Maqedonia po u vendos barriera eksportuesve kosovarë në kufi

Maqedonia po e bën vet verifikimin e produkteve kosovare, duke anashkaluar analizat e instituteve të bëra në Kosovë

Nuk është vetëm Serbia që po iu nxjerrë telashe prodhuesve kosovarë. Hiq më mirë nuk po sillet as Maqedonia, shtet ky i cili është në CEFTA, sikurse Kosova.

Prodhuesit kosovarë, që eksportojnë në ketë shtet, thonë se Maqedonia po përdor mënyra të ndryshme për t’i ndalur eksportet nga Kosova, me qëllimin e vetëm që t’i mbroj produktet e veta. Fillimisht duke i lënë të presin shumë gjatë në kufi, dhe procedura tjera të tejzgjatura që nuk parashihen fare me ligj, shkruan Express.

Madje, e ka marrë edhe një detyre që nuk i përket as me marrëveshjen CEFTA. Po e bën vet verifikimin e produkteve kosovare, duke anashkaluar analizat e instituteve të bëra në Kosovë.

Por pas këtyre kërkesave për analiza, pronari i kompanisë “Ujë Rugove”, Visar Kelmendi, kompania e të cilit se fundi ka pasur një përvojë të keqe me këtë shtet, thotë se fshihet diçka tjetër.

Sipas tij, me këto barriera Maqedonia po dëshiron që t’i mbroj produktet e veta. Kompania e tij, që para dy javësh nisi një kamion me “Ujë Rugove”, u ndal në kufi për gati një javë. Kelmendi tregon se si doganieret maqedonas kërkuan t’i kryejnë vetë analizat e ujit, pavarësisht faktit se të njëjtat analiza ishin kryer nga Institutet përkatëse në Kosovë dhe ato në Slloveni.

“Mu personalisht më është dukur ma shumë si instrument i Maqedonisë për t’i mbrojtur produktet e veta”, tha ai.

Në dijeni të kësaj është edhe Oda Ekonomike e Kosovës. Kreu i saj, Safet Gerxhaliu, tregon se përveç ujit, ky shtet nuk i pranon as eksportet e miellit dhe grurit. Thotë se për ketë problem e kanë lajmëruar edhe ambasadën e Maqedonisë në Kosovë, por zgjidhje për problemin, e sheh takimin e radhës të CEFTAS-së. Aty Gerxhaliu shpreson që të diskutohen këto probleme.

Ndërkaq, sa i përket asaj se si duhet të veproj Qeveria e Kosovës, Gerxhaliu mendon se duhet marrë masa, nëse kjo situatë vazhdon.

Përgjegjësia i përket direkt Ministrisë se Tregtisë dhe Industrisë, e para e se cilës ka paralajmëruar se do të kërkoj sqarime nga Qeveria e Maqedonisë. Por deri tani nuk ka diçka konkrete.

Nga ana tjetër, eksportuesit kosovarë i çuditë fakti se pse po ndodh kjo, kur dihet që Kosova po e respekton plotësisht marrëveshjen CEFTA, sidomos me Maqedoninë, produktet e të cilës gjenden fuqishëm në tregun kosovarë.