Komisionerja e Bashkimit Evropian për Zgjerim, Marta Kos, ka vendosur të shtyjë vizitën e saj të parë në Kosovë, e cila pritej të realizohej gjatë kësaj jave, përcjell albinfo.ch.

Sipas burimeve nga Bashkimi Evropian, Kos e ka njoftuar për këtë vendim edhe kryeministrin e Kosovës, Albin Kurti, gjatë një bisede telefonike të zhvilluar të hënën.

“Gjatë një bisede telefonike me kryeministrin Albin Kurti, Komisionerja Kos i tha atij se do të shtyjë vizitën e planifikuar në Kosovë në rrethanat e zhvillimeve të fundit. Kryeministri Kurti shprehu përkushtimin e tij për rrugën drejt BE-së dhe reformave të lidhura me BE, posaçërisht në kuadër të planit të rritjes për Kosovën. Komisionerja Kos ka për qëllim të udhëtojë në Prishtinë në rastin më të hershëm të mundur”, ka deklaruar një zëdhënës i Komisioni Evropian.

Megjithëse data e vizitës nuk ishte konfirmuar zyrtarisht, ajo ishte planifikuar të zhvillohej këtë javë, më saktësisht të enjten, më 12 mars. Megjithatë, sipas burimeve evropiane, vizita tashmë është shtyrë për një kohë të pacaktuar.

Burime nga Brukseli bëjnë të ditur se arsyeja kryesore e shtyrjes lidhet me konfuzionin e krijuar pas dështimit të zgjedhjes së presidentit dhe pas vendimit të presidentes së Kosovës, Vjosa Osmani, për shpërndarjen e Kuvendit.

Sa i përket këtyre zhvillimeve, në BE kanë deklaruar se “me keqardhje marrin në dijeni atë që ka ndodhur” dhe se aktualisht janë në pritje të vendimit të Gjykata Kushtetuese e Kosovës.

Vizita e Komisioneres Kos në Kosovë pritej të kishte edhe një rëndësi tjetër politike, pasi synonte të konfirmonte përfundimin e procedurave për heqjen e masave ndëshkuese ndaj Kosovës dhe hapjen e një dinamike të re në marrëdhëniet mes Kosovës dhe Bashkimi Evropian.

Kosova mbetet i vetmi vend i rajonit të Ballkani Perëndimor që Komisionerja Kos nuk e ka vizituar ende që nga marrja e detyrës para rreth 14 muajsh. Gjatë kësaj periudhe, ajo ka zhvilluar vizita në të gjitha vendet e tjera të rajonit, disa prej tyre edhe më shumë se një herë.

Sipas burimeve evropiane, mosrealizimi i vizitës deri tani është lidhur shpesh me masat e BE-së ndaj Kosovës, por edhe me krizën politike më shumë se njëvjeçare në vend, gjatë së cilës institucionet nuk kishin legjitimitet të plotë.

Pas konstituimit të Kuvendit dhe formimit të qeverisë pas zgjedhjeve të fundit, në Bruksel ishte vlerësuar se mund të krijoheshin kushtet për një kapitull të ri në raportet mes Kosovës dhe BE-së. Megjithatë, zhvillimet e fundit politike kanë krijuar paqartësi të reja, duke bërë që zyrtarët evropianë të presin sqarimin e procedurave të brendshme institucionale në Kosovë.

Presidentja e Kosovës, Vjosa Osmani, ka deklaruar se vendimi për të shprehur ambicien për rikandidim ishte bazuar kryesisht në vullnetin e qytetarëve dhe në zotimin e kryeministrit Albin Kurti për përkrahje. Në një intervistë për Syri TV, Osmani tha se Kurti e kishte vlerësuar lart punën e saj, duke e quajtur “presidentja më e mirë e shekullit XXI”, dhe kishte diskutuar me të pas zgjedhjeve të dhjetorit 2025 për mundësinë e rikandidimit.

Presidentja theksoi se kishte biseduar me deputetë të opozitës, përfshirë LDK-në dhe partitë e tjera të vogla, për të siguruar kuorumin e votave. Ajo shtoi se nëse do të ishte propozuar si kandidate e vetme dhe me një kundërkandidat formal, Kosova sot do të kishte një president të ri.

Osmani tha se më pas mori një vlerësim të ri nga kryeministri dhe grupi parlamentar i LVV-së, i cili nuk e përkrahu kandidaturën e saj, duke çuar në vendimin që ajo të mos rikandidohej. Për president u kandiduan Glauk Konjufca dhe Fatmire Mulhaxha Kollçaku, me mbështetjen e deputetëve të Lëvizjes Vetëvendosje.

Gjykata Kushtetuese më 9 mars 2026 ka vendosur një masë të përkohshme, duke ndaluar çdo veprim të presidentes në lidhje me dekretin e shpërndarjes së Kuvendit dhe ndalimin e çdo veprimi të Kuvendit të Kosovës. /Albinfo.ch

Presidentja e Kosovës, Vjosa Osmani, ka deklaruar se nëse Lëvizja Vetëvendosje do ta kishte propozuar si kandidate të vetme, ajo do të rizgjidhej presidente. Vetëvendosje kishte propozuar Glauk Konjufcën, ndërsa më pas i kishte premtuar Osmanit nënshkrime për kandidaturë, të cilat ajo i refuzoi.

Në një intervistë për Syri TV, Osmani tha se kishte përkrahje edhe nga deputetë të opozitës, veçanërisht nga LDK-ja, dhe se kishte diskutuar individualisht me partitë joshumicë për të siguruar kuorumin e votave. Ajo shtoi se nuk kishte kërkuar pozita të tjera, përfshirë Ministrinë e Arsimit, dhe se veprimet e saj kishin qenë të orientuara vetëm nga interesi i qytetarëve dhe stabiliteti politik.

Presidentja e Kosovës, Vjosa Osmani është pyetur nëse do të rikthehej te Lidhja Demokratike e Kosovës. 

“Do të bëjë atë që është në inertes të qytetarëve të Kosovës…Do ta shoh se cili do të jetë interesi më i madh i Kosovës në këto momente. Kjo do të determinohet edhe nga zhvillimet e tanishme…Unë do ta kryej detyrën time me nder si presidente deri më 4 prill. Pas kësaj do ta bëj një vlerësim të ri konkret në interes të Kosovës, do ta marr vendimin për rrugën përpara”, tha Osmani. 

Presidentja theksoi se ka besuar plotësisht kryeministrin Albin Kurti për dialogun Kosovë–Serbi, duke mos dërguar përfaqësues të saj, dhe se veprimet e saj janë bazuar gjithmonë në Kushtetutë. Ajo po ashtu u shpreh se dekreti për shpërndarjen e Kuvendit ishte në përputhje me ligjin dhe se Gjykata Kushtetuese është autoriteti që mund të shqyrtojë çdo çështje të mundshme.

Presidentja gjithashtu deklaroi se Presidenca ka arritur të forcojë qëndrimin e administratës Trump 2 për sovranitetin dhe integritetin e Kosovës, si dhe për anëtarësimin në NATO, duke përfituar nga mbështetja e diasporës, pa bërë koncesione në dialogun me Serbinë.

Osmani tha se vendimi për rikandidim është i bazuar në vullnetin e qytetarëve dhe në mbështetjen e kryeministrit Kurti, dhe se pas përfundimit të mandatit më 4 prill, do të bëjë një vlerësim të ri për hapat e ardhshëm në interes të Kosovës./Albinfo.ch