Për çdo vit nga Afganistani në Kosovë hyjnë 55 milionë euro

Sipas hulumtimeve të GAP-it, në Afganistan, janë të punësuar rreth 2100 kosovarë, paga mesatare mujore e të cilëve është rreth 2500 euro

Brenda një viti kosovarët që punojnë në Afganistan dërgojnë deri në 55 milionë euro remitenca. Këto të dhëna i ka publikuar Instituti për Studime të Avancuara GAP”. Në këtë analizë të këtij instituti të quajtur “Dërgesat nga Afganistani dhe ndikimi i tyre në ekonominë e vendit”, thuhet se deri më tani nuk janë vlerësuar sa duhet dërgesat nga vendet e Lindjes së Mesme, sidomos dërgesat nga Afganistani, raportojnë mediet e Prishtinës. 

Kosova është një nga vendet e cila përfiton më së shumti për kokë banori nga dërgesat e punëtorëve jashtë vendit. Sipas të dhënave të Bankës Qendrore të Kosovës, në vit në Kosovë arrijnë mbi 500 milionë euro, të cilët dërgohen nga kosovarët jashtë vendit për familjet e tyre në Kosovë.

“Sipas hulumtimeve të GAP, në bazat ushtarake dhe në sektorë të tjerë në Afganistan, janë të punësuar rreth 2100 kosovar, paga mesatare mujore e të cilëve është rreth 2500 euro. Për çdo vit nga Afganistani në Kosovë hyjnë së paku 50-55 milionë euro. Të gjitha këto mjete hyjnë përmes sistemit bankar, çka e bën më të lehtë përllogaritjen e këtyre dërgesave”, thuhet në hulumtimin GAP-it.

Instituti për Studime të Avancuara GAP, përmes një hulumtimi disa mujor, ka grumbulluar të dhëna nga kompanitë kontraktuese, bankat komerciale, agjencitë e punësimit dhe intervistat e drejtpërdrejta me punëtorët kosovar në Afganistan, dhe del me këtë analizë e cila ka për qëllim që të informoj publikun me këtë kategori të të punësuarve jashtë vendit, kushtet e tyre të punës, rajonet prej nga vijnë, ndikimi i këtyre mjeteve në ekonominë e vendit