Ministria e Ekonomisë në Kosovë dhe Universiteti i “Columbias”, memorandum për hulumtime

FB: Ministria e Ekonomise

Ministria e Ekonomisë në Kosovë dhe Universiteti i Columbias në New York kanë nënshkruar memorandum bashkëpunimi në fushën e hulumtimeve akademike përfshirë intervista dhe takime në teren. Universiteti do mbështesë Ministrinë e Ekonomisë në implementimin e Strategjisë së Energjisë 2022 – 2031 përmes këtyre studimeve. “Dy pika të fokusit të hulumtimit e raportit të tyre do të jenë zhvillimi i skemave konkurruese për integrim të burimeve të ripërtërishme në Kosovë si dhe skemave mbështetëse për rritje të efiçiencës së energjisë”, thuhet në njoftimin e ministrisë, përcjell albinfo.ch.

Gjatë nënshkrimit të Memorandumit të Bashkëpunimit, ministrja Rizvanolli është shprehur që “beson në politikëbërje të bazuar në fakte, është e rëndësishme që të kemi sa më shumë hulumtime që është e mundur mbi çështjet që i trajtojmë dhe që do të shfrytëzojmë në maksimum hulumtimin nga Universitetit Columbia”, përcjell albinfo.ch.

Ndërkohë, profesori Jenik Radon, i cili specializon në menaxhim strategjik dhe të riskut, sovranitet dhe të drejta të njeriut, veçanërisht mjedisore si dhe transparencë, ka thënë që “mezi presim të kemi një bashkëpunim të vazhdueshëm me ju [Qeverinë e Kosovës], e jo vetëm një bashkëpunim të njëhershëm. Ne e kuptojmë që puna që jemi duke bërë është më e rëndësishme se kurrë për të kontribuar së bashku në zhvillimin e shtetit tuaj”, përcjell albinfo.ch.

Studentët e universitetit amerikan janë duke zhvilluar takime me përfaqësues të Ministrisë së Ekonomisë dhe aktorë relevantë për t’u informuar për të zhvilluar hulumtimet e tyre.