Ndasi ndërmjet shqiptarëve dhe maqedonasve

Shqiptarët dhe maqedonasit shprehen me mendime diametralisht të kundërta për zhvillimet që po ndodhin në vend, proceset euro integruese dhe punën e Qeverisë.

Këto të dhëna tregohen në një anketë të realizuar nga e përditshmja në gjuhën maqedonase ‘Dnevnik’.

Sipas të njëjtës anketë, e vetmja gjë për të cilën shqiptarët dhe maqedonasit mendojnë njësoj, janë problemet ekonomike, përkatësisht vështirësitë që kanë për pagesën e faturave.

Në pyetjen se a pajtoheni me bindjen që ‘vetëm Greqia është fajtore që Maqedonia nuk është në NATO dhe BE, 77 % e shqiptarëve thonë ‘jo’, ndërsa 52 % e maqedonasve, thonë ‘po’, shkruajn mediat shqiptare në Maqedoni.

Qytetarët janë pyetur edhe për atë se ‘a pajtoheni me mendimin se Qeveria e VMRO DPMNE-së nuk dëshiron që Maqedonia të hyjë në BE?’. 79 % e qytetarëve shqiptarë janë pajtuar me këtë mendim, ndërsa 73 % e maqedonasve mendojnë ndryshe. Në pyetjen tjetër se ‘a pajtoheni me mendimin se Qeveria po shpenzon paratë e buxhetit për qëllime të nevojshme, 85 % e shqiptarëve nuk pajtohen me këtë konstatim ndërsa 48 % e maqedonasve pajtohen.

Në këtë anketë qytetarët janë pyetur edhe për lirinë e mediave, luftën e Qeverisë kundër korrupsionit, si dhe arrestimin e Lube Boshkovskit. Anketën, për nevojat e të përditshmes ‘Dnevnik’ e ka realizuar agjencia ‘Rejting’ nga 20 deri 25 janar, duke pyetur 1650 qytetarë.