Mërgimtarët, 100 milionë euro depozita në Kosovë

BQK-ja në raportin e Stabilitetit financiar ka theksuar se depozitat e jorezidentëve deri në qershor për 33.7 për qind

Rreth 100 milionë euro arrin vlera e depozitave të banorëve jorezidentë në sistemin bankar të Kosovës, ka bërë të ditur Banka Qendrore e Kosovës.

BQK-ja në raportin e Stabilitetit financiar të publikuar javën e kaluar, ka theksuar se depozitat e jorezidentëve deri në qershor të këtij viti janë rritur për 33.7 për qind.

Në përgjithësi depozitat e jorezidentëve në vend kanë një pjesëmarrje prej 5.1% në depozitat e përgjithshme të sektorit bankar, krahasuar me 4.3 për qind sa kanë qenë në periudhën e njëjtë të vitit të kaluar, shkruan e përditshmja Zëri.

Në raport thuhet se rritja e vazhdueshme e depozitave të jorezidentëve në vend është rezultat i normave të favorshme të interesit në depozita si dhe rritjes së besimit të publikut kundrejt sistemit bankar të Kosovës, gjë që ka rezultuar nga stabiliteti dhe performanca e mirë e këtij sistemi.

Kurse, profesori i ekonomisë, Muhamet Sadiku, ka deklaruar për “Zërin” se depozitat e jorezidentëve janë kryesisht mjete të diasporës kosovare e shumë pak të ndërkombëtarëve që punojnë në Kosovë.

“Besoj se depozitat e jorezidentëve janë mjete të diasporës kosovare e shumë pak depozita mund të jenë të ndërkombëtarëve që punojnë në Kosovë”, ka theksuar Sadiku.

Sipas tij, depozitimi i mjeteve në Kosovë e jo atje ku punojnë ka më tepër të bëjë me një nacionalizëm ekonomik dhe përfitimi më i lartë nga depozitat në bankat kosovare.