Vazhdimësi e ndihmës japoneze për shëndetësinë e Kosovës

"Asistenca e Qeverisë së Japonisë, do të jetë një kontribut i çmuar për MSH-në edhe në procesin e reformuar " tha Ministri Agani

Organizuar nga Agjensioni Japonez për Bashkëpunim Ndërkombëtar( JICA) dhe Ministria e Shëndetësisë e Republikës së Kosovës, sot në Prishtinë u organizua seminari për menagjimin spitalor, identifikimin e problemeve, sfidat dhe mundësitë.

Në këtë seminar, ku u prezantuan edhe disa punime nga kjo fushë, nga pjesëmarrësit në trajnimet në Japoni të profesionistëve shëndetësorë menaxherial të Kosovës, Ministri i Shëndetësisë, dr.Ferid Agani falënderoi Qeverinë e Japonisë për ndihmën që JICA është duke i dhënë shëndetësisë Kosovare në ngritjen e kapaciteteve humane menaxheriale.

“Asistenca e Qeverisë së Japonisë, do të jetë një kontribut i çmuar për MSH-në edhe në procesin e reformuar ” tha Ministri Agani thuhet në një komunikatë të MSH-së.. Ai tha se nga projektet e Qeverisë së Japonisë shëndetësia kosovare do të përfitojë në forcimin e kapaciteteve humane duke rritur cilësinë e menaxhimit.

Zonj.Yjori Harda, specialist nga Jica, tha se ky agjension ka startuar me këto projekte në vitin 2009 dhe këto projekte kanë për qëllim zhvillimin e resurseve njerëzore të institucioneve shëndetësore në Kosovë.

Ajo tha se JICA dhe Qeveria japoneze do ta fuqizojnë bashkëpunimin për forcimin e kapaciteteve teknike dhe do të jetë e kënaqur të shoh që investimet në këtë fushë,do t’u ndihmojnë institucioneve shëndetësore në Kosovë.

Dr.Skender Syla,shef i zyrës së OBSH-së në Kosovë, ka bërë një prezentim lidhur me menagjimin efikas të institucioneve spitalore, duke marrë në konsideratë shumë ndryshime që duhen bërë në qasje të ndryshme.

Dr.Xhevat Ukaj,drejtor i Departamentit Strategjik në MSH, pjesëmarrës i trajnimit për fuqizim të kapaciteteve teknike, ka bërë një prezantim nga përvoja që ka fituar gjatë qëndrimit atje,përmes prezantimit ” Sistemi shëndetësor dhe sfidat”.

Gjatë këtij viti nga asistenca e JICA kanë përfituar zyrtarë-menaxherë të MSH-së, ndërsa në vitin 2012 menaxherë të tjerë shëndetësorë do të jenë përfitues nga projektet JICA për shëndetësinë kosovare.