Shqipëria dhe Hungaria, pretendojnë hapësirën ajrore të Kosovës

Shqipëria dhe Kosova kanë rënë dakord që të punojnë së bashku për të gjetur një zgjidhje për administrimin e hapësirës ajrore

Qeveria shqiptare, e nxitur nga amerikanët, prej kohesh po shikon mundësinë e marrjes nën kontroll të hapësirës ajrore të Kosovës, e cila deri më tash menaxhohet nga NATO, por së fundmi ka deklaruar se do ta lëshojë. 

Përveç Shqipërisë, siç raporton e përditshmja “Shqip”,  në ‘garë’ është edhe Hungaria, e cila ka marrë mbështetjen paraprake të vendeve anëtare të NATO-s. 

Por, Shqipëria dhe Kosova kanë rënë dakord që të punojnë së bashku për të gjetur një zgjidhje optimale për problemin e administrimit të hapësirës së sipërme ajrore të Kosovës. 

Kjo është vendosur në takimet që zhvilloi Ministri i Transportit, Sokol Olldashi, me Kryeministrin e Kosovës, Hashim Thaçi dhe Ministrin e Infrastrukturës, Fehmi Mujota. 

Hapësira e sipërme ajrore e Kosovës, në nivelin mbi 8500 metra, administrohet nga NATO, ndërkohë që Aleanca ka vendosur që së shpejti kjo hapësirë të administrohet nga Autoritetet e Aviacionit Civil. 

Shqipëria është ofruar e gatshme të bëjë administrimin për llogari të Kosovës, derisa Prishtina të krijojë kapacitetet e veta teknologjike dhe njerëzore. 

Por, në garë të fortë ka hyrë edhe Hungaria, e cila politikisht dhe ekonomikisht i plotëson kushtet, ndërsa Shqipëria has pengesën e Spanjës.

Megjithatë, Olldashi dhe Mujota ranë dakord paraprakisht të ngrihet grupi i përbashkët teknik i ekspertëve që do të ndjekë në vijimësi të gjithë problematikën e koordinimit dhe zgjidhjes së çështjeve që kanë të bëjnë me zhvillimet respektive infrastrukturore dhe në fushën e transporteve. 

Sipas gazëtës “Shqip”, në takimin e zhvilluar në nëntor në Tiranë, drejtori i aviacionit civil të Kosovës, Dritan Gjonbalaj, pati deklaruar se, “hapësira e lartë ajrore e Kosovës është e mbyllur për mbikalime që nga viti 1999. Jemi në rrugë të mirë për të gjetur një zgjidhje që është politikisht, teknikisht dhe praktikisht e pranueshme”.

Një tjetër çështje që gjeti angazhimin e dyanshëm të titullarëve të transportit ishte ekzaminimi i mundësive të rivendosjes së fluturimeve direkte Tiranë – Prishtinë. 

Ministrat ranë dakord të shikojnë mundësinë e aplikimit të tarifave lehtësuese për operatorët e mundshëm ajrorë./albinfo.ch & shqip/