Arrihet marrëveshja

Është arritur marrëveshja për menaxhimin e integruar të kufijve, pas tri ditë negociatash maratonike ndërmjet delegacionit të Kosovës dhe atij të Serbisë, me ndërmjetësimin e Bashkimit Evropian.

Sipas shpjegimeve zyrtare të Bashkimit Evropian, palët gradualisht do të ndërtojnë post-blloqet e integruara, të përbashkëta dhe të sigurta nëpër pikat e kalimeve. EULEX-i, sipas mandatit do të jetë prezent.

“Duke e marrë parasysh faktin se palëve duhet t’u kërkohet që gradualisht të harmonizojnë legjislacionin me atë të BE-së, palët arritën marrëveshje për konceptin e BE-së për menaxhimin e integruar të pikëkalimeve (IBM). Kjo do të thotë që palët gradualisht do të krijojnë kalime të përbashkëta, të integruara, të vetme dhe të sigurta tek të gjitha pikëkalimet e përbashkëta. EULEX-i do të jetë aty në bazë të mandatit të vet. Koncepti IMB do të implemenohet gradualisht sa më shpejt që është e mundshme”, thuhet në njoftimin e BE-së.

Shefja e delegacionit të Kosovës, Edita Tahiri, ka thënë se për dallim prej marrëveshjeve tjera, kjo marrëveshje në formë të protokollit do të nënshkruhet edhe nga ana e BE-së, në mënyrë që edhe Brukseli të jetë një lloj garantuesi se marrëveshja do të implementohet.

Sa i përket marrëveshjeve të mëparshme është arritur që nga Beogradi të merren garancitë se një marrëveshje e arritur muaj më parë për lirinë e lëvizjes do të jetë në tërësi e implementuar që nga data 26 dhjetor nëse BE-ja konfirmon se liria e plotë e lëvizjes do të garantohet që nga kjo datë.

Sikur të mos kishte ndodhur dhuna e së hënës në veri nga serbët e rebeluar, marrëveshja e sotme do të mjaftonte që Serbia të marrë statusin e kandidatit, por në dritë të dhunës në veri dhe në dritë të asaj se çfarë ka thënë kancelarja Angela Merkel sot në Parlamentin gjerman, marrëveshja nuk mjafton.

Brukseli i vetëdijshëm për këtë rrethanë qysh tash ka nisur të përgatisë terrenin dhe të paralajmërojë se ndoshta çështja e statusit të kandidatit për Serbinë do të lihet për ndonjë samit të radhës për vitin e ardhshëm, më së herët në pranverë, diku në mars.

Të hënën kur të takohen ministrat e Jashtëm të BE-së do të dihen detajet më të qarta.