Nuk ka rritje pensionesh, thotë Kuvendi

Kuvendi i Kosovës i ka shuar shpresat e pensionistëve për rritje të pensioneve, bazuar në rekomandimet që ka bërë Komisioni parlamentar për të Drejtat e Njeriut, i cili kishte kërkuar që kjo rritje të jetë 60 për qind e pagës mesatare në vend.

Deputetët, me një shumicë të ngushtë votash, 47 kundër, 43 pro e me një abstenim, e kanë refuzuar kërkesën e Komisionit për të Drejta të Njeriut për rritje të pensioneve, në bazë të së cilës pensionistët kontributdhënës do të merrnin afro 170 euro pensione në muaj.

Kjo është vlera e 60-përqindëshit të pagës mesatare në Kosovë, e cila llogaritet të jetë rreth 290 euro, bazuar në të dhënat e fundit të Entit të Statistikave të Kosovës.

Ky refuzim ka ndodhur pas një debati të gjatë, prej disa orësh në Kuvend, i cili u përcoll me tone të ashpra, ku janë adresuar kritika për Qeverinë dhe për kryeministrin Thaçi, i cili është quajtur mashtrues dhe njeri që nuk i mban premtimet.