Të dyshuarve për sulmin terrorist në Banjskë u vazhdohet paraburgimi

Keystone EPA/GEORGI LICOVSKI

Bëhet e ditur se Dushan Maksimoviq, Vladimir Toliq dhe Blagoje Spasojeviq, të dyshuar për sulmin terrorist të ndodhur më 24 shtator të këtij viti në Banjskë të Zveçanit, u është vazhduar masa e paraburgimit edhe për dy muaj të tjerë, përcjell albinfo.ch.

Lajmin e ka konfirmuar zëdhënësja e Gjykatës Themelore në Prishtinë, Mirlinda Gashi.

“Gjykata Themelore në Prishtinë – Departamenti Special, ka aprovuar kërkesën e Prokurorisë Speciale të Republikës së Kosovës, ashtu që të pandehurve V.T., B.S. dhe D.M., u është vazhduar masa e paraburgimit në kohëzgjatje prej 2 (dy) muajsh, për secilin”, ka thënë Gashi.

Tre të dyshuarit për sulmin terrorist në Banjskë gjendën në masën e paraburgimit që nga 26 shtatori i këtij viti.

Aksioni në Banjskë të Zveçanit kishte nisur në orët e hershme të së dielës (24 shtator 2023), ku ishte vrarë rreshteri Afrim Bunjaku si dhe ishin plagosur dy policë të tjerë.