Në Kosovë, nga 2008-ta ka rënie investimesh

Qeveritarët, rënien e investimeve e arsyetojnë me krizën globale financiare, ndërsa ekspertët fajësojnë institucionet kosovare

Para shpalljes së pavarësisë së Kosovës, pritjet e udhëheqësve të vendit e ndërkombëtar, por edhe ekspertëve të ekonomisë, ishin se me formimin e shtetit të ri, do të rriten edhe investimet e huaja, e rrjedhimisht do të ketë zhvillim të përgjithshëm ekonomik.

Kjo pasi në atë kohë, pengesë kryesore për mosardhjen e investitorëve ndërkombëtarë, konsideronin statusin e pazgjidhur të Kosovës.

Por, ndryshe nga pritjet, tashme gati katër vjet që nga shpallja e pavarësisë, investimet e huaja kanë shënuar rënie të vazhdueshme, raporton Radio Evropa e Lirë.

Sipas një raporti të Bankës Qendrore të Republikës së Kosovës, në vitin 2007 investimet e huaja të drejtpërdrejta në vend kanë qenë 421 milionë euro; më 2008 – vit ky kur është shpallur pavarësia, investimet kanë qenë 355 milionë euro; ndërsa në vitin 2009 vetëm 310 milionë euro, në vitin 2010, investimet kanë rënë në 265 milionë euro, kurse në gjashtëmujorin e parë të vitit 2011, investimet e huaja në Kosovë kanë qenë 157 milionë euro.

Megjithatë, zyrtarë qeveritarë, rënien e këtyre investimeve e arsyetojnë me krizën globale financiare, përderisa ekspertët e ekonomisë fajin e drejtojnë tek institucionet kosovare.

Valdrin Lluka, drejtor në Agjencinë për Promovimin e Investimeve, që funksionon në kuadër të Ministrisë së Tregtisë dhe Industrisë, bën të ditur se gjatë vitit 2011 është shënuar një rritje e investimeve rreth 15 për qind, krahasuar me periudhën e njëjtë të vitit 2010, kur investimet ishin 132 milionë euro.

Por, Mustafa Hasani, ish-drejtor në Agjencinë për Promovimin e Investimeve të huaja, përmend burokracinë si një ndër arsyet kryesore që ka penguar ardhjen e investitorëve të huaj në vendin tonë. Ai, madje, thotë se autoritetet nuk po e zbatojnë strategjinë për promovimin e investimeve të huaja, e cila është përgatitur më herët naraporton Radio Evropa e Lirë.

Në raportin e fundit të Bankës Botërore, të quajtur ” Të bërit biznes” për vitin 2011, Kosova është radhitur në vendin e 173-të sa i përket mbrojtjes së investitorëve, në mesin e 183 shteteve ku bëhen këto matje.　/albinfo.ch, REL/