Rrëfimi i banorit të Thumanës: Kati i parë ma shpëtoi familjen

Derisa mbrëmja tashmë ka arritur, banorët e Thumanës, fshatit më të prekur nga tërmeti në Shqipëri ende nuk kanë një strehë mbi kokë.

Banori i këtij fshati, Vladimir Haxhiu, në një videolidhje për RTV Dukagjinin ka rrëfyer momentet e vështira të mëngjesit të ditës së sotshme, përcjell albinfo.ch.

Ai thotë se edhe në orën 10 të mbrëmjes së djeshme kishte rënë një termet, e që banorët menjëherë kishin dalë jashtë, por më pas ishin futur brenda pasi gjendja ishte qetësuar.

“Rreth orës 4 të mëngjesit ka rënë tërmeti më i fuqishëm që rrënoi gjithçka. Unë me gjithë familjen time që isha vetë i pesti mezi arritëm të shpëtonim, pasi ishim në katin e parë. Dhjetë të tjerë që ishin në katet e mësipërme mbeten në rrënoja. Katër nga ta tashmë janë konfirmuar të vdekur, ndërsa për dy të tjerë nuk ka shpresë”, rrëfen Vladimir Haxhiu.

I vendosur bashkë me familjen në një fushë të hapur, ai thotë se ende nuk janë krijuar kushtet e përshtatshme për strehim.

“Pjesërisht ka, por jo sa duhet. Deri në këto momente unë vetë nuk kam marrë as batanije e as dyshekë. Çadra është duke u montuar”, rrëfen më tej Vladimir Haxhiu.

 

---