Një shqiptar në mesin e 12 fotove më ikonike të vitit 2025, sipas BBC-së

Posted on 6 Shtator, 20256 Shtator, 2025 by Drin Reçica

BBC ka përfshirë një imazh të realizuar gjatë zjarreve masive që përfshinë Greqinë këtë verë në listën e 12 fotografive më të rëndësishme të vitit 2025. Fotografia, shkrepur nga Thanasis Stavrakis i agjencisë Reuters, tregon 33-vjeçarin shqiptar Oslien Muçobega teksa shpëton një dele nga flakët në zonën e Patrës, duke e transportuar mbi motor përmes tymit dhe zjarrt, transmeton albinfo.ch.

Ngjarja ndodhi gjatë gushtit, kur rajoni i Ahaisë u përfshi nga zjarre të mëdha, që detyruan banorët të largoheshin dhe rrezikuan jetën e njerëzve dhe kafshëve.

BBC ka vlerësuar fotografinë si një pamje me domethënie të veçantë, duke e krahasuar me ikonografinë e “Bariut të Mirë” në artin e krishterë, ku Krishti mban mbi supe një kafshë të brishtë. Sipas medias britanike, kjo lidhje simbolike e bën imazhin një nga momentet më të fuqishme dhe prekëse të vitit.

19 vite në arrati, arrestohet shqiptari në Itali

Posted on 6 Shtator, 20256 Shtator, 2025 by Drin Reçica

Një 52-vjeçar shqiptar, i kërkuar nga Italia në të gjithë Evropën, është arrestuar pas 19 vitesh arrati.

Sipas mediave italiane, bëhet fjalë për shtetasin Durin Lusha.

Arrestimi i tij u bë në Taviano, në provincën e Leçes në një lokal, ndërsa u identifikua nga një tatuazh në parakrahun e djathtë të një gruaje gjysmë të zhveshur.

52-vjeçari do të vuajë dënimin me 10 vjet burg për drejtimin e një organizate italo-shqiptare e cila shfrytëzonte gratë e huaja dhe ato nga Shqipëria, për prostitucion.

Për t’i shpëtuar arrestimit, Lusha kishte ndryshuar emrin e tij në pasaportë.

Blick: Debutimi i vështirë i Leon Avdullahut me Kosovën

Posted on 6 Shtator, 20256 Shtator, 2025 by Drin Reçica

Kalimi i Leon Avdullahut nga Zvicra te Kosova ka bërë bujë në javët e fundit, duke ngjallur pritshmëri të mëdha për mesfushorin e ri. Avdullahu debutoi në ndeshjen ndaj Zvicrës, ku luajti në mesfushë, por Kosova pësoi një humbje të thellë 4:0 dhe Avdullahu nuk arriti të ndikojë në lojë, përcjell albinfo.ch.

Kryetari i FFK-së, Agim Ademi, e ka krahasuar Avdullahun me Granit Xhakën, duke theksuar potencialin e tij të madh, por në këtë duel debutimi me Zvicrën, Avdullahu nuk mundi të rivalizojë me Xhakën në fushë.

Gazeta zvicerane Blick shkruan se mesfushori përjetoi “makth në vendin e debutimit të ëndrrave”. Gabimet e tij të dukshme në lojë u vunë re më shumë se ato të lojtarëve të tjerë, për shkak të pritshmërive të larta që ekzistonin ndaj tij. Avdullahu, megjithatë, ka ende kohë për të treguar potencialin e tij dhe për t’u konsoliduar si një nga mesfushorët kryesorë të Kosovës.

Xhaka në mesin e lojtarëve më të vlerësuar të Zvicrës ndaj Kosovës

Posted on 6 Shtator, 20256 Shtator, 2025 by Drin Reçica

Zvicra dhe Kosova u përballën mbrëmë në një ndeshje ku Zvicra arriti të fitojë 4:0. Granit Xhaka, kapiteni i kombëtares zvicerane, u rendit në mesin e lojtarëve më të vlerësuar në fushë, transmeton albinfo.ch.

Xhaka mori notën 7.8 për paraqitjen e tij, duke u renditur i dyti pas Breel Embolos, i cili u vlerësua më lart me 8.5. Paraqitja e Xhakës u shfaq e qëndrueshme në mesfushë, duke kontribuar në kontrollin e lojës dhe organizimin e sulmeve.

Megjithatë, Kosova nuk arriti të kundërpërgjigjej dhe pësoi katër gola, duke e bërë humbjen një sfidë të vështirë për debutuesit dhe lojtarët e rinj. Notat e larta të Xhakës dhe Embolos tregojnë se, edhe në një fitore të madhe, performanca individuale mbetet thelbësore për suksesin e ekipit.

Hapet Konsullata e Nderit e Maqedonisë së Veriut në Gjenevë

Posted on 6 Shtator, 20256 Shtator, 2025 by Drin Reçica

Në Gjenevë u inaugurua dje Konsullata e Nderit e Maqedonisë së Veriut, një hap i rëndësishëm drejt forcimit të pranisë diplomatike dhe ekonomike të vendit në Zvicër, transmeton albinfo.ch.

Ceremonia u zhvillua në prani të Ministrit të Punëve të Jashtme, z. Timço Mucunski, i cili së bashku me të pranishmit shpalli emërimin e z. Zaim Jashari si Konsull i Nderit. Jashari është një personalitet i njohur për angazhimin dhe kontributin e tij të çmuar në shërbim të komunitetit dhe marrëdhënieve ndërshtetërore.

Konsullata e re do të shërbejë si urë miqësie dhe bashkëpunimi mes Maqedonisë së Veriut dhe Zvicrës, duke krijuar mundësi të reja në fushën diplomatike, ekonomike dhe kulturore. /Albinfo.ch

Nacionalizmi serb ndalon filmin shqip në Mal të Zi

Posted on 6 Shtator, 20256 Shtator, 2025 by Drin Reçica

Shfaqja e filmit “Lejleku” të Isa Qosjes në festivalin “Xhad” në Podgoricë u ndërpre nga një grup personash që kundërshtuan faktin se filmi ishte në gjuhën shqipe. Ngjarja nxiti reagime të shumta nga presidenti i Malit të Zi, organizatat shqiptare dhe OJQ-të, por jo edhe nga kryeministri. Si kundërpërgjigje, filmi u transmetua me titra në gjuhën malazeze në RTVMZ, ndërsa organizatorët paralajmëruan se do ta shfaqin përsëri aty ku u ndal.

Regjisori Qosja e quajti incidentin “të planifikuar nga Serbia”, ndërsa theksoi se arti shqiptar do të mbetet i gjallë pavarësisht nacionalizmit. Producenti malazias Ivan Gjuroviq fajësoi shtetin dhe shoqërinë që kanë lejuar ringjalljen e miteve nacionaliste, duke shtuar se filmi trajton tema universale dhe jo çështje kombëtare.

Ndërkohë, presidenti Millatoviq kërkoi që autorët e incidentit të ndiqen penalisht dhe që filmi të shfaqet sërish. Deputetët dhe partitë shqiptare në Mal të Zi e cilësuan ngjarjen si sulm ndaj multietnicitetit dhe lirisë artistike.

“Lejleku”, i mbështetur nga fondi evropian “Eurimages”, është një bashkëprodhim i shtëpive filmike nga Mali i Zi, Shqipëria, Kosova dhe Maqedonia e Veriut.

Jashari: Ishte ndeshje emocionale për të gjithë

Posted on 6 Shtator, 20256 Shtator, 2025 by Drin Reçica

Gjatë intervistës së Granit Xhakës është përfshirë edhe Ardon Jashari. Ai i mungoi Zvicrës për shkak të lëndimit, përcjell albinfo.ch.

“Fitorja ishte gjëja më e rëndësishme. Por qartë se ishte emocionale për të gjithë. Gjërat mund të vazhdojnë në këtë mënyrë”, ka thënë Jashari për SRF.

Xhaka është pyetur për lëndimin e Jasharit.

“Jasharit i është dashur shumë durim, por unë gjithnjë i kam thënë se koha e tij do të vijë. Ai ka të ardhme të ndritur përpara. Me lëvizjen te Milani, ai ka dëshmuar që mund të luajë me ekipet e mëdha. Lëndimi është mëkat, por është pjesë e futbollit. Ai është mjaftueshëm i fortë për t’u kthyer”, ka thënë Xhaka.

Eva Murati mahnit Venecian, bukuria shqiptare që rrëmbeu tapetin e kuq

Posted on 6 Shtator, 20256 Shtator, 2025 by Drin Reçica

Edicioni i 82-të i Festivalit të Filmit në Venecia mblodhi sërish emra të mëdhenj të kinemasë botërore në tapetin e kuq, përcjrll albinfo.ch.

Përveç yjeve ndërkombëtarë, këtë vit nuk munguan as përfaqësuesit shqiptarë që po bëjnë karrierë të suksesshme në Itali.

Pas performancës së balerinës së njohur Klaudia Pepa, e cila prej vitesh është një emër i dashur për publikun italian, edhe moderatorja dhe aktorja Eva Murati tërhoqi vëmendjen e mediave me paraqitjen e saj.

E veshur me një fustan të zi elegant, me prerje të stilit sirenë, flokë të valëzuar dhe make-up të sofistikuar, Eva rrëmbeu sytë e fotografëve. Eleganca e saj u theksua edhe më shumë nga detaji i shpinës së zbuluar, ndërsa qëndrimi i saj i sigurt reflektonte bukurinë dhe vetëbesimin e një vajze shqiptare që shkëlqen në arenën ndërkombëtare

“Edicioni i 82-të i Festivalit të Filmit në Venecia. ‘Dead Man’s Wire’, premierë nga Gus Van Sant”, ka shkruar Eva në rrjetet sociale, ku ndau disa imazhe nga momenti i saj në tapetin e kuq.

Muriqi për humbjen: Kishim motivin para ndeshjes, por në lojë “humbëm kryet”

Posted on 6 Shtator, 20256 Shtator, 2025 by Drin Reçica

Sulmuesi kosovar, Vedat Muriqi, ka kërkuar falje pas humbjes 4:0 nga Zvicra në ndeshjen e parë kualifikuese për Kupën e Botës, përcjell albinfo.ch.

“Nuk funksionoi, fatkeqësisht, e kalojshin lehtë presingun”, ka thënë Muriqi pas ndeshjes.

“Nuk kemi qenë në rastet ku nevojitet me e fitu topin e dytë.

“Me gabimet trashanike që kemi ba, kemi marrë katër gola në pjesën e parë”.

“Duke e ditur që pas tri dite kemi një kundërshtar më të vështirë se Zvicra”.

“Tash mbaroi kjo lojë, prapa s’mund të kthehemi.

“Duhet me e kthy motivimin apet. Na pret një ndeshje më e vështirë se kjo në ‘Fadil Vokrri’”

Muriqi tha se ata kishin motivin para ndeshjes por gjatë ndeshjes gjërat mund të ndryshojnë.

“Kemi qenë të motivum gjithë, por kur nganjëherë mrena fushës nuk funksionon, hyn nëpër mendime, brenda thonjëzave, ‘e humb kryet’”.

“Unë si kapiten i dytë i ekipit, u kërkoj falje tifozëve dhe shtetit tonë, dhe pastaj pres moral dhe motivim në ‘Fadil Vokrri’ ndaj Suedisë që momentalisht na duhet më shumë se teknika dhe taktika”, përfundoi Muriqi.

KQZ mblidhet sot, certifikon listën e votuesve për zgjedhjet komunale

Posted on 6 Shtator, 20256 Shtator, 2025 by Drin Reçica

Komisioni Qendror i Zgjedhjeve do të mbajë sot mbledhjen e radhës, përcjell albinfo.ch.

Në rendin e ditës, parashihet se ndër të tjera gjatë mbledhjes së KQZ-së do të certifikohet lista e votueseve për zgjedhjet e 12 tetorit.

Mbledhja nis nga ora 15:00, ndërsa më poshtë gjeni rendin e plotë të ditës:

1.Hyrje: z. Kreshnik Radoniqi, Kryesues i mbledhjes së KQZ-së;

Shqyrtimi dhe miratimi i procesverbalit të mbledhjes Nr.51, 52, 53 dhe 54/2025;Këshillat e KQZ;
3.1. Këshilli për Operacione Zgjedhore

3.1.1. Shqyrtimi dhe miratimi i rekomandimit për përcaktimin e formulës së këshillave të vendvotimeve për Zgjedhjet Lokale 2025

3.1.2. Shqyrtimi dhe miratimi i rekomandimit për përcaktimin e formulës se ekipeve te numërimit në Qendrat Komunale të Numërimit

3.1.3. Shqyrtimi dhe miratimi i Rekomandimit për caktimin e numrit maksimal të votuesve në vendvotime për Zgjedhjet Lokale 2025

3.1.4. Shqyrtimi dhe miratimi i Rekomandimit për caktimin e numrit të vendvotimeve në qendrat e votimit me kusht për Zgjedhjet Lokale 2025

3.1.5. Certifikimi i Listës së Votuesve për Zgjedhjet Lokale 2025

3.1.6. Shqyrtimi dhe miratimi i numrit të fletëvotimeve dhe broshurave që do të shtypen për Zgjedhjet Lokale 2025

3.1.7. Shqyrtimi dhe miratimi i përmbajtjes dhe dizajnit final të fletëvotimeve dhe broshurave të kandidatëve për Zgjedhjet Lokale 2025

3.1.8. Shqyrtimi dhe miratimi i vendimit për mbikëqyrjen e procesit të shtypjes së fletëvotimeve, broshurave dhe listës së votuesve për Zgjedhjet Lokale 2025

Rrahmani: Zvicra shfrytëzoi gabimet tona, humbëm gjithmonë topin e dytë

Posted on 6 Shtator, 20256 Shtator, 2025 by Drin Reçica

Pas ndeshjes, kapiteni Amir Rrahmani ka thënë se problemet e Kosovës me “topin e dytë” i kushtuan me humbjen 4:0 sonte nga Zvicra në kualifikimet për Kupën e Botës.

“Realisht, Zvicra i shfrytëzoi rastet që i pati pas gabimeve tona”, tha Rrahmani.

“Të gjitha rastet ndodhën në pjesën e parë. Që nga minuta e parë nuk arritëm ta fitonim topin e dytë, gjithmonë e fitonin ata. Prej aty nisnin aksionet e tyre, dhe ne u tërhoqëm shumë prapa. Nuk ishim të kujdesshëm”.

“Të gjitha rastet ishin pothuajse të njëjta: topi i dytë i humbur.”

Rrahmani po ashtu foli për lëndimin e tij dhe për ndeshjen e radhës ndaj Suedisë pas pak ditësh.

“Nesër do të bëjmë rezonancën për të parë se çfarë është”, tha Rrahmani.

“Duhet ta harrojmë sa më shpejt këtë ndeshje, t’i marrim nga ajo vetëm gabimet që kemi bërë dhe t’i përmirësojmë, duke u përgatitur për ndeshjen kundër Suedisë./Albinfo.ch

26 vjet nga themelimi i Policisë së Kosovës

Posted on 6 Shtator, 20256 Shtator, 2025 by Drin Reçica

Policia e Kosovës sot mbush 26 vjet nga themelimi i saj, përcjell albinfo.ch.

Më 6 shtator 1999, Misioni i OSBE-së në Kosovë, në pajtim me Rezolutën e Kombeve të Bashkuara 1244, ka hapur Shkollën e Policisë dhe ka filluar trajnimin e kandidatëve për pjesëtarë të Policisë së Kosovës.

Gjenerata e parë e kandidatëve për pjesëtarë të këtij Shërbimi filloi trajnimin në këtë qendër më 6 shtator 1999.

Kjo gjeneratë numëroi 176 pjesëtarë, të cilët me sukses përfunduan trajnimin dhe pastaj filluan ushtrimin e veprimtarisë policore në tërë territorin e Kosovës si policët e parë të këtij shërbimi.

Në kuadër të shënimit të 26-vjetorit mbahet ceremonia Qendrore në drejtoritë e përgjithshme të Policisë së Kosovës.

Granit Xhaka: Krejt bota e dinë se jam gjak e shpirt e zemër shqiptar

Posted on 6 Shtator, 20256 Shtator, 2025 by Drin Reçica

Granit Xhaka ka folur pas fitores 4:0 ndaj Kosovës në kualifikimet për Kupën e Botës, duke thënë se ata ishin shumë të fortë, dhe jo që Dardanët ishin shumë të dobët.

“Besoj se në pjesën e parë kemi qenë shumë dominues. Nuk jemi të kënaqur me pjesën e dytë, pasi nuk kemi luajtur ashtu siç duhet”, ka thënë Xhaka.

“Por, një fitore 4:0 ndaj një ekipi shumë të mirë si Kosova, mendoj se e kemi merituar plotësisht sot.”

“Nuk besoj se Kosova ishte e dobët, por ne kemi qenë shumë më të mire, sidomos në pjesën e parë”.

Xhaka sidoqoftë nuk ishte i kënaqur me pjesën e dytë të helvetëve.

“I fituam topat e dytë, duelet, bëmë pasime më të sakta dhe ishim më të qartë para portës”.

“Mendoj se Kosova nuk pati asnjë rast të rrezikshëm sot. Problemi është që nuk ishim dominues gjatë gjithë 90 minutave.”.

“Ishte ndeshja e parë, morëm tri pikë, dhe shpresoj që kështu të vazhdojmë.”

Mes tjera deklaratave, Xhaka u shpreh se krejt bota e dinë se jam gjak e shpirt e zemër shqiptar.

Po ashtu kapiteni i Zvicrës, Granit Xhaka, ka thënë që kritikët e Zvicrës nuk është dashur ta vënë në mëdyshje potencialin e kësaj kombëtareje të cilët kishin thënë që nuk është e fortë si ka qenë.

“Kom dëgju do sene para ndeshjes që Zvicra nuk është qysh u kanë përpara. Nuk ka kualitet sikur ka pasë. Nuk ban ashtu me folë për neve”, ka thënë Xhaka për Klan Kosovën dhe Artmotion.

“Çdo lojtar që e kemi luan nëpër ligat ma të mëdha në botë. Jemi me një ekip shumë të mirë, me të rinjë, por edhe me lojtarë që kemi eksperiencë”.

“Kështu sot e bëmë një hap shumë të mirë me i kallëzu botës se Zvicra është hala këtu. Edhe sot, besoj, e kemi meritu fitoren”. /Albinfo.ch

Xhaka: Mund të fitonim 6:0 ose 7:0

Posted on 5 Shtator, 2025 by BR

Kapiteni i Zvicrës, Granit Xhaka ka folur pas ndeshjes mes Zvicrës dhe Kosovës.

“Mund të them që ishte një pjesë e parë më e mira për kohë të gjatë. Por pjesa e dytë nuk ishte e mirë. Nuk kemi bërë gjërat që kemi planifikuar. Ata që më njohin e dinë që jam vetëkritik dhe kritik ndaj ekipit. Dhe nuk mund të jemi të kënaqur me pjesën e dytë. Nëse do të luanim si në pjesën e parë do të mund të fitonim 6:0 ose 7:0”, theksoi Xhaka, duke shtuar: “Është mëkat që përfundoi vetëm 4:0, ndonëse ishte rezultat i merituar. Zhvillimi tani duhet të jetë që duhet të dominojmë për 60, 70 apo 90 minuta në ndeshje, jo vetëm 45. Kemi shumë lojtarë të rinj të cilëve ndoshta u duhet ende kohë për të luajtur me konsistencë për 90 minuta. Por ne kemi dashur tri pikë dhe i morëm me komoditet”, ka thënë Xhaka.

Xhaka shkëlqeu dhe udhëhoqi Zvicrën në fitoren 4:0.

Gjermani: 4 policë hetohen për përvetësimin e parave që ua kanë marrë shqiptarëve

Posted on 5 Shtator, 20255 Shtator, 2025 by albinfo.ch

Zyrtarët e policisë në Düsseldorf dyshohet se kanë mbledhur depozita sigurie dhe i kanë futur paratë në xhepat e tyre. Gjithsej dhjetë policë janë nën hetim, gjashtë prej tyre për pengim të drejtësisë, transmeton albinfo.ch.

Hetimi gjithashtu ka të bëjë me një arrestim të mundshëm të paligjshëm, sipas policisë dhe prokurorëve. Sipas informacionit të marrë nga dpa, oficerët, si anëtarë të një task force, thuhet se kanë kërkuar para si siguri, kryesisht nga shtetasit shqiptarë, të cilat më pas me sa duket i kanë futur në xhepat e vetë.

Hetimet janë nisur kundër gjashtë zyrtarëve të tjerë të policisë me dyshimin për pengim të drejtësisë në detyrë, sipas prokurorëve dhe policisë. Ata thuhet se kanë qenë në dijeni të incidenteve, por nuk i kanë raportuar ato. Gjashtë zyrtarë janë pezulluar nga detyra.

Sipas hetuesve, kreu i departamentit kishte vënë re parregullsi një ditë më parë në mëngjesin e 7 gushtit. Rasti përfshinte një kontroll të një burri shqiptar. Gjatë kërkimit, mbikëqyrësi gjeti një numër raportesh të çuditshme. Kur u përball me një zyrtar policie, polici pranoi se kishte njëfarë të vërtete në dyshim – por se ai vetë nuk ishte përfshirë, përcjell albinfo.ch. Prandaj, ky i fundit po hetohet vetëm për pengim të drejtësisë në detyrë.

Të nesërmen, më 8 gusht janë zhvilluar bastisje, gjatë të cilave, ndër të tjera, janë konfiskuar telefonat celularë të të dyshuarve.

Policia e Duisburgut merr përsipër hetimin
Sipas informacionit zyrtar, drogë u gjet edhe në dollapin e armëve të një të dyshuari (38). Konkretisht, sipas informacionit të marrë nga dpa, këto përfshinin 60 gramë marihuanë dhe 8 gramë një substancë të ngurtë kafe të panjohur. Nëse këto përbënin shkelje të trajtimit të provave apo një vepër penale të lidhur me drogën, është nën hetim.

Deri më tani, asnjë nga zyrtarët e akuzuar të policisë nuk ka komentuar mbi akuzat. Hetuesit thanë se qarkullojnë thashetheme brenda policisë së Düsseldorf-it në lidhje me veprimet e dyshuara të kolegëve të tyre.

Zvicra e nis me fitore bindëse ndaj Kosovës

Posted on 5 Shtator, 2025 by BR

Zvicra fitoi bindshëm ndaj Kosovës 4:0, në ndeshjen e parë kualifikuese për Kupën e Botës 2026.

Gjithçka u vendos në pjesën e parë, ku Nati ishin bindshëm më i mirë, ndërsa për Dardanët nuk mungoi përkrahje e madhe nga tifozët shqiptarë në Bazel.

Në minutën e 22-të, Manuel Akanji shënoi me kokë brenda zonës për 1:0, shkruan albinfo.ch.

Vetëm tre minuta më vonë, Breel Embolo shënoi për 2:0.

Silvan Widmer shënoi për 3:0 në minutën e 39-të, kurse Embolo në minutën e 45-të shënoi për 4:0.

Në ndeshjen e ardhshme, më 8 shtator, Zvicra e pret Slloveninë, kurse Kosova e pret Suedinë në Prishtinë.

Sllovenia dhe Suedia barazuan 2:2 sonte.

Dy të vdekur në aksidentin e rëndë në Astrazup të Malishevës

Posted on 5 Shtator, 2025 by albinfo.ch

Një aksident i rëndë ka ndodhur në Astrazup të Malishevës, në të cilin deri më tani policia ka konfirmuar se ka persona të vdekur.

Zëdhënësi i Policisë për rajonin e Gjakovës, Sheremet Elezaj, ka konfirmuar për RTKLive se sot rreth orës 15:50, në fshatin Astrazub të Malishevës është raportuar një aksident trafiku në mes të dy automjeteve ku kanë mbetur të vdekur dy persona, ndërsa dy persona të tjerë janë dërguar për trajtim mjekësor.

Në konsultim me Prokurorin e Shtetit, trupat e viktimave dërgohen për ekzaminim mjeko-ligjor, ka konfirmuar Elezaj.

Kryetari i Komunës së Malishevës, Ekrem Kastrati, ka reaguar pas aksidentit tragjik që ndodhi sot në fshatin Astrazup, ku dy qytetarë nga Komuna e Rahovecit humbën jetën dhe dy të tjerë mbetën të lënduar.

Në një postim në Facebook, Kastrati ka shprehur dhimbjen dhe solidaritetin e tij me familjet e prekura nga kjo fatkeqësi.

“Me dhimbje të madhe morëm lajmin për aksidentin e sotëm tragjik në fshatin Astrazup të Malishevës, ku humbën jetën dy qytetarë nga komuna e Rahovecit dhe u lënduan dy të tjerë. Në emër të Komunës së Malishevës, shpreh ngushëllimet më të sinqerta për familjet e viktimave, familjen Popaj nga fshati Fortesë dhe familjen Krasniqi nga fshati Krushë, dhe uroj shërim të shpejtë për të lënduarit”, u shpreh Kastrati.

Mbi 10 milionë franga kushton ekspertiza mbi vjedhjen në RUAG

Posted on 5 Shtator, 20255 Shtator, 2025 by albinfo.ch

Dy vjet më parë, ishte bërë e ditur se një ish-anëtar i lartë i kompanisë shtetërore të armëve Ruag dyshohej se ishte pasuruar në mënyrë të paligjshme.

Pasurimi lidhej me tregtinë e tankeve, transmisioneve dhe pjesëve rezervë, transmeton albinfo.ch. Ish-ekzekutivi i Ruag dyshohet se ka përfituar nga tregtia e këtyre mallrave. Që atëherë, Ruag ka porositur një firmë avokatësh për të hetuar çështjen, shkruan srf.ch.

Raportet e reja nga Zyra Federale e Auditimit Zviceran më në fund zbuluan shkallën e parregullsive në Ruag në muajin shkurt. Raste të dyshuara mashtrimi u identifikuan gjatë një periudhe prej dhjetë vitesh.

Raporti i ekspertëve kushton miliona

Hetimi për të ashtuquajturën çështje Ruag po i kushton qeverisë federale më shumë se dhjetë milionë franga zvicerane. Kjo zbulohet nga një hulumtim i SRF-së

Kryetari i Ruag, Jürg Rötheli, konfirmon për herë të parë se ky hetim është ende duke vazhduar pas dy vitesh dhe po kushton shuma të mëdha. “Është një shumë dyshifrore prej milionash,” thotë Rötheli.

Sipas hulumtimit të SRF, dëmet për Ruag për shkak të çështjes arrijnë në të paktën 60 milionë franga zvicerane. Rötheli nuk pranon të konfirmojë këtë shumë të supozuar dhe nuk pranon të zbulojë kostot e sakta të hetimit të jashtëm.

“Diaspora për Strugën” nuk mbështet asnjë kandidat për zgjedhjet komunale

Posted on 5 Shtator, 20255 Shtator, 2025 by albinfo.ch

Grupi “Diaspora për Strugën” në Zvicër, vepron prej 10 vitesh në çështje kombëtare dhe gjatë kësaj koheka marrë pjesë në procese politike dhe humanitare.

Në prag të zgjedhjeve lokale në Maqedoninë e Veriut, ky grup del me një njoftim me të cilin informon opinionin publik dhe përkrahësit e tij se: “pas zhvillimeve politike dhe marrëveshjeve ndërmjet partive në Maqedoninë e Veriut, këtë herë Grupi nuk ka arritur unanimitet për të përkrahur ndonjë kandidat për Komunën e Strugës.

Falënderojmë të gjithë përkrahësit tanë për besimin dhe mbështetjen që na kanë dhënë në çdo cikël zgjedhor deri më sot.

Si grup kemi vendosur të mbajmë qëndrim të paanshëm, duke i lënë secilit individ të zgjedhë lirshëm se cilën anë do të mbështesë. Takimet dhe aktivitetet tona do të vazhdojnë edhe në të ardhmen, sepse Grupi Diaspora për Strugën nuk shuhet nga ky vendim. Ne do të jemi aktivë në nisma humanitare, dhe kur të shihet e arsyeshme, edhe në çështje politike”, thuhet në fund të deklarimit të Grupit “Diaspora për Strugën”, i cili vepron në Zvicër.