Tiçino kërkon zgjatjen e masave të rrepta deri më 3 maj

Situata e pasigurt në kanton është theksuar si njëra ndër arsyet. Qeveria kantonale përmend këtu gjithashtu afërsinë me zonën e krizës në Lombardi si një faktor tjetër rrezikshmërie

Të hënën që vjen, më 27 prill, Zvicra do të fillojë lehtësimin e planifikuar të masave mbrojtëse nga koronavirusi. Kjo nënkupton që ordinancat mjekësore, floktoret, sallonet e masazhit dhe studiot e kozmetikës do të rifillojnë punën, shkruan srf.ch.

Po kështu, dyqanet e pajisjeve për kopshtari lejohen të hapen përsëri. Por, Kantoni i Tiçinos nuk është i kënaqur me këtë orar, transmeton albinfo.ch. Ai planifikon t`i mbajë masat e rrepta një javë më shumë ose deri më 3 maj në mesnatë, raporton Corriere del Ticino.

Sipas gazetës, Qeveria e Kantonit i ka bërë një kërkesë Këshillit Federal. “Do të jetë hera e fundit,” citohet letra. Situata e pasigurt në kanton është theksuar si njëra ndër arsyet.

Qeveria kantonale përmend këtu gjithashtu afërsinë me zonën e krizës në Lombardi si një faktor tjetër rrezikshmërie, specifik për këtë kanton, përcjell albinfo.ch. Edhe rajoni i përmendur italian ka zgjatur masat pandemike deri më 3 maj.

Këshilli Federal ka mundësi që tashmë të ketë vendosur për kërkesën e Ticino. Kjo do të kuptohet në konferencën për shtyp të planifikuar për pasditen e sotme.

---