojnë në viskozitet dhe tension sipërfaqësor u takonte roli kryesor në forcën e shkumës. Studimi tregon se kjo është e vërtetë vetëm për lagerët, ku përmbajtja më e lartë e proteinave siguron stabilitet më të madh.
Në birrat e fermentuara disa herë, hyn në lojë një fenomen tjetër fizik: Efekti Marangoni rrjedhat sipërfaqësore të krijuara nga ndryshimet e tensionit, që ndihmojnë në forcimin e flluskave.
Një rol vendimtar luan edhe proteina LTP1, e cila ndryshon strukturën gjatë fazave të ndryshme të fermentimit, duke formuar membrana ose fragmente që e stabilizojnë më tej shkumën.
Kërkimi u zhvillua në bashkëpunim me një nga kompanitë më të mëdha të prodhimit të birrës në botë, që synon të përmirësojë cilësinë e produkteve të saj.
“Tashmë i njohim saktësisht mekanizmat dhe mund të mbështesim industrinë”, deklaroi Vermant.
Një raport i ri i Këshillit Federal thekson se racizmi dhe antisemitizmi në Zvicër regjistrohen në mënyrë të pamjaftueshme.
Sipas raportit, mbledhja aktuale e të dhënave fokusohet kryesisht tek raste të izoluara, gjë që çon në një numër të lartë incidentesh të paregjistruara. Për të mbyllur këto boshllëqe, që nga viti 2026 do të zbatohen masa të reja, përfshirë përmirësimin e mbledhjes së të dhënave.
Raporti i porositur nga Parlamenti arrin në një përfundim të qartë: ekzistojnë mangësi të mëdha në regjistrimin e rasteve të racizmit dhe antisemitizmit në Zvicër. Për këtë arsye, Këshilli Federal ka paralajmëruar veprime konkrete.
Shumë raste mbeten të paregjistruara
Në raport, Këshilli Federal pranon se diskriminimi strukturor dhe përvojat e të prekurve shpesh nuk pasqyrohen, duke krijuar një numër të madh incidentesh të paregjistruara. Sipas tij, procedurat aktuale të sondazhit nuk japin një pasqyrë realiste mbi përhapjen e racizmit dhe antisemitizmit në vend.
Racizmi dhe antisemitizmi, sidomos në kohë krizash ndërkombëtare, paraqesin një problem serioz për Zvicrën. Prandaj, monitorimi i plotë është thelbësor për parandalim efektiv.
Masa të reja nga viti 2026
Për të përmirësuar situatën, Këshilli Federal planifikon që nga viti 2026 të zbatojë masa të reja:
regjistrim më i detajuar i përvojave të diskriminimit,
përfshirja më e madhe e personave të prekur dhe komunitetit shkencor,
opsione më të thjeshtuara për raportim.
Këto propozime mund të përfshihen në Planin Kombëtar të Veprimit kundër Racizmit dhe Antisemitizmit.
Sindikata VPOD dhe kompania e shërbimeve tokësore Airline Assistance Switzerland (AAS) kanë arritur marrëveshje për një plan social në Aeroportin e Cyrihut.
AAS kishte vendosur të mbyllte aktivitetin dhe të pushonte nga puna rreth 210 punonjës. Fillimisht, kompania refuzoi të hartonte plan social, gjë që solli grevën e punonjësve të premten e kaluar.
Pas presionit të grevës, AAS ra dakord me kërkesat e sindikatës. Punonjësit do të marrin shpërblime dhe mbështetje për t’u sistemuar në kompani të tjera të shërbimeve tokësore, me synim që kalimi të bëhet deri në fund të tetorit.
Gratë e martuara në Zvicër vazhdojnë të përballen me një hendek të madh në paga krahasuar me burrat e martuar, veçanërisht nënat. Sipas një raporti të Zyrës Federale të Statistikave, të miratuar të mërkurën nga Këshilli Federal, diferenca mesatare arrin në 16% si në sektorin privat ashtu edhe në atë publik, ndërsa për punonjësit beqarë hendeku është vetëm 1.3%, shkruan RTS, transmeton albinfo.ch.
Të dhënat tregojnë se diferenca në paga thellohet ndjeshëm tek të martuarit me fëmijë, ku arrin në 21%. Ndërkohë, gratë beqare pa fëmijë fitojnë vetëm 1.9% më pak se burrat beqarë. Raporti thekson gjithashtu se hendeku gjinor në paga rritet me moshën: nga 6.6% për grupmoshën nën 29 vjeç, në 12.6% për moshën 30-49 vjeç dhe deri në 19.7% për ata mbi 50 vjeç.
Diferencat janë të dukshme edhe sipas shkallës së punësimit dhe hierarkisë profesionale. Gratë me kohë të plotë fitojnë mesatarisht 11% më pak se burrat, ndërsa në pozicionet e larta diferenca arrin në gati 15%. Përveç faktorëve strukturorë si arsimi, përvoja dhe pozicioni, raporti vëren se rreth 48% e hendekut në paga mbetet e pashpjegueshme dhe mund të lidhet me diskriminim.
Autorët e raportit rekomandojnë që institucionet të adresojnë pabarazitë në shpërndarjen e punës shtëpiake dhe kujdesit për fëmijët, si dhe të përmirësojnë kushtet e punës e politikat tatimore, transmeton albinfo.ch.
Në gjysmën e parë të vitit 2025, Skyguide, shërbimi zviceran i trafikut ajror, trajtoi 868,000 fluturime mbi hapësirën ajrore të vendit. Sipas të dhënave të publikuara të mërkurën, 94.6% e fluturimeve u kryen në kohë, duke shënuar një përmirësim të ndjeshëm dhe duke e afruar saktësinë pranë niveleve para pandemisë, shkruan Swissinfo, transmeton albinfo.ch.
Shumica e vonesave ishin të lidhura me kushtet e motit, ndërsa Skyguide thekson se përmirësimi i saktësisë është rezultat i përparimeve teknologjike dhe menaxhimit të trafikut ajror.
Kompania regjistroi një fitim prej 8 milionë frangash në gjashtëmujorin e parë dhe planifikon të shlyejë kredinë prej 250 milionë CHF që mori nga Konfederata gjatë pandemisë deri në vitin 2029.
Skyguide gjithashtu po punon për projektin e dixhitalizimit “Qendra Virtuale”, i cili pritet të përfundojë deri më 2027 dhe do të kontribuojë në rritjen e efikasitetit dhe saktësisë së fluturimeve, transmeton albinfo.ch.
Një grua kosovare është dënuar të hënën në Gjykatën Rajonale të Vjenës për mashtrim të rëndë tregtar, pas mashtrimit të 24 klientëve në Austri me mbi 100,000 euro përmes një platforme tregtare të rreme, shkruajnë mediat austriake, transmeton albinfo.ch.
Prokurori i lartë publik shpjegoi se skema e mashtrimit fillonte me një telefonatë: viktimat merrnin thirrje nga persona që prezantonin veten si zyrtarë policie, përfaqësues të Microsoft-it ose përfaqësues të një platforme tregtare fitimprurëse. Banda i mashtroi klientët duke u bërë të besonin se mund të fitonin shuma të pabesueshme përmes investimeve në kriptovaluta.
31-vjeçarja kosovare ishte pjesë e një grupi që drejtonte një qendër thirrjesh në Prishtinë me 150 punonjës. Ata krijuan një faqe online që dukej ligjore dhe bënin reklama për të joshur viktimat. Investitorëve u premtohej se me vetëm 250 € mund të grumbullonin deri në 100,000 € brenda pak ditësh.
Ajo rrëfeu në gjykatë se përfitonte nga çdo investim i përfunduar, duke marrë rreth 2,000-3,000 euro në muaj plus komisione. Paratë e investitorëve përfundonin te operatorët përmes kompanive fiktive dhe llogaritë e tyre “digjeshin” nëse ata kërkonin të tërhiqnin fondet.
E pandehura tha se fillimisht nuk kishte dyshime, por presioni nga banda u bë gjithnjë e më i madh, duke e bërë të ndjejë “shumë keq” për veprimet e saj.
Gjykata vendosi 14 muaj burgim, pjesërisht me kusht, me një pjesë të pa kushtëzuar, dënim që tashmë është i formës së prerë.
Në Gjermani, po ashtu, kjo grua dyshohet të ketë mashtruar mbi 100 viktima me dëme që arrijnë në 570,000 €, por gjykata e Vjenës u mor vetëm me rastet e brendshme, transmeton albinfo.ch.
Një krahasim ndërkombëtar i çmimeve të udhëtimit me tren dhe aeroplan tregon se pasagjerët nga Zvicra shpesh paguajnë më shumë për udhëtimin me tren sesa për fluturimet me kosto të ulët në Evropë. Ky është përfundimi i një studimi të ri nga organizata mjedisore Greenpeace, shkruan The Local, transmeton albinfo.ch.
Analiza u fokusua në 142 rrugë ndërkufitare në 31 vende evropiane dhe zbuloi se në 54% të 109 rrugëve ndërkufitare, fluturimet ishin më të lira se trenat. Nga tetë rrugë të zakonshme ndërkombëtare nga Zvicra, disa treguan performancë të mirë, ndërsa të tjera mbetën të shtrenjta.
Për shembull, udhëtimet me tren midis Cyrihut dhe Brukselit dhe Cyrihut dhe Vjenës ishin më të lira se biletat e avionit në tetë ose nëntë nga nëntë ditë të studiuara. Rruga Cyrih-Berlin dhe Gjenevë-Paris gjithashtu u gjetën kryesisht më të lira me tren.
Megjithatë, rrugët që lidhin Gjenevën me Barcelonën, Aeroportin Evropian të Bazelit me Zagrebin, dhe Madridin dhe Romën me Cyrihun ishin më të shtrenjta me tren sesa fluturimi. Greenpeace vuri në dukje se Gjeneva, ndryshe nga Cyrihu, është më pak e lidhur me tren dhe nuk ofron linja nate, gjë që e kufizon udhëtimin miqësor ndaj klimës.
Në përgjithësi, Zvicra renditet në mes për krahasim me vendet e tjera evropiane: 50% e rrugëve ndërkufitare janë kryesisht më të shtrenjta me tren dhe 50% kryesisht më të lira. Ky rezultat ngjason me situatën në Gjermani dhe Austri, vende me gjuhë gjermanishtfolëse.
Analiza e çmimeve zbuloi gjithashtu një rritje të konsiderueshme të kostove të udhëtimeve me tren gjatë 10 viteve të fundit, ndërsa kostoja e udhëtimeve me makinë ka rënë vetëm minimalisht. Stefan Meierhans, monitoruesi zyrtar i çmimeve në Zvicër, theksoi se për disa seksione, çmimi i transportit publik është dyfishuar, duke e bërë trenin një opsion shpesh më të shtrenjtë për udhëtimet ndërkombëtare krahasuar me avionin, transmeton albinfo.ch.
Më 28 shtator qytetarët zviceranë do të votojnë për dekretin federal të miratuar në dhjetor 2024, i cili parashikon heqjen e vlerës së qirasë, por me kushtin që kantonet të mund të vendosin një taksë të re mbi shtëpitë e dyta për të kompensuar humbjet tatimore, shkruan RTS, transmeton albinfo.ch.
Pyetja që do t’u shtrohet votuesve nuk përmend drejtpërdrejt heqjen e vlerës së qirasë, por është formuluar si: “A e pranoni dekretin federal të 20 dhjetorit 2024 në lidhje me taksën kantonale të pronës mbi shtëpitë e dyta?”
Nëse propozimi kalon, pronarët e vilave dhe apartamenteve të pushimeve do të detyrohen të paguajnë këtë taksë të re, edhe pse forma dhe shuma e saj ende nuk janë përcaktuar. Pikërisht kjo pasiguri po shkakton shqetësime mes pronarëve.
“Për momentin, nuk kemi absolutisht asnjë ide se në çfarë forme do të mblidhen këto taksa. Po dalim me diçka të gabuar që rrezikon të krijojë më shumë probleme sesa të zgjidhë,” deklaroi për La Matinale Brigitte Borel, presidente e Shoqatës së Pronarëve të Vilave dhe Apartamenteve të Verbier.
Kritika ka ardhur edhe nga krahu i djathtë në disa kantone alpine, të cilët e konsiderojnë planin e miratuar nga parlamenti si jo të favorshëm. Megjithatë, deputeti i UDC-së, Michaël Buffat, e mbron kompromisin: “Do të ketë një taksë mbi shtëpitë e dyta, por nga ana tjetër pronarët nuk do të paguajnë më vlerën e qirasë. Në fund, ata nuk do të humbasin.”
Sipas tij, taksat që do të vendosin kantonet pritet të jenë më të ulëta sesa shumat aktuale të llogaritura sipas sistemit të vlerës së qirasë, transmeton albinfo.ch.
Të huajt që jetojnë në Zvicër e kuptojnë shpejt se të krijosh miqësi të ngushta me vendasit është më e vështirë se sa duket. Një anketë e realizuar me lexuesit e The Local zbuloi se, edhe pse shumica e të huajve e konsiderojnë të rëndësishme të kenë miq zviceranë për të ndjerë përkatësi dhe mirëqenie sociale, ndërtimi i këtyre lidhjeve është gjithmonë i vështirë, transmeton albinfo.ch.
Disa e shohin miqësinë me vendasit si një faktor kyç për integrimin. “Është shumë e rëndësishme të kesh miq zviceranë! Njohja e vendasve të ndihmon të kuptosh dhe ta njohësh më mirë vendin,” tha Ira, që jeton në Vaud. Për të tjerët, edhe një grusht miq të ngushtë zviceranë mund të bëjë një ndryshim të madh: “Dy deri në tre miq të mirë zviceranë të ndihmojnë të ndihesh i pranuar, më rehat dhe më i përfshirë në komunitet,” tha një i anketuar nga Villars-sur-Ollon.
Megjithatë, shumë të huaj vënë në dukje se pengesat janë të mëdha. Shumë prej tyre përmendin gjuhën si një barrierë kryesore. Saurabh nga Cyrihu shprehu se të kesh miq zviceranë është i rëndësishëm “deri në një farë mase”, pasi kjo ofron ndjenjën e përfshirjes dhe përkatësisë, por procesi është i gjatë dhe i vështirë për ata që nuk flasin gjuhën lokale, veçanërisht dialektet zvicerane të gjermanishtes.
Përtej gjuhës, faktorë të tjerë si kultura, rrethi social ekzistues dhe lëvizshmëria ekonomike formojnë mundësitë për të ndërtuar marrëdhënie të ngushta. “Zviceranët janë të mirë, por marrëdhënia mbetet një marrëdhënie njohjeje në vend të një miqësie të vërtetë,” vuri në dukje Saurabh. Jeff, një amerikan që jeton në Cyrih, shtoi se madhësia e vogël e vendit dhe fakti që shumica tashmë kanë familje dhe miq, e bëjnë të vështirë gjetjen e miqve të rinj, transmeton albinfo.ch.
Edhe në qytetet më të vogla, mundësitë janë të kufizuara. “Nuk ka shumë raste për të bërë miq të rinj kur arrin një moshë të caktuar. Vetëm në punë mund të krijohen lidhje,” tha Ira nga Vaud. Një tjetër lexues nga Villars-sur-Ollon theksoi se dallimet kulturore dhe gjuha ndikojnë ndjeshëm në formimin e miqësive me vendasit.
Jo të gjithë pajtohen se miqtë zviceranë janë të domosdoshëm. Doaa nga Egjipti tha se preferon miqtë ndërkombëtarë dhe e sheh integrimin ndryshe. Sipas saj dhe disa të tjerëve, shoqëria zvicerane vetë mund të ketë pengesa për të huajt, veçanërisht kur ka një barrierë gjuhësore në marrëdhëniet me institucionet shtetërore dhe shërbimet publike.
Pavarësisht këtyre sfidave, lexuesit dhanë disa këshilla praktike për ndërtimin e miqësive si të mësuarit e gjuhës lokale, veçanërisht dialektet zvicerane të gjermanishtes, është thelbësor, pjesëmarrja në aktivitete dhe ngjarje lokale, si festat komunitare apo aktivitetet kulturore, ndihmon për të takuar njerëz me interesa të përbashkëta, bashkimi me klube dhe shoqata lokale mund të krijojë mundësi për lidhje të vazhdueshme dhe më të thella,
Megjithatë, të gjithë ranë dakord se procesi kërkon këmbëngulje dhe durim, dhe për shumë të huaj, miqtë e rinj zviceranë mund të jenë të paarritshëm. Një përgjigje ironike e Doaa-s ishte: “Nëse nuk mund ta bësh këtë, largohu nga vendi përgjithmonë.”
Në përfundim, të huajt në Zvicër e pranojnë se të bësh miq zviceranë është e vështirë, por për ata që janë të vendosur, me këmbëngulje, aftësi gjuhësore dhe angazhim në jetën lokale, mund të arrihet një integrim më i thellë dhe ndjenja e përkatësisë, transmeton albinfo.ch.Të huajt në Zvicër: Të bësh miq zviceranë, një sfidë e madhe
Burri 52-vjeçar ka rrëfyer se ka vrarë me thikë ish-gruan e tij dhe dy vajzat, 10 dhe 3 vjeç, në Corcelles, kantoni Neuchâtel. Sipas ekspertëve mjeko-ligjorë, viktimat kishin vdekur jo më vonë se ora 17:30 të 19 gushtit, shumë para se të njoftohej policia, shkruan Swissinfo, transmeton albinfo.ch.
I dyshuari u mor në pyetje nga prokurori dhe pranoi gjithashtu se kishte sulmuar qëllimisht një oficer policie që kishte hyrë në apartament, duke u plagosur në pjesën e poshtme të trupit pas tre të shtënave nga polici. Ai tani do të ndiqet penalisht për krimet e vrasjes.
Sipas policisë dhe zyrës së prokurorit, hetimi po vazhdon për të kuptuar shkaqet që çuan në këtë tragjedi dhe do të kryhet një ekspertizë psikiatrike për të pandehurin.
Burri ishte i ndarë ligjërisht nga gruaja që nga 12 qershori dhe jetonte në Le Locle. Midis viteve 2020 dhe 2022 ishin paraqitur ankesa të ndërsjella midis bashkëshortëve, por tre vitet e fundit nuk kishte shenja paralajmëruese dhe familja nuk ishte nën mbikëqyrje policore.
Policia e kantonit Neuchâtel e përshkruan skenën si “të tmerrshme”, transmeton albinfo.ch.
Çdo vit mijëra njerëz në Zvicër humbin banesat e tyre si pasojë e të ashtuquajturave “dëbime të zbrazëta”, kur qiramarrësit detyrohen të largohen për shkak të rinovimeve ose projekteve të reja ndërtimi. Vetëm sipas të dhënave të Bankës Qendrore të Zvicrës (ZKB), rreth 30 mijë persona preken çdo vit nga kjo praktikë, duke u përballur me vështirësi të mëdha për të gjetur strehim të përballueshëm, sidomos në qytete si Cyrihu, shkruan SRF, transmeton albinfo.ch.
Shembulli i kantonit Basel-Stadt ka tërhequr vëmendje të madhe. Atje, me një ligj të ri, përfundimet e kontratave të qirasë për qëllime zbrazjeje janë praktikisht të ndaluara dhe numri i rasteve ka rënë pothuajse në zero. Masa është përshëndetur nga qiramarrësit dhe aktivistët e strehimit, por ka nxitur debat të ashpër në pjesën tjetër të vendit.
Kritikët, si drejtues të Shoqatës së Pronësisë së Banesave (HEV), paralajmërojnë se ligji po pengon rinovimet dhe po dëmton sektorin e ndërtimit, duke detyruar zejtarët të kërkojnë punë jashtë qytetit. Nga ana tjetër, përfaqësues politikë si anëtarja e Këshillit të Shteteve, Eva Herzog (SP), mbrojnë ligjin duke theksuar se është ende i ri dhe efektet afatgjata duhen matur me kujdes.
Në qendër të debatit mbetet pyetja se si të përballohet mungesa e banesave të përballueshme. Për disa, zgjidhja qëndron te ndërtimi i më shumë apartamenteve, ndërsa të tjerë theksojnë nevojën për projekte jofitimprurëse dhe modele bashkëpunuese që garantojnë qira të ulëta, transmeton albinfo.ch.
Një burrë kosovar 32-vjeçar u arrestua të martën mbrëma pasi u kap duke vozitur makinën me shpejtësi të lartë në kantonin e Lucernës. Shoferi u regjistrua duke lëvizur me 181 km/orë në Bertiswilstrasse në Rothenburg, ndërsa kufiri i shpejtësisë në këtë rrugë jashtë qytetit është 80 km/orë, njoftoi policia e Lucernës, shkruan Blick, transmeton albinfo.ch.
Automjeti u ndalua menjëherë, shoferi u arrestua përkohësisht, makina u sekuestrua, dhe leja e drejtimit të tij u konfiskua deri në vendimin e Autoritetit të Trafikut Rrugor.
Policia raportoi shkeljen e shpejtësisë, ndërsa Zyra e Prokurorit Publik të Emmenit ka nisur një hetim për rastin, transmeton albinfo.ch.
Një aksident i rëndë me varka në liqenin Obersee të Liqenit të Cyrihut ka përfunduar tragjikisht me dy viktima. Ngjarja ndodhi të martën mbrëma, rreth orës 22:20, kur dy varka me gjithsej dhjetë persona u përplasën pranë Altendorfit, shkruan SRF, transmeton albinfo.ch.
Sipas të dhënave fillestare të Policisë së Kantonit Schwyz, një varkë e drejtuar nga një 46-vjeçar me dy pasagjerë u përplas me një varkë tjetër, ku ndodheshin shtatë persona. Për pasojë, një burrë 36-vjeçar dhe një grua, pasagjerë në varkën më të madhe, humbën jetën në vendngjarje.
Katër persona të tjerë pësuan lëndime të lehta dhe u dërguan në spital për kontrolle mjekësore, ndërsa dy të tjerë u shpëtuan pa pasoja serioze.
Rrethanat e sakta të aksidentit mbeten ende të paqarta. Policia kantonale ka nisur hetimet, ndërsa ekspertë të specializuar kanë siguruar provat në vendin e ngjarjes dhe në mjetet lundruese të përfshira, transmeton albinfo.ch.
Pas një periudhe tranzicioni pesëvjeçar, Qyteti i Cyrihut ka nisur zbatimin aktiv të rregulloreve për qiranë e apartamenteve komunale dhe po kontrollon pajtueshmërinë me kontratat ekzistuese. Sipas të dhënave, rreth 1,100 apartamente konsiderohen të nën-banuara, ndërsa afërsisht 150 prej tyre klasifikohen si shumë të nën-banuara, shkruan Blick, transmeton albinfo.ch.
Rregullorja e re, e miratuar nga këshilli komunal në vitin 2018, përcakton kërkesat për banimin minimal në një apartament si dhe kufijtë e të ardhurave për qiramarrësit. Kontratat e reja të qirasë janë lidhur sipas këtyre kushteve që nga viti 2019, ndërsa kontratat e vjetra kishin një periudhë kalimtare për përshtatje.
Kontrollet e nisura tani fokusohen fillimisht te apartamentet shumë të nën-banuara, pra ato ku banimi minimal nuk plotësohet nga dy persona. Qiramarrësit e prekur janë njoftuar me shkrim dhe duhet të gjejnë zgjidhje brenda një viti. Sipas qytetit, do të ofrohen deri në dy apartamente alternative, në varësi të disponueshmërisë.
Në rast se kërkesa e banimit nuk respektohet, qiramarrësi duhet të zhvendoset brenda tre muajve. Refuzimi i pajustifikuar i alternativave ose moszbatimi i rregullores mund të sjellë ndërprerjen e kontratës së qirasë.
Autoritetet komunale paralajmërojnë se zbatimi do të kryhet hap pas hapi, për shkak të numrit të kufizuar të apartamenteve në dispozicion dhe vështirësive që sjell procesi i shkëmbimeve. Në një fazë të mëvonshme, do të trajtohet edhe mungesa e banesave të lehta, ku banimi minimal nuk plotësohet as nga një person.
Në total, kjo rregullore mbulon rreth 7,400 apartamente komunale, ndërsa afërsisht 200 apartamente të tjera të subvencionuara mbeten nën kriteret kantonale dhe komunale të qirasë sociale.
Ankesat e paraqitura nga disa qiramarrës kundër dispozitave të reja u hodhën poshtë në verën e vitit 2024 nga Gjykata Supreme Federale, transmeton albinfo.ch.
Selektori i Maqedonisë së Veriut, Blagoja Milevski, ka publikuar listën me 26 futbollistë për dy ndeshjet që ekipi do t’i zhvillojë në shtator. Në mesin e të ftuarve janë edhe gjashtë futbollistë shqiptarë: kapiteni Enis Bardhi, Ezgjan Alioski, Visar Musliu, Isnik Alimi, Lirim Qamili dhe Reshat Ramadani, raporton albinfo.ch.
Mes tyre, Ramadani i Shkëndijës së Tetovës ka marrë ftesën e parë në përfaqësuesen maqedonase.
Maqedonia e Veriut më 4 shtator do të zhvillojë një miqësore ndaj Arabisë Saudite në Pragë, ndërsa më 7 shtator në Shkup do të përballet me Lihtenshtajnin në kuadër të kualifikimeve për Kupën e Botës 2026, raporton albinfo.ch.
Më pak se një vit pasi vendosi të përfaqësojë Kosovën, mesfushori Bledian Krasniqi do të përballet me vendin e tij të lindjes në një ndeshje të rëndësishme. Më 5 shtator, Kosova do të sfidojë Zvicrën në “St. Jakob-Park” të Basel-it, në kuadër të kualifikimeve për Kupën e Botës, shkruan SRF, transmeton albinfo.ch.
Krasniqi, i cili më parë ka luajtur për grupmoshat e reja të Zvicrës, tha se vendimi për të zgjedhur Kosovën ishte i lehtë pasi pas përfaqësueses U21 nuk kishte më kontakte me federatën zvicerane. “Pas U21 nuk kam pasur më kontakt me ekipin përfaqësues të Zvicrës”, deklaroi 24-vjeçari, që është bërë startues i rregullt te Zurichu.
Për të, shorti që përcaktoi përballjen mes Kosovës dhe Zvicrës ishte një moment i veçantë. “Kur shorti përcaktoi që të luajmë me Zvicrën, gëzimi ishte i madh. Do të jetë përvojë e jashtëzakonshme”, tha ai, duke shtuar se interesimi për bileta nga të afërmit dhe miqtë ka qenë më i madh se kurrë.
Krasniqi debutoi me Kosovën në qershor, në një miqësore ndaj Komoreve, ku luajti 20 minuta. Ende nuk dihet roli i tij i saktë në përfaqësuesen “dardane”, por selektori Franco Foda, që e njeh nga periudha e shkurtër te Zurichu, pritet t’i japë më shumë hapësirë në muajt e ardhshëm.
Kosova ka fituar edhe një emër tjetër nga futbolli zviceran: mesfushorin Leon Avdullahu, i cili pas transferimit nga Baseli te Hoffenheimi ka zgjedhur të përfaqësojë Kosovën. Krasniqi tha se e kupton vendimin e tij. “Nuk ka vendim të drejt apo të gabuar. Nuk do të thosha që po i ktheni shpinën Zvicrës. Kur flisni me federatën dhe njerëzit në Kosovë, emocionoheni”, u shpreh ai.
Kosova dhe Zvicra deri tani kanë luajtur tri herë, gjithnjë pa fitues. Krasniqi shpreson që seria të vazhdojë. “ Shpresoj të jetë kështu. Duhet të sjellim shumë emocione në ndeshje. Natyrisht, ne do të tentojmë të fitojmë ”, përfundoi ai, transmeton albinfo.ch.
Është përcaktuar programi i Kombëtares Shqiptare për grumbullimin e muajit shtator, ku kuqezinjtë do të zhvillojnë një ndeshje miqësore ndaj Gjibraltarit dhe sfidën zyrtare të vlefshme për kualifikueset e Kupës së Botës 2026 ndaj Letonisë.
Shpallja e listës së lojtarëve të grumbulluar nga trajneri Sylvinho do të bëhet më 29 gusht, ndërsa në të njëjtën ditë, në orën 11:00, do të mbahet konferenca për shtyp e trajnerit në ambientet e “Shtëpisë së Futbollit”.
Seanca e parë stërvitore do të zhvillohet më 1 shtator, shkruan FSHF, transmeton albinfo.ch.
Ndeshja miqësore Gjibraltar – Shqipëri do të luhet më 4 shtator, në stadiumin “Europa Point” në orën 18:00.
Ndërsa ndeshja Shqipëri – Letoni, e vlefshme për kualifikueset e Kupës së Botës 2026, do të zhvillohet më 9 shtator, në stadiumin “Air Albania”, në orën 20:45.
Një lajm i rëndësishëm për udhëtarët shqiptarë dhe turistët që vizitojnë Shqipërinë: kompania ajrore zvicerane Chair Airlines ka shpallur planet për zgjerim të madh të flotës dhe destinacioneve të saj për verën e vitit 2026. Ky zhvillim pritet të ketë ndikim të drejtpërdrejtë në lidhjet ajrore mes Zvicrës dhe Shqipërisë, duke përfshirë nisjen e fluturimeve për herë të parë drejt qytetit bregdetar të Vlorës dhe shtimin e frekuencës drejt Tiranës.
Fluturime për herë të parë drejt Vlorës
Sipas planit të publikuar, një avion i ri Airbus A320 do t’i mundësojë Chair Airlines të hapë itinerare të reja, mes tyre edhe fluturimet nga Zürich drejt Vlorës, me dy nisje në javë.
Ky zhvillim shihet si një hap i madh për zhvillimin e turizmit në Rivierën Shqiptare, duke u ofruar pushuesve zviceranë një rrugë direkte dhe të shpejtë drejt plazheve të jugut të Shqipërisë.
Tirana me më shumë fluturime
Krahas Vlorës, Tirana do të marrë një rol edhe më qendror në itinerarin e Chair. Nga vera e ardhshme, kryeqyteti shqiptar do të lidhet tre herë në javë me Zürich-un, një shtim i dukshëm i frekuencës krahasuar me vitet e mëparshme.
Ky zgjerim i linjës drejt Tiranës pasqyron kërkesën e lartë të diasporës shqiptare në Zvicër, e cila përbën një nga komunitetet më të mëdha emigrante në vend.
Një strategji e qartë për Ballkanin
CEO i Chair Airlines, Shpend Ibrahimi, theksoi se kompania do të vazhdojë të mbështetet te destinacionet klasike të pushimeve, por njëkohësisht edhe te vendet e Ballkanit, ku kërkesa është gjithnjë në rritje.
“Zgjerimi i flotës është një moment historik për Chair Airlines. Ai na jep mundësinë të ofrojmë më shumë opsione për udhëtarët tanë dhe të forcojmë lidhjet me destinacionet e preferuara të diasporës”, u shpreh Ibrahimi.
Një rrjet i gjerë ballkanik
Përveç Shqipërisë, Chair Airlines do të shtojë në orar edhe destinacione të tjera në rajon. Në verën e 2026-ës, për herë të parë do të ketë linjë direkte Zürich, Tuzla (Bosnje-Hercegovinë), me dy fluturime javore.
Foto: Bujar Gashi
Tri herë në ditë nga Zürich në Prishtinë
Ndërkohë, fluturimet ekzistuese drejt Prishtinës do të mbeten ndër më të shpeshtat: deri në tre herë në ditë nga Zürich dhe deri në dy herë në ditë nga Baseli. Po ashtu, do të vazhdojnë edhe lidhjet me Shkupin dhe Ohrin në Maqedoninë e Veriut. Gjithashtu mbeten në ofertë:Hurghada dhe Marsa Alami (Egjipt), Palma de Mallorca (Spanjë), Larnaka (Qipro), si dhe destinacionet greke Heraklion, Kos dhe Rodos në planin e fluturimeve.
Chair operon gjithashtu dy herë në javë linjën Zürich–Marrakesh. Ndërsa gjatë muajve të verës ka edhe tri fluturime javore drejt Portos.
Mundësi të reja edhe për turizmin
Me përfshirjen e Vlorës dhe shtimin e fluturimeve për në Tiranë, Shqipëria bëhet një prej përfituesve kryesorë të zgjerimit të Chair Airlines.
Kjo pritet të ketë ndikim të dyfishtë: nga njëra anë, të lehtësojë udhëtimet e mijëra shqiptarëve të diasporës që jetojnë në Zvicër, dhe nga ana tjetër, të nxisë turistët zviceranë të zbulojnë plazhet dhe qytetet shqiptare.
Ekspertët e turizmit parashikojnë se kjo linjë e re mund të sjellë rritje të dukshme të vizitorëve nga Zvicra në rivierën shqiptare, veçanërisht gjatë muajve të verës.
