NATO paralajmëron Rusinë

Sekretari i përgjithshëm i NATO-s i bëri thirrje Rusisë që të respektojë sovranitetin dhe integritetin territorial të Ukrainës, pasi Moska shtoi praninë e trupave në kufirin mes dy vendeve.

Jens Stoltenberg i bëri deklaratat përkrah kancelarit të ri të Gjermanisë, Olaf Scholz, me të cilin u takua në Bruksel.

“Pozicioni i NATO-s kur bëhet fjalë për Ukrainën mbetet i pandryshuar. Është e drejtë themelore e çdo vendi që të ndjekë shtegun që dëshiron. Kjo është e sanksionuar në shumë dokumente dhe marrëveshje, të nënshkruara edhe nga Rusia dhe që përfshijnë edhe mekanizmin e sigurisë, ku vendet duan të aderojnë”, tha Stoltenberg, sekretar i përgjithshëm i NATO-s.

Nga ana e saj, Rusia paralajmëroi SHBA-në dhe NATO-n kundër vendosjes së raketave me rreze të shkurtër dhe të mesme veprimi në Evropë.

Apeli ka ardhur pas një telefonate mes presidentit rus, Vladimir Putin dhe atij amerikan, Joe Biden.

“Përpara se të jetë tepër vonë, ne duhet të shmangim një krizë të re raketash në Evropë. Vendosja e tyre në këtë territor është e papranueshme dhe përshpejton rrugën drejt përballjes”, u shpreh Sergei Ryabkov, zv.ministër i Jashtëm i Rusisë.

Më herët, sipas një njoftimi të Kremlinit, ushtria ruse shoqëroi 5 avionë amerikanë dhe francezë mbi Detin e Zi, për t’i larguar nga hapësira e saj.