Shpresojnë për protestë pa dhunë

Pavarësisht sjelljes së PK-së, Kurti ka thënë se Vetëvendosje ka për t’iu përmbajtur planit të tyre për protestë paqësore

Vetëvendosja” ka njoftuar që protesta e sotme e saj do ta ketë skenarin e njëjtë sikur më 14 janar, por thotë që shpreson se Policia e Kosovës do ta ndryshojë të vetin.

“Ne shpresojmë e besojmë që policët tashmë e kanë kuptuar gabimin që e kanë bërë më 14 janar, posaçërisht Njësia speciale dhe do të jenë krejt ndryshe nesër”, ka thënë kreu i lëvizjes “Vetëvendosje”, Albin Kurti.

Por pavarësisht sjelljes së PK-së, Kurti ka thënë se ai bashkë me kolegët e tij kanë për t’iu përmbajtur planit të tyre i cili flet për protestë paqësore.

Kryetari i “Vetëvendosjes” i ka kërkuar PK-së që të mos pengojë subjektin e tij sikur të shtunën e kaluar, siç ka thënë ai, për të penguar Serbinë për të depërtuar në Kosovë.

Lidhur me protestën e sotme të Vetëvendosjes, Policia e Kosovës nëpërmjet një komunikate ka bërë publik sot Urdhrin Operativ si dhe　 shkresën e adresuar qytetareve të Kosovës. Në komunikatën e PK-së thuhet se “me qëllim të informimit të opinionit publik lidhur me protestën e nesërme nga subjekti politik Vetëvendosja,　 Policia e Kosovës ka bërë të gjitha përgatitjet e nevojshme duke hartuar Urdhrin Operativ të quajtur ” Lëvizja dhe Qarkullimi i　 Lirë 2″.

Policia e Kosovës apelon tek të gjithë qytetarët që t’u shmangen të gjitha veprimeve të kundërligjshme dhe të mos bien pre e provokimeve.

Policia e Kosovës po ashtu i është drejtuar përmes një shkrese qytetarëve, ku ka kujtuar obligimet e Policisë për ruajtjen e rendit dhe ligjit, si dhe të drejtat e qytetarëve sipas ligjit për tubimet publike.