Shqipëri, arrihet marrëveshja për reforma në drejtësi

Lulzim Basha tha se marrëveshja është arritur në bazë të një formulimi të propozuar nga Komisioneri i BE-së për Zgjerim, Johanes Hahn për rolin e ndërkombëtarëve në procesin e vetingut

Qeveria e Shqipërisë duket se do të shpëtojë nga rrëzimi, pasi që autoritetet në Tiranë bashkë me faktorin ndërkombëtarë, kanë arritur marrëveshjen për drejtësi, që ishte kusht i Bashkimit Evropian për procesin euro-integrues. Arritjen e marrëveshjen e kanë konfirmuar dy palët, socialistet dhe demokratët.

Kryetari i Partisë Demokratike, Lulzim Basha në një deklaratë për media njoftoi arritjen e një marrëveshjeje për reformën në drejtësi. Basha tha se marrëveshja është arritur në bazë të një formulimi të propozuar nga Komisioneri i BE-së për Zgjerim, Johanes Hahn për rolin e ndërkombëtarëve në procesin e vetingut.

“Sapo kam përfunduar një komunikim intensiv me partnerët amerikanë dhe europianë. Pas komunikimit më të fundit të rakorduar nga komisioneri Hahn, roli i misionit ndërkombëtar do të jetë rekomandues, ndërsa vendimmarrja tërësisht në duart e shqiptarëve”, tha Basha, citon TCH.

Basha foli në këtë dalje për “fitore të parimeve të Partisë Demokratike”. “PD zhvilloi një betejë të gjatë dhe këmbëngulja e saj pati rezultate pozitive”, tha Basha.

Sipas kreut të demokratëve, kjo marrëveshje është mbyllja me sukses e një procesi në përputhje me Kushtetutën dhe rekomandimet e Venecias.

“Konkludimi në këtë mënyrë i këtyre çështjeve, të lëna si litar jashtë në negociatat e të hënës, është konkludimi me sukses i PD për një draft kushtetues në përputhje me propozimet e Komisionit të Venecias dhë bazuar mbi propozimin e zonjës Nuland. Kjo betejë ka patur dy qëllime: Kushetuetshmërinë dhe të drejtat e liritë themelore”, vijoi kreu i demokratëve.

Edhe kryeministri dhe lideri socialit, Edi Rama  e cilësoi fitore historike të shqiptarëve marrëveshjen për drejtësi. Por, dryshe nga çfarë reklamoi kreu i opozitës Basha si një fitore e tyre për reformën në drejtësi, Rama tha se kjo marrëveshje përbën fitore historike për të gjithë qytetarët shqiptarë.

“Tashmë i hapet rruga revolucionit në sistemin e drejtësisë. Besoj se është një moment lehtësimi për të gjithë shqiptarët, qytetarët dhe qytetaret e këtij vendi, të cilët tanimë e kanë marrë lajmin se PD i është nënshtruar vullnetit të hekurt të popullit shqiptar dhe vullnetit të hekurt të partnerëve tanë strategjikë, që bashkë me shqiptarët të çojmë përpara një reformë historike”, tha Rama.

Sipas Ramës, sot të gjithë duhet të ndihemi të lehtësuar “jo vetëm për faktin që reforma historike do të kalojë nesër me konsensus, për faktin që sidoqoftë në Shqipëri nuk mundi të formësojë asnjë grupim që mund ta damkoste vendin me një njollë të pashlyeshme”.

Ndryshe, ishte kryeparlamentari dhe lideri i LSI-së, Ilir Meta i cili kërcënoi tri ditë më parë se nëse nuk arrihet marrëveshje për reforma në drejtësi, do ta prishte koliacionin me PS-në, dhe vendin do ta çonte më zgjedhje të parakohshme. Madje ai përmendi edhe krijimin e një qeveri teknike, e cila nuk mori mbështetje nga ndërkombëtarët.